حب وسط الدماء

part 10

سكينة: بلاتي بلاتي وقفووووا
أنا: قلبي وقف قلب مايوقفو الناقلة وبديت كانشهد صافي باينة عاقت بيا
واحد من الرجال: وي شاف
بدات خطوات سكينة كاتقرب حتى وقفات حدانا
سكينة: ممممم واش هنا كاين الجثت كاملين؟
الرجل: أكيد هزيناهم كاملين..
سكينة: اوكي ديوهم للبلاصة لمعلومة ودفنوهم.. ورجعو بالزربة باش تنظفو المستودع راه يمكن غانبدلو المكان بسباب ديك لحشرة اللي مزال مالقيناهاش دبا غادير لينا مشاكل كبيرة مع الرئساء بففف غايخصنا نغبروا الى مالقيناهاش ليوم
أنا: (فنفسي) الحمد لله الحمد لله كنت غانموت بالخلعة
رجعوا الرجال يدفعوا فديك الناقلة وسط الغابة وأنا لحد الآن ماعرفتش كيفاش غاندير نهرب من بين يديهم.. بقاو غاديين مسافة بعييييدة على لمكان اللي كنت محبوسة فيه وأنا مزال صابرة على هاد الوضع لمقزز اللي أنا فيه حتى حسيت بديك الناقلة وقفات..
بديت كانسمع دوك الرجال كايهضرو كلام مافهمتوش شوية حسيت بيهم كايهزو الجثت من فوقي حتى وصلو ليا وهزوني ثاني من ضهري بلاما يقلبوني ولاحوني فالأرض على وجهي حتى كليت الرملة.. سمعت واحد جر ديك الناقلة ورجع وبقاو جوج هوما اللي غايتكلفو بالدفن يمكن..
بداو عملية الحفر وأنا فلحظة حليت عيني باش نستكشف لمكان.. لقيت راسي فجنب الجثت يعني ماشي وسطهم وبانولي دوك الرجال مجمعين وكايحفرو ..كانت حدايا واحد الشجرة اللي قررت أنني ندير شي خطوة ونوض نتخبا موراها......... بديت كانطلب الله يعاوني وكانحاول نزحف بلاما ينتابهو ليا بقيت كانكحز بشوية حتى قربت للشجرة بزاف.. رجعت شفت فيهم ودرست حركاتهم كانو مكايشوفوش فالجهة اللي فيها أنا كانو مشغولين بلحفير..حسبت حد 3 وأنا نتخشا بخفة مور الشجرة وجلست وغمضت عيني كانتسنا نشوف واش سمعوني.. ساعة ماحسو بوالو.. جمعت شعري وخشيتو فالتيشورط اللي كنت لابسة باش مايبرزطنيش ولحسن حظي كنت لابسة سبرديلة يعني غاتسهل عليا الى بديت نجري.. بقيت لاسقة فديك الشجرة بلا حركة حتى حبسوا لحفير وبداو يهزو فالجثت ويلوحو فيهم حتى سالاوهم
الرجل1: واش هادو هوما لجثت كاملين؟
الرجل 2: هههههه هذا سؤال هذا أكيد كاملين
الرجل1:( كايضور عينيه فالمكان) ماعرفت حسيت بحال الى العدد ناقص
الرجل2: اصاحبي هادوا راهم جثت ماشي طيور عندهم الجناوح
الرجل1: مممم ههههه واقيلا غانولي حمق بحال دوك لخوت
الرجل2: شششششش واش ساخي بحياتك اش هاد لهدرة يالاه يالاه خلينا نرجعو نفدو داكشي اللي طلبات منا كاطا
الرجل1: okay, Go Go
من بعد ماتأكدت أن الرجال مشاو وخطواتهم مابقاتش كاتسمع حطيت راسي على الشجرة وبديت نبكي ودموع كايطيحوا بحال لحجر
أنا: الله ياربي واش هاد لوحلة هانا دبا هربت... أكيد وسط هاد الغابة غاياكلوني غير الحيوانات😢 فين غانهرب فين غانمشي؟ وهاد لخلا مزال منتاشرين فيه رجال مجد وسكينة.. ولكن هوما قالو الى مالقاونيش ليوم غايغبرو يعني غايبقاو يقلبو حتال الليل عاد يفقدو الأمل أنهم يلقاوني..اه اه غانبقا مخبية هنا تال الليل..الليل؟ ناااااري فهاد لغابة وفين؟ فأمريكا؟ الليل غاتكون القضية صعيبة دبا النهار وكاتخلع عاد الظلام..
بقيت كانتخبط فأفكاري حتى وصلت لقرار أخير اللي هو أنني نبقا مخبيا فبلاصتي حتال الليل ودوك لمجرمين يخويو هاد لبلاصة
الجوع..العطش..الخوف..الإشمئزاز من الدم اللي كرم على وجهي..العيا..هادوا هوما الأحاسيس اللي كنت كانحس بيهم ديك لعشية كاملة حتى بدا كايضلام الحال
#أمام_المستودع:
ماكس: البنت تمحا ليها الأثر من الصباح والرجال كايقلبو او والو مافهمتش كيدارت ليها ولكن نتوما السبب طيحتونا فمشكل كبير
مجد: سمحو ليا بزاف مافهمتش كيفاش رحمتها وحليت ليها رباطها
سكينة: غبي! خرجتي علينا ايوا تسنا دبا عواقب هاد التصرف اللي درتي
ماكس: صافي صافي سكتونا دبا ونتا ا ليو حسابي معاك من بعد..ماعرفتش كيفاش غاندير نقولها للرئيس اكيد غايقطع ليا راسي بسبابكم
سكينة: امتا غاتقولها ليه؟
ماكس: تال غدا فالصباح مايمكنش نزعجوا دبا
سكينة: اوكي المهم يالاه نمشيو
ماكس: اوكي سيرو لداركم وماديرو حتى شي حاجة .. غبرو وانتاظروا مني التعليمات
مجد وسكينة: اوكي شاف
#عند_أسماء:
اوف ياربي عييت مانجري وكانحس براسي مزال فنفس لبلاصة..بقيت كانجري تقريبا شي ساعتين وغريزة الحياة هي اللي مخليا رجليا باقين كايتحركو..خايفة لانموت غير بالجوع وسط هاد لخلا ومايسيق ليا حد لخبار
انا: ااااااااااااااااااااااه........حسيت باللي شي حاجة طلعات مع رجلي كانلقا واحد لحديدة طلعات مع السبرديلة من لتحت وخرجات من فوقها مللي شفت داك المنظر طحت وبقيت كانغوت على حر جهدي كان واحد الألم فضيع عمري حسيت بيه فحياتي حديدة ختارقات رجلي من لحت حتى خرجات من لفوق.. بقيت كانغوت وقررت أنني نجبدها..قطعت شوية من التيشورط ديالي وعضيت فداك التوب وشديت فيدك لحديدة وغمضت عيني وجريتها بالجهد حتى حسيت برجلي تفرعات والدم كايشرشر بديت نغغغغوت بحرقة ونتركل فالأرض حيت فعلا كانت صعيبة بزاف .. بقيت متكية فديك الأرض مدة طولة شوية نضت حيدت التيشورط كامل وحزمت بيه رجلي.. بقيت غير بالسوتيامات ولبست فوقهم لكويرة.. فرعني لبرد ديال بصح ولكن ألم رجلي كان كبير موحال واش غانقدر نكمل يمكن نهايتي غاتكون هنا غانبقا مرمية هنا حتى نموت وياكلني شي حيوان..
بقيت مدة وأنا فديك الحالة والدم ماحبسش من رجلي حسيت براسي بديت نعيا بزاف وسخفت بزاف بقاو قدامي جوج اختيارات يا اما نستسلم للألم ونبقا هنا حتى نموت ولا نوض نكمل اللي بديت..داز قدامي كاع داكشي اللي دوزت باش نهرب من لموت والجثت اللي كنت وسطهم وكيفاش خاطرت وتسلت من دوك الرجال..الى بقيت منشورة هنا غايمشي كاع جهدي فابور وكيما سبق ليا وقلت نموت وانا كانحاول..
نضت جلست بديت نضور عيني على شي عصا نعكز عليها باش نقد نتمشا.. بانتلي وحدة بديت كانحبو على ركابيا حتى وصلت ليها كانت مزيانة وبديت نغووت حتى وقفت وبديت غادة كانعرج كان ألم خطيييير..غادة فداك الظلام وحتى ضو ديال القمر مكاينش غادة وسط داك الشجر ونغوت برجلي ونبكي ونقرا لقرآن فنفسي ونطلب الله يحميني ويخرجني من هاد جهنم.. بقيت غادة مسافة حتى قشعت شي ضوء بحال ديال لبوطو للي كايكون فالشانطي .. جاتني واحد الطاقة بديت نعرج بالزربة ونضحك ونبكي حتى قربت وكان فعلا شانطي لكن خااااوي بقيت مكملة فطريقي حتى وصلت ليه ووقفت فجنبو
أنا: الحمد لله ياربي غا مللي شفت الضو الحمد لله
بقيت ساعات وأنا تما ووالو مكاينش حس البشر فديك لبلاصة رجلي ولات تحتها ضاية ديال الدم وأنا مابقيتش قادة نوقف حاسة بداتي كلها طالعة معاها صهدة وكانعرق بزاف بقيت هكاك حتى فقدت الوعي وطحت جنب الشانطي..
بعد_ثلاتة_أيام:
سهام: مسكينة مزال لحالة هي الحالة 3 أيام وهي فغيبوبة
فاطمة: واييه ماعرف اشنو داز على هاد البنت غا حالتها نهار جابها سيدي تعطيك لخبار..عمري نسا ديك الحالة
سهام: كانتمنى أنها تفيق..الطبيب قالينا أن سباب هاد الغيبوبة نفسي كثر ماهو جسدي
فاطمة: اه ا لالة والعجيب أنه مكاين لا اغتصاب لاوالو..
سهام: (كدوز يديها على شعر أسماء) اهئ اهئ ياربي بنتي ماتكونش كاتعاني بحال هاد البنت..
فاطمة: (كاتواسيها) صافي ا لالة دبا ترجع ليك ان شاء الله
سهام: احياااني ا فاطمة 4 سنين وبنتي غابرة راه بديت نفقد الأمل
فاطمة: لا ا لالة ماتقوليش هاكة المهم نوضي ترتاحي فبيتك راك عييتي ليوم
سهام: وخا وخلي بالك مع البنت لاتمشي تفيق
فاطمة: وخا ا لالة..
#في_الصباح:
بديت كانحل عيني على سقف رمادي وضورت عيني على غرفة فمتهى الروعة كانت فاللونين الرمادي والغوز بارد بقيت شحال وأنا كانستوعب
أنا: اه راسي .. فين أنا؟ واش صافي مت وأنا دبا فالجنة (انتابهت للسيروم اللي معلق فيدي) لا لا أنا عايشة ههه ولكن فين أنا وشنو هاد الغرفة باينة ماشي سبيطار.. ولكن! ولكن اخر مرة نعقل على راسي كنت فداك الشانطي اللي وسط ديك الغابة المشؤومة.. ورجلي؟ (حاولت نحرك رجلي وضراتني) اااي.. ياربي شكون جابني لهنا فين أنا.. ياكما فدار سكينة ومجد؟ ياربي اهئ اهئ اهئ ........تحل لباب ودخلات منو مرا بلباس الخدم كانت فتلاثينات زوينة ومبتسمة
فاطمة: (بالانجليزية) وأخيييييرا فقتي اختي
أنا: ش..شكون نتي؟
فاطمة: (بالدارجة) اوااااااه واش نتي مغربية؟
أنا: اه ..فين انا جاوبيني عفاك!
فاطمة: بلاتي واحد الدقيقة نجيب ليك اللي غايجاوبك على أسئلتك
أنا: بلاتي...يلاه بغيت نهضر لقيتها خرجات..نتابهت لحوايجي وحالتي..كنت نقية وفيا ريحة زوينة وشعري ممشوط.. ولابسة بيجامة فالأبيض دافية..بقيت جالسة كانتسنا الشخص اللي قالت ليا عليه هاد الخدامة حتى انتابهت للباب تحل..دخلات منو مرا تكون فأواخر الأربعينات لكن زوينة بزاف لابسة لباس عصري عبارة عن سروال توب وقميجة قصيرة ودايرة مشيطة لشعرها لأسود..
سهام: (بالدارجة) بنتي على سلامتك فرحت مللي سمعتك فقتي وفرحت أكثر مللي عرفتك مغربية (عنقاتني)
أنا: الله يسلمك.. فين أنا
سهام: أنا سميتي سهام ومغربية بحالك..نتي فداري ابنتي حيت قبل 3 أيام كان لقاك ولدي طايحة فالطريق فحالة صعيبة بزاف وجابك لهنا وجبنا ليك الطبيب..بغينا نتسناوك حتى تفيقي عادا نتاصلو بالبوليس باش تعاودي ليهم اش طرا معاك وشنو اللي وصلك لديك الحالة.. اه ورجلك راه كانت حالتها حالة لدرجة الطبيب تخلع من منضرها وطلب منا نحولوك للمستشفى لكن أنا أصريت انك تبقاي هنا مراعاتا لحالتك النفسية.. داكشي علاش داواها ليك هنا فالدار ودبا راه شوية كانضن
انا: 3 أيام وانا غايبة عن الوعي؟؟؟؟
سهام: اه ا بنتي ماكنتي كاتحسي بوالو راه دوشو ليك لخدامات والطبيب عطاك فيتامينات حيت كان جسمك ضعيف
انا: اهئ اهئ شكرا شكرا بزاف ا لالة الحمد لله مللي طحت بين يدين انسانة بحالك (تفكرت ان حتى مجد وسكينة عاونوني لكن فالآخر..) ودبا ممكن نمشي بحالي عفاك (كانحاول نوض وأنا خايفة)
سهام: ارتاحي ابنتي راك مزال عيانة.. اعطيني رقم واليديك نتاصل بيهم يجيو عندك راه غايكونو مخلوعين عليك
أنا: (بتهرب) اه..لا..لا لا راه نسيت رقمهم ماحافضاهش
سهام: اوكي عطيني العنوان
أنا: (بارتباك) لا لا راهم مكاينينش فأمريكا راه مسافرين
سهام: وخا ا بنتي المهم نخليك ترتاحي بنتيلي متوثرة ومللي تبغي تعاودي غاتلقايني معاك.. اه ويلا حتاجيتي شي حاجة وركي على هاد الزر ويطلعو عندك الخدم (بابتسامة) نخليك
انا: وخا شكرا.. بفففف ا أسماء لمرا باينة ضريفة لاش تعاملت معاها هاكة وكذبت عليها.. ولكن مزيان نيت نحيد هاد النية اللي فيا واللي كانت غاتقتلني.... مانعرف شكون هاد ولدها اللي عتقني اوووف يسحابلي غانبقا تما حتى نموت..
نضت جلست وعريت على رجلي اللي كانت ضايرة بيها الفاصمة تفكرت اللحظة اللي دخلات فيها ديك لحديدة لحمي بورش..حسيت براسي فيا الجوع وجاني راسي بحالا عام ماحطيت النعمة ففمي...أما جسمي فكان مرتااح بقيت متكية ولكن كرشي كاتغوت .. تفكرت داك الزر ترددت شوية ولكن وركت عليه..
من بعد ماضغطت الزر فرمشة عين دخلات عندي الخدامة اللي شفت أول مرة..
فاطمة: نعام ا ختي خاصك شي حاجة؟
أنا: مممم فيا الجوع
فاطمة: (بابتسامة) وخا أنا غانجيب ليك تاكلي.. أنا فاطمة ونتي؟
أنا: أنا..أنا ندى
فاطمة: سميتك زوينة بحالك أنا غانمشي نجيب لماكلة..
نزلات فاطمة وأنا بقيت كانضور فعيني ونتساءل علاش كذبت عليها فسميتي.. ولكن أنا قررت عمري مزال غانتيق فشي واحد كيفما كان نوعو حيت اللي داز عليا مع دوك الجوج عمري نساه..من بعد شي دقائق رجعات عندي فاطمة وفيديها بلاطو حطاتو فجنبي
فاطمة: كانتمنى يعجبك.. كولي راه 3 أيام ونتي عايشة غابالسيروم
أنا: شكرا بزاف
فاطمة: المهم نخليك فراحتك وراه الدوش هو هادا وراه حطيت ليك شي حوايج فالماريو
أنا: (تفكرت نفس معاملة مجد وسكينة وخالتي نعيمة) صافي صافي خرجي عفاك
فاطمة:( باستغراب ) وخا سمحيلي
من بعد ماخرجات ديك لخدامة كليت مزيان وبردت قلبي وقررت أنني ندخل ندوش..نضت وأنا كانعرج دخلت للحمام اللي كان فنفس لون البيت.. أول حاجة شفت فيها هي لمراية.. كان تحت عيني زرق ولباقي فأنا هي أنا.. يالاه بغيت نحيد حوايجي وأنا نشوف رجلي اللي فيها لفاصمة.. درت بناقص غسلت غا وجهي وخرجت كانمسح فيه حتى ضرباتني شي حاجة لراس
أنا: اااااي (شادة فراسي)
الصوت: ههههههههههه واااا ههههههههههههه سمحيلي
هزيت راسي لقيت بنت قدامي شعرها قصير وصابغاه صفر ولابسة كسوة بيضة مفرفرة ولكن هاد لبنت كانت قزمة.. وهادشي باين فملاميحها والقصورية لمفرطة ديالها
أنا: شكون نتي ولاش ضربتيني بهاد اللعبة؟
لبنت: ومالك ياختي كاتقلبي عليا فعينيك بفف... أنا كرزة
أنا: هههه واسمية عندك
كرزة: ومالها كيجاتك ؟ نتي اش سميتك
أنا: ندى
كرزة: ممممم مجاتش معاك.. أصلا مبقاتش فالطولة بقات فلعقل
أنا: هي أنا بنت ليك حمقة
كرزة: مول لفز كايقفز
سهام: (حلات لباب ودخلات) كرززززززة!
كرزة نقزات من بلاصتها وتخبات مورايا
كرزة: واللللللله مادرت ليها شي حاجة غير بغيت نتعرف عليها مللي سمعتها فاقت
سهام: سمحيلي ا بنتي الى صدعاتك راها ماكاتسكتش من لهدرة
أنا: لا لا ماشي مشكل ا لالة
سهام: عيطيلي غير سهام ولا خالتي بلا هاد لالة.. راه قالتلي فاطمة سميتك ندى.. تبارك الله سميتك زوينة
أنا: الله يزين يامك
سهام: يالاه ا ندى بدلي حوايجك باش نهبطو لتحت
أنا: (بارتباك) لا غاخليني هنا
سهام: لا ابنتي راه خصك تجلسي معانا ماتبقايش بوحدك .. بالحق مانبزز عليك والو
أنا: واخا أنا نلبس ونهبط
سهام: وخا هاهي كرزة معاك تهبطك (شافت فكرزة) ونتي ديري عقلك ونقصي من الطيران
كرزة: وصافي صافي غاسيري
خرجات سهام وبقيت ساهية حتى فيقاتني كرزة
كرزة: راه اللبس فالماريو
شفت فيها بالامبالاة ومشيت فتحت لماريو اللي كان عامر حوايج جبدت تريكو فالغوز وسروال فضفاض فلبيض حيت لمزير ماغايبغيش يطلعلي مع رجلي اللي مضروبة وبانطوفة فالغوز على شكل نونوس
أنا: بغيت نبدل
كرزة: وبدلي شكون حبسك
انا: واش غاتبقاي تفرجي فيا
كرزة: هههههههه على زينك راه اللي عندي عندك ولا ياكما عندك المسائل مصنوعين من الذهب
أنا: (بصدمة وحشمة وتلعثم) واش نتي ماكاتحشميش أنا غانعيط على ديك لمرا هي اللي بانتلي كاتعرف ليك
كرزة: هاديك لمرا سميتها سهام ... (خارجة) هانا كانتسناك قدام الباب.. خرجات وسدات الباب
أنا: بففففففف على لسقة
كرزة: (حلات الباب)
سمعتتتتتك
لبست دوك لحوايج وجمعت شعري على شكل كعكة مهملة ومشيت حليت لباب لقيت كرزة واقفة كاتسناني
كرزة: زيدي تبعيني..
بقيت تابعاها وأنا حاسة براسي فقصر هبطنا فالدروج وأنا كانحاول نعرف فين أنا حتى كانلقا راسي فعلا فقصر كان كبييييير وفيه بزاف ديال الصالونات فلألوان والأشكال بقيت غا حالة فمي
سهام: بنتي جيتي اجي مرحبا بيك..تبعتها حتى طلبات مني نجلس فصالون فاللونين لأسود والأحمر كان عصري وفيه باب كاتبان منو الجردة اللي فيها مسبح كبير
أنا: ممكن نهضر معاك
سهام: أكيد حنا نزلنا هنا باش نهضرو..دارت حركة بعينيها لكرزة باش تخلينا بوحدنا
أنا: بغيت نعرف كيفاش جيت هنا وكيفاش لقاني ولدك
سهام: ا بنتي كانت شي ل5 ديال الصباح دخل ولدي هازك وكايعيط على لخدم يتاصلوا بالطبيب .. غواتو فيقني وملي نزلت سولتو شكون نتي قالي بللي كان جاي من السفر ديالو ولقاك جنب الطريق نزل وقلبك لقاك مزال عايشة فقرر أنه يعتقك.. هادشي اللي كاين ا بنتي
أنا: جاني كلامها حنين وصادق.. امرأة راقية فطريقة هضرتها وتصرفاتها.....شكرا بزاف على المساعدة ديالك وسمحولي عذبتكم معايا.. وكانتمنى تشكري ولدك بزاف
سهام: لا لا بلاما تشكريني أي واحد فبلاصتنا كان غايعاونك ونتي فديك الحالة..دبا ا ندى قوليلي شنو قصتك واش وصلك لتما بوحدك
أنا: (تفكرت اللي داز عليا وبداو الدموع) عفاك مامستعداش نهضر فهاد الموضوع..ممكن؟
سهام: أكيد خودي راحتك غير هو الى كانو شي ولاد لحرام هوما اللي حاولو يتعداو عليك فخصنا نعلمو البوليس
أنا: فكرت نعلم لبوليس بديك المنظمة المتوحشة ولكن خفت 😢 بنت ضعيفة بحالي هي اللي غاتبلغ بمنظمة قد السخط ..ياربي غا مللي هربت ماخصني مشاكل
انا: لا ماشي دبا من بعد.. عفاك كانتمنا تنساي هاد الموضوع
سهام: اللي بغيتي..
بقينا جالسين شوية حتى دخل شاب زوين كان بيض وملاميحو كحلين ومعاه بنت زعرا..داخلين كايضحكو ويتغامزو
الشاب: أحسن خالة فالعالم توحشتك
سهام: ممممممم لا باينة نتا غير كاتشوف هاد الشيطانة تاتقلب على كلشي ...... لاحضات سهام نضراتي اللي كاتبين انني مفاهمة والو..
سهام: بنتي هذا ولد لوسي سفيان وهادي خطيبتو فيرجينيا..هههه راهم حماق..(وجهات لهدرة ليهم) هادي هي لبنت اللي قلت ليكم لقيناها مريضة وراها مغربية
سفيان: (مد ليا يدو) أهلا...أ...
سهام: ندى
سفيان: أهلا ندى الحمد لله على سلامتك
أنا: (بادلتو السلام) الله يسلمك متشرفين
فيرجينيا: hello (مع ابتسامة)
أنا: hello
سفيان: خالتي فين ماما
سهام: راها خرجات تقدا شي حوايج
سفيان: اوكي هانا طالع لبيتي مللي تجي قوليها طلع عندي..
سهام: بنتي نوضي تمشاي فالجردة وشمي لهوا كاتبانيلي مخنوقة
أنا: يالاه كنت غانسولك واش ممكن نخرج للجردة
سهام: أكيييييد وبلاما تشاوري معايا المهم أنا غانقولك شكون ساكن هنا كاينة أنا وولدي اللي قليل فاش كايجي .كاين مرت لوسي وولدها سفيان وبنتها لينا..وكرزة والخدم
أنا: اكتفيت بابتسامة ونضت وقفت
سهام: بلاتي نعيط على كرزة تخرج معاك
أنا: لا لا بغيت نبقا بوحدي..خرجت من داك الباب اللي فالصالون ولقيت قدامي جنة ماشي جردة كانت كبيرة وزوينة بزاف وكايتوسطها مسبح كبير..بقيت غادة كانتمشى وساهية فالمنظر الزوين اللي قدامي حتى بانتلي واحد الأرجوحة فرحت مللي شفتها حيت مللي كنت صغيرة مكانتش كاتخليني مي رقية نلعب.. مشيت جيهتها وركبت فيها وبديت نلعب من نيتي وماهماتنيش رجلي بقيت كانزيد فالسرعة حتى زلقت منها وتلاحيت ساعة لقيت راسي ماطحتش على الأرض كنت ناعسة فوق شي حاجة فشكل مللي فتحت عيني ... لقيت عينين كايشوفو فيا كانو زرقين .. تفكرت عينين مجد وانا نبدا نغوت على حر جهدي ونتركل ونضت باغا نهرب حتى شداتني يد وكرمت فبلاصي بالخلعة
الشخص: (بالإنجليزية) واش نتي حمقة ولا مالك اش هاد التبرهيش لخاوي!
جاني الصوت ماشي صوت مجد عرفت راسي قفرتها بديت كانضور بالعرض البطيء حتى شفت فيه..
اححححح كان طويل وعضلاتو بارزين لابس لباس أسود.. شعر أسود رطب مرجعو لور ولحية خفيفة مطراسية عينين زرقين وحجبان كثيفين ومقادين ومغوبشين .. فم مطراسي😯 خلاصة الحديث أبكص بوكوص شفت فحياتي
الشخص: واش حمقة وزيزونة؟
أنا: لا.. انا..يسحابلي..مج... لا.. دبا
الشخص: (بالدارجة لكن معكلة) ومغربية مكلخة من لفوق
أنا: سمحلي ماقصدتش نطيح عليك كنت غير كانلعب و..
الشخص: (طلق يدي وضربني بكتفو وزاد 😠خلاني بلاكة)
انا: ا ربي السلامة الى كان الزين وقلة الأداب بلاش منو كاع... ولكن تا انا مادرت فيها مايتشاف طايحة عليه وكالسة نبرح من لفوق بفففف😕
#فالصالون:
سهام: أسد..ولدي جيتي (ناضت عنقانو)
أسد: ماما (بادلها العناق) لباس عليك؟
سهام: لباااس اولدي كيدرتي مع لخدمة؟ اه راه البنت اللي جبتي فاقت
أسد: اه مزيان وكيبقات
سهام: شوية باين عليها متضررة نفسيا راه خليتها تخرج للجردة
أسد: (ديك البرهوشة هي البنت اللي جبت) صافي.. المهم هانا طالع نرتاح بلاما تعيطو ليا بليز
سهام: صافي غير طلع ترتاح
#عند_أسماء:
شكون هادا ياكما ولد المدام حيت هي قالتلي باللي عندها ولد واحد اذن غايكون هو اللي لقاني.. المهم نمشي نرجع لبيتي نتكمش.. ولكن تال امتا؟ واش أنا غانبقا لاسقة فالناس خصني نشوف شي حل لراسي.. ولكن انا حتى الانجليزية مكانفهمهاش كيغاندير نعيش هنا .. اهئ اهئ بغيت نرجع لبلادي ماعندي ماندير فهاد لبلاد اللي مكانعرف فيها حد..