فدا :
مر يوم والثاني واني شايله هم لان اعرف موقفي رضا اذا ما طلكني وضل يريد ارجع راح باقرب فرصه انجبر وارجع
بقيت ببيت عباس ما رجعت للقريه وصرت اتحجج بامتحانات شمس وابنها حتى اكثر منها رغم عباس صار يعرض يرجعني رغم اعتراضات شمس واني ضليت مجلبه ما ارجع
وره تقريبا اسبوع اجا رضا مره ثانيه والظاهر فعلا الصلح ماشي بينه وبين اخوه اني بقيت كاعده بالغرفه وهالمره من وصل كان وياه شخص عزيز
كمزت مروة للغرفه حبيبتي مشتاقه الها وهي فرحت من شافتني وبقينا نسولف ونضحك لحد ما صار الليل واني استغربت ما راح بقى
-مروة حبيبتي شنو شوكت ترجعون الدنيا حتصير ليل
-لا مو ابوي كال نبات هنا
صفنت بوجهها عرفت السالفه بيها هوايه اطراف وعباس اكيد طرف ومن دخلت شمس تكلي ساعديني بالعشا عرفتها هي هم طرف خزرتها وطلعت وراها ما خايفه منه اني حتى اذا اشوفه قابل شنو
دخلت للمطبخ كله اكل جاهز
-اي شمس بشنو اساعدج والاكل كله من بره اسويلج زلاطه لو احضر الخواشيك
-يوو فدا ما تشوفيني مخبوصه
-اي مخبوصه والدليل ابنج عندي وانت دا تسوين العشا بشنو يمه بعد مخبوصه
سكتت ودا تكمل شغل اني شايله ايهم رحت انطيته الها
-هاج ابنج ما اساعدج وباجر راجعه للديرة
-شبيج فدا
-ما بيه لج والله ما زعلت منج بكل شي صار بس هسه صدك حق ازعل لان انت مو خوش ادميه ليش تصيرين وياهم
-فدا رضا يحبج واني ما الي دخل هو جاي لبيت اخوه وانت جايه لبيت اختج شنو لازم العائلة تنقسم نصين لان انتو زعلانين هذاك هو وروحي تعاركي وياه لما تملين اني شكو
ضليت صافنه عليها صدك هسه هي شعليها بس اني صرت ادور احد اتعارك وياه
طلعت وكل هذا مروة بذيالي تمشي
-يمه
انداريت الها فرحانه بالكلمه
-ها يا عيون امج
-ابوي يكول انت تداريني لو سويت العمليه لان يجبسون رجليناتي اثنينهن
-بعيني اشيلج شوكت تسويها
لمعت فرحه بعينها
-يعني ترجعين ويانا كال بس ترجع امج نسويها
-لا من تسويها كولي اله اروح يم خالتي حليمه وتجين لبيتنا وتصيرين يمي
-هااا اي اكول اله
يعني حتى الطفله مستخدمها ورقة ضغط شكد مغرور شايف نفسه ما يقبل يتنازل من علياءه ويكول بس كلمه وحده ويرجعني
ضجت اكثر وبقيت اخزن بقلبي لحد العشا وصار وقت اللي اواجهه
دخلت للاستقبال سلمت وفرشت السفره وجابت شمس الاكل وكعدنا تعشينا وهو وعباس يسولفون ويضحكون وكل شويه يباوع الي ويلتفت
خلصنا كل شي وفرشت لمروة بالغرفه ويايه واجينا ننام انفتح الباب شمس شايله فراش وفرشته ورضا وراها دخل
-اي والله وتسلمين ام ايهم تعبتج بس اني هنا ارتاح اكثر من الاستقبال
ما تحملت اسكت بعد
-اخذ راحتك
طلعت وسديت الباب عليهم هو ومروة واخذت فراشي رحت بالاستقبال مديته وكعدت عليه
نعست وبدت عيوني تغمض تمددت واني طافره روحي انفتح الباب شلت راسي رضا كعدت لحيلي وهو اجا كعد يمي عالفراش مبتسم
-شجابك مو عفت الك الغرفة وعلى اساس الاستقبال نومته تبزز مدري شبيها
-منو كال احلى نومه بي
اجيت اوكف جرني وكعني
-هاي شبيك
-انت اللي شبيج كافي عاد
-لا والله
-اي وعيونج كافي مليت اني باجر ترجعين
-ما ارجع وما طول هيج مغشم نفسك وما تريد تراضيني وتعتذر ابد ما ارجع
