نزلنا فالدروج فاتجاه الجردة فين كاينة الطوموبيل ديال سكينة خرجنا وركبات سكينة فالطوموبيل ويالاه بغيت نحل لباب حتى سورتاتو عليا من لداخل وخلاتني برا .. تصدمت من هادشي وبقيت كانشوف فيها من الزاج وهي تهبطو
سكينة: سمسومتي أنا غادة للحفلة ولكن غابوحدي
أنا:وأنا؟؟؟
الشخص: نتي غاتمشي معايا..ضرت نشوف شكون هضر كانلقاه مجد ببدلة رسمية فلبلو مارين وقاميجة فلبيض وبابيون فالأزرق فاتح بحال لون عينيه كان موقف شعرو بطريقة مثيرة ورائحة العطر ديالو تغلغلات فأنفاسي أما الطولة والعضلات يا مامي بلاما نهضرو عليهم المهم بان كايهبل
أنا: مجد!.... شد ليا فيدي وبقا غادي بيا حتى ركبني فسيارتو ودار بيدو باي باي لسكينة اللي بادلاتو نفس الحركة ومشات وحتى هو ديمارا الطوموبيل وبقينا غاديين
أنا: ف..ف..فين غاديين؟ بتاسم ومشافش فيا بقا غادي مركز فالطريق وأنا قلبي كايضرب بالجهد وخايفة من هادشي اللي واقع واللي ممكن أنه يوقع..على بعد شي نصف ساعة ديال الطريق وقف مجد الطوموبيل وخرج منها وجا حل ليا الباب ومد يديه بكل جنتلمانية
مجد: تفضلي معايا ميس أسماء.. مديت يدي وحاولت نبين راسي مخايفاش والموقف ديال لبارح مزال كايضورلي فراسي وكانعاتب سكينة فنفسي حيت دارت ليا هاد القالب اللي ماعرفتش شنو الهدف منو.. طلق مني وسد الطوموبيل حتى كانلقا راسي قدام مطعم باين فيه راقي وديال الناس الهاي دار ليا بيدو زعمة دخلي.. دخلت معاه بخطوات كلها ثقة ومابغيتش نبان نية وغشيمة وماعارفة والو..كان المطعم خاوي وبانتلي طبلة لوسط مزينة بالشموع وموسيقى هادئة توجهنا لديك الطبلة..جر ليا لكرسي وجلست وهو مشا جلس مقابل معايا بقينا شوف فيا نشوف فيك ا طاجين الحوت ههههه شوية مجد قطع حبال الصمت
مجد: أسماء.. عارفك دبا مفاهمة والو وكاتسولي راسك علاش حنا هنا وعلاش سكينة دارت هاكا وكذبات عليك (سكت شوية) أسماء أولا أنا اللي طلبت سكينة تعاوني حيت من بعد التصرف اللي درت لبارح أكيد كنتي غاترفضي طلبي كون طلبتو منك ثانيا أنا جبتك هنا باش نعتاذر منك أنا ماشي هكاك وأنا مافياش داك التبرهيش أنا لبارح جيت نوريك فين كاين السكر حتى شفتك محنية بطريقة جدباتني و معرفتش كيفاش حتى قربت ليك هكاك و..و...
أسماء: اهاه وثالتا؟
مجد: جيتي زوينة بزاف 😍...حشمت وبقيت كانشوف قدامي وكانحس بقلبي غايخرج من بلاصتو
مجد: ورابعا؟
أنا: (غفلني وبغيت نبين راسي مامرتابكاش) اه ورابعا ؟!
مجد: أسماء..تزوجي بيا؟!
واطلي عليا يااااااامي رقية وطلو عليا ياجيران مي رقية واطلو عليا ياااالخياطة وفينك ااااا با منصور مول صايكوك واش سمعتو داكشي اللي سمعت ولا غاجاب ليا الله..مجد الطبيب مول لفيلا الزعر مول لعينين زرقين طلب مني الزواج ماقديتش نتيق راسي ..هادشي كامل قلتو فنفسي وهو مزال كايشوف فيا من بعد ماسالا هضرتو أنا بقيت مخرجة فيه عينيا بعم تصديق
مجد: مالكي تصدمتي واش قلت شي حاجة خايبة؟
أنا: ا لا اه زعمة بغيت نقول بلي
مجد: اش؟
أنا: لا بغيت نقول واش هنا كايبيعو الفول مشرمل والبقولة
مجد: 😨
أنا:😨
مجد: ههههههههههههههههههههههههههههههههههههههههههههه لبقولة؟ هههههههههههههههههههههههههه
بقيت مبلوكية وتمنيت الأرض تحل ونتخشا وسطها اوييييلي السيد طلب مني الزواج وأنا جاوبتو بالفول مشرمل والبقولة اويلي على شوهتي...بقا مجد كايضحك بالدموع ويكحب وأنا غاكانشوف فيه فالصراحة بزاف عليا هاد الزين كلو..لاحظني كانشوف فيه وبدا كايسكت تدريجيا حتى سكت وكايمسح فالدموع اللي جنب عينيه
مجد: اووووف ا أسماء سطيتيني بالضحك والله ههه
أنا: بصحتك😊
مجد: عارف جوابك كان غير نتيجة للصدمة أنا عارف راسي زربت ولكن مانادمش أنا من نهار شفتك مشعكة ولابسة ديك الجلابة لكحلة عجبتيني بعينيك اللي كايهبلو وشوفاتك وبرائتك كلهم عجبوني وملي رجعت من داك لغرض ولقيتك مزال تما فرحت وقلت مستحيل نخليك أما مللي دخلتي لدارنا وكسبتي ختي وخالتي نعيمة زدتي كبرتي فعيني بغض النضر على الجمال ديالك اللي زاد بان مللي وليتي كاتلبسي وتقادي هه.. أما بالنسبة لهاد القرار المزروب فخديتوا حيت خفت نفيق ومانلقاكش حيت عرفت بللي التصرف ديالي زعجك بزاف ودبا أ أسماء بغيتك...
أنا: (بمقاطعة) اه موافقة..معرفتش كيفاش حتى خرجات هاد الكلمة من فمي ولكن كانضن أنني درت الصح حيت الى رفضت غانكون حمارة واش كاينة شي وحدة تقدر ترفض انسان بحال مجد خصوصا الى كانت بحالي لا مستوى فلقراية لا عائلة لا والو (لا لا الزين كاين تبارك الله هههه) وخا بقا راسي ضارني كيفاش دغيا خدا هاد القرار وخا هو يالاه يومين باش عرفني ...من بعد الجواب ديالي ناض مجد اتجاهي ووقفني وباس ليا راسي بوسة طوييلة ورجع شاف فيا بعنين ضاحكين كايلمعو
مجد: أسماء شكرا بزاف على جوابك وكانواعك غانعيشك اللي عمرك عشتيه وغانتهلا فيك (هه ومزيان) غير تيقي بيا..كتافيت بابتسامة حيت مالقيت مانقول ورجعنا لبلايصنا وطلب مجد لعشا وحطوه لينا..بدينا ناكلو فصمت خلينا غير العينين هوما اللي كايهضرو..
أنت تقرأ
حب وسط الدماء
Horrorقصة مغربية تحكي عن معاناة شابة و العذاب الذي مرت به و فقدانها التقة في البشر ... بعدما تقراو القصة تعرفوا علاش
