***17***
Matapos yung klase namin nun, sinabihan ko si Ash na pupunta ako sa National Book Store para bumili ng mga Art materials na pwede naming gamitin para sa Project namin sa Marriage thingy. Sabi pa nga niya sasama daw siya, sabi ko eh kaya ko na iyon.
Pumunta ako sa mall nun. Nasa harapan naman yung National kaya pumasok na ako kaagad. Nung dumaan ako doon sa mga colored papers, kumuha ako ng iba't ibang kulay. Kung tutuusin, wala pa kaming idea ni Ash kung papaano namin gagawin yung project namin pero bili na ako ng bili ng art materials. Kumuha ako ng mga tela.. at kung anu-ano pa. Pati nga iba't ibang markers nakuha ko na yata.
Nakakita naman ako ng mga libro doon sa gilid. Binabasa ko naman at naghahanap din ako ng magandang message kaya lang may narinig akong nagsasalita.
'Ito bang bear.. o yung pig? Ayos naman yung bear, cute yung pig? Alin sa dalawa?'
Lumingon ako kung sino yung nagsasalita. Pagtingin ko, may lalaki na nakatayo doon sa stuff toy section ng National at may hawak na dalawang stuff toys. Ang tangkad nga niya eh.
Tumingin lang ako doon sa hawak niya tapos nakialam naman ako..
"Kung ako tatanungin mo, mas pipiliin ko yung bear."
Hindi naman siya lumingon sa akin. Nakatingin pa rin siya doon sa dalawang stuff toys.
"Tingin mo?" tinaas niya yung bear at binalik niya yung baboy, "Bear it is."
Bumalik na ako doon sa pagtitingin ng libro kaya lang narinig kong may naglalakad. Siya pala uli. Nginitian ko lang siya nung nakatayo na siya doon sa dulo.
"Hey, thanks. Hindi talaga ako makapag-decide kanina pa eh. Mabuti na lang may babae dito, kung hindi ewan ko na talaga."
Nilingon ko naman na siya ng diretso.
"Your welcome. Ang cute naman tignan na may lalaki pala na hindi makapili kung anong stuff toy ang bibilihin niya.."binalik ko yung libro na kinuha ko sa shelf.
Mukhang nagulat siya sa akin, pero ngumiti lang.
"Sa girlfriend ko kasi." tinitigan naman niya ako kaya nailang ako ng kaunti, "You look familiar."
"Ganun? Itong ganito ang mukha?" inikot ko yung daliri ko sa mukha ko, "Common. Kaya familiar. Baka kamukha ko yung nagtitinda ng isda sa suki niyo sa palengke."
Tumawa naman siya sa akin. Dinala ko na yung basket na pinaglagyan ko ng art materials at sumabay na siya sa akin.
"Ang dami niyan ah.." napansin niya yung basket ko.
"Oo, may project kasi kami nung partner ko. About Marriage. Wala pa nga kaming idea eh."
Binayaran naman namin isa-isa yung kanya-kanya naming binili. Actually, marami yung akin, pen lang at stuff toy yung kanya. Nung makalabas na nga kami, nakisabay pa uli siya sa akin.
"Gusto mong kumain?" sabi niya sa akin, "Don't worry.. it's not a date. Just, a friendly remark. More like.. an encounter at the mall." nagtataka ako sa kanya tapos dinagdag niya, "Hindi pa kasi ako kumakain kanina pang tanghali. Treat ko."
Hindi bagay sa akin na makisabay sa stranger lalo ka kung kumain. Pero dahil mukhang harmless naman siya at naghahanap nga ng stuff toy sa National, sumabay na rin ako. Kung tutuusin, nakakahiya nga umorder pero siya pa rin yung nagbayad.
Halata ngang gutom siya kasi nung kumain kami sa Jollibee.. naubos niya kaagad yung buger niya. Natatawa nga ako kasi mukhang ang sarap-sarap niyang kumain. Eh ako isang kagat pa lang nun.
Nag-ring naman yung phone niya. Kinuha pa niya sa bulsa niya at sinagot din naman niya.
"Hello?" tapos nagsalubong yung kilay niya, "Oo nakabili na ako sa National! Shut up!" binaba naman niya kaagad.
