فدا:
رجعنا ورجعت حياتي نفسها بس اللي تغير رضا صار بكل شي يختلف حبه صار معلن وبالبيت كلامه حلو وهادئ هو هذا طبعه من اول بس كنت اتضايق من غروره
مروة سوينالها العمليه ونجحت وبدت تمشي وره شهرين من نومتها بالفراش واني اللي داريتها وشلتها وصرت احسها صدك بنتي وبهاي الايام صار عندي حمل جديد اقوى من الاول اصلا ماكو مقارنه بين الحملين بهذا حملي اركض واشتغل والبيت كله عليه وما اشتكيت من شي
كبرت بطني وفرحت بحملي بس ما خلصت من كلام ام رضا ابد مشاكلنا اني وهي ما انتهت ابد واللي عرفته تضوج مني لان رضا يحبني غيرها ماكو بحيث صارت من يفوت رضا للبيت وتشوفه يضحك ويايه تسوي نفسها كلش مريضه وتشغلنا بيها اني ما تخليني اتقرب الها ابد ودائما تسمعني انه احنا نسوي سحر وتخاف افوت لغرفتها لو اكمش ملابسها
مرت الايام وصار موعد ولادتي واني ما اعرف شنو جنس الطفل وما يهمني وولدتها بنتي الاولى مريم وصاروا عندي بنات اثنين مروة ومريم وطايره بيهم فرح
ولدتها ورجعت للبيت ام رضا بمكان ما تتحمدلي بسلامتنا لكيناها تبجي وشاده راسها واول ما فتنا طارت يم ابونا تكله يمه لا تنقهر يجيك الولد واذا هاي ما جابته غيرها تجيبه
متت قههر بيومها واصلا هو النفاس يخلي حالة المره تعيسه وهاي تزيدها عليه واللي كمل خواته ياهو اللي تجي تاخذ بخاطره عبالك ميت اله ولد مو الله رازقه خلفه تخبل ومعافاة
مروه بيها ملامحهم بس سمارها حلو ومريم شايله جمال امي الله يرحمها اللي كان ينضرب بي المثل وبيها شويه مني
رغم هذا رضا وجموده وحتى ردوده ما اكدر احدد موقفه وياهم لو ويايه
اصلا من اخواته يحجون ما يكول غير كلمة الحمد لله على تمام الخلقه وهالشي كان يكفيني الي بس ما يردهم ابد
فاتت فتره وقررت اسوي طفل ثاني مباشرة بعد بنتي احنا الخير الحمد لله عدنا وصحتي تمام وفعلا حملت مره ثانيه وهالمره حملي بموت جان اصعب حمل من اول يوم صار بي صرت انزف لحد ما وصلت لنص الحمل صار ورحت للطبيبه كالت ولد وطرت بي تصورت هذا فرحتي وتصورت ماكو بعده كلام يزعجني صرت اخاف على روحي من الهوا واخاف لا يتأذه طول الحمل اني ما شايفه رضا بفراش ولا اخليه يتقرب الي اخاف على اللي ببطني لحد ما وصلت سبع اشهر بالف نذر
كان رضا يعاتبني على هجري لغرفتنا ونومتي بغرفة مروة اللي حولتها قريبه يم غرفتنا بالطابق الثاني ونومتي كلها بيها واعرف غير هالشي اني ضعيفه يمه وما اكدر ارده كان كل يوم يعتب قبل ما ننام واذكره بكلام طبيبتي وبيوم كاعدين بس اني وهو وبناتنا نايمات بده يحاول ويايه
-فدا لج الغرفة صايره تاكلني زين اني اجي يمكم بالليل
-رضا فدوة والله ما يصير
-ولج ما اسوي شي والله بس اخذج بحضني وانام
-كل مره تكولها
-يعني شلون
-هاللون رضا ما بيه يصير بابني شي
-لج فدا صرت اضوج منه قبل لا يجي
-اشش اسكت لا تكول هيج خل يجي بالسلامة وتدلل
-حيل وهاي بعد شكد
-رضاااا
-لج انت شنو حجارة ما مشتاقه ابد
-مشتاقه بس مو هسه
-هههه واني ميت عليج بس يلا نتحمل لخاطر هالامير اللي شايلته النا
-ما ضايج رضا
-لا ابد ليش اضوج شنو شايفتني همجي حتى اذيكم انت وابني عادي ورانا عمر اني وانت وين تروحين مني حتى لو تعجزين هم ما اعوفج اضل اركض وراج
تمددت على رجله بالهول وهو يلعب ببطني ويضحك ويشاقيني
-لج كومي اشتعلوا لا تنامين هيج
-ماا عوفني
-لج راح تخبليني
-وشتسوي هااا
كعدت وحطيت عيوني بعيونه اتحداه جرني قوي لحضنه وبوسني براسي ويلعب بشعري
-تصيرين زينه واعلمج شسوي
-رضا شنو نسميه
-يجي والله كريم
-رضا انت ليش ما تبين فرحتك وضوجتك الغيم عندك متساوي زعلان لو فرحان نفس الشي
-يعني اركص
-لا بس حتى من عمتي والبنات يحجون نفس ردة الفعل لو اشوفك تضوج وياهم والله رضا اموت بقهري بس انت لا تضوج ولا فرحان
-لا فرحان هوايه بناتي نعمه من ربي وما صدكت مروه صارت تمشي زين اكوم اعترض على خلق ربنا
-بس انت لازم يصير عندك ولد مو هيج
-واذا بنيه اردها عاللي نطاها شنو هالحجي فدوى قابل هيج متخلف اني
-لا حشاك
-يلا كومي روحي بفراشج تره بعدلي شويه واتخبل
-هههه تتحول وحش
-اي
-يلا
-شنو يلا
-اقبل تتحول
-امشي فدا روحي يم بناتج وخلي الليله تفوت
-والله رضا اني هم مشتاقه
-كومي لج
اندار لغير جهة واني اجر بوجهه اريد ابوسه وهو ما يقبل واحنا بهذا حالنا انفتحت الباب وفاتت ام رضا
