حب وسط الدماء

part 5

صبح الصباح فقت بكري كيف العادة تفكرت مي رقية كيفاش غاتكون فكات حريرتها مع بامنصور ولكن تستاهل هي بغات تهنا مني هاهي تهنات مني فمرة ولكن وخا هكاك عزيزة عليا كاتبقا هي اللي كبراتني ورباتني حتى درت 19 سنة وخا لعيشة ماهي عيشة ولكن المهم حماتني وخلاتني فدارها هاد المدة كاملة..بقيت متكية فبلاصتي حتى دخلات عندي سكينة
سكينة: أسماء أسماء أسماء (تحية لندى مللي كاتبغي تقولي شي تبركيكة ههههه)
أنا: (مفزوعة) اشنو مالكي ناااري طيرتيها مني
سكينة: نوضي نوضي جمعي لوقفة ليوم عارضة عليا صاحبتي لعيد ميلادها وبغيتك تمشي معايا ضرووووري
أنا: ولكن أنا مكانعرفهاش وعمري حضرت لشي حفلة
سكينة: يا لهبيلة كاتعرفيني أنا وهادي هي الفرصة تحضري
جراتني من لفراش ولاحت عليا سروال ومونطو وصباط عالي وطلبات مني نلبس بالزربة.. نضت على وعدي وسعدي غسلت وجهي ولبست داكشي والصباط تمشيت بيه عادي بحالا مولفا نلبس طالون ههه خليت شعري على راحتو وأول مرة ندير لماكياج اللي كتافيت فيه بماسكارا وغلوس فلغوز بحال لون المونطو والسباط أما السروال فكان كحل وسامبل..نزلت فالدروج وأنا كانشوف فالفيلا اللي قررت نخويها غدا حيت ليوم بغيت ندوزو مع سكينة وغدا غانخوي هاد الدار حيت ماعندي حتى حق يخليني نزيد نبقا فيها مزال..ماعارفاش فين غانمشي وفين غانسكن ولكن اللي عارفة أنه بعد الموقف ديال البارح خصني ضروري نخللي هاد لبلاصة..نزلت لقيت سكينة كاتسناني للفطور ونعيمة كاتوجد لينا طبلة أما مجد فمكاينش ليه الأثر
أنا: صباح النور عليكم
نعيمة وسكينة: صباح الخير
سكينة: واسربي اجي نفطرو راه مزال تابعنا نهار طويل اشيغي
أنا: واخة..فطرنا وكملنا وتحركنا للطوموبيل داتني سوكا لواحد لمحال كايبيع كساوي ديال السهرات وطلبات أنها تختار ليا وليها وبقات جاراني وتشوف هنا وهنا حتى حطات عينيها على كسوة فلحمر قصيرة عندها كم وكم لا
سكينة: واااااو سمسومة شوفي هادي غاتجيك واعرة مع طايتك أنا متأكدة جبداتها وطلبات مني نقيسها..دخلت قيستها وحسيت براسي فشكل أول مرة نلبس هاد لعرى ولكن حمقني راسي بديت نتبوزا غا بوحدي حتا سمعت سكينة كاتعيط وخرجت عندها
سكينة: 😍😍 ناري ليوما الطايح كتر من النايض واو واو جاتك واعرة بزاف
أنا: عويناتك اللي زوينين ودوقك اللي زوين يخليك ليلي.. ونتي شنو غاتلبسي؟
سكينة: أنا غانلبس ديك لبيضة اللي شرينا لبارح من المول.. ودبا طلقينا نمشيو لbeauty center باش نقادو الحالة..
ركبنا تاني فالطوموبيل ودخلنا لواحد لمركز ديال التجميل كبير بقيت غا حالة فيه فمي😲
جروني شي بنات باينة عليهم خدامين تما دخلوني فركوني من بعد دخلوني لواحد لبلاصة وعراوني وبداو يحيدو ليا الشعر من لحمي كامل وخا أنا عندي خفيف بديت نتألم وعينيا كايدمعو وحشمت منهم وجاني هادشي فشكل حيت مموالفاش بيه المهم سالاو وردوني كانشقشق بلبيوضا ههههه عاود داوني لبلاصة خرى لقيت فيها سكينة كايديرو ليها فالمساج تكيت حتى أنا وداره ليا واو واو على راحة من بعد جاو بنات تكلفو لينا بالأضافر ديالنا عااااد دزنا للشعر سولني لكوافور واش نقطعو قلت ليه لا المهم صايبو ليا بوكلي وقطع ليا لgسة ديكرادي طويلة من بعد داز قاد ليا لحجبان وصايب ليا ماكياج اللي أصريت أنه يكون خفيف متكون من كريم أساس وماسكارا وايلاينر وفاراجو هادئ ولعكر قلت ليه حتى نلبس ونديرو.. أما سكينة فصايبات شعرها سامبل وماكياج بحال ديالي غير هي دارت لعكر من دابا.. سالينا وخلصات سكينة وخرجنا وأنا كتنقول فخاطري ميمتي شحال خسرات عليا مسكينة.. توجهنا للدار لقينا خالتي نعيمة موجدة لينا لغدا اللي هو بسطيلة بالحوت واااع دخلنا فيها طول وعرض كان ديك الساعة 16:00 قالت ليا سكينة نمشي نرتاح ومع 20:00 تعيطلي باش نمشيو.. طلعت لبيتي حيدت عليا لحوايج وجبدت لكسوة بقيت كانتمنضر فيها نضت جبدت ليها صباط عالي فلحل من اللي شرينا لبارح ومونطو كحل قصير على حساب لبرد وبوشيط صغيرة فالذهبي وخا ماعندي ماندير فيها هه (تحية لشيماء اللي كاتعمر الصاك بلحوايج باش يبان منفوخ ههه) صافي وجدت داكشي و بقيت جالسة نحسب فلوقت مابغيتش نعس باش مايتخسرش ليا وجهي وأنا مغانعرفش نصايب الآي لاينر بقيت هاكاك حتى وصلات 19:00 وهادشي كامل و مجد لا أثر ليه فالفيلا نضت لبست لكسوة مع ليبا موس كحلين ولبست السباط مشيت جلست قدام لمراية جمعت شعري بواحد لقريرصة اللور والباقي بقا مطلوق حتى لحد خصري وغطا ضهري كامل حيت قوي وطويل وجا بوكلي وقاديت لgسيسة جنب ودرت عكر حمر فلون لكسوة ماط ورشيت بارفان درت عليا لمونطو وهزيت لبوشيط وبقيت كاندور فالبيت ونشوف فلمراية كيشي حمقة..واش هادي أسما بنت رقية لا لا لا مايمكنش ونضحك ونمثل بوحدي حتى دخلات عليا سكينة بكسوة حد الركبة فلبيض مزيرة من جهة الصدر ومن لتحت مفرفرة وسباط فلبيج عالي مع بوشيط فنفس اللون أما شعرها فجامعاه ديل حصان ومكياج نفسو اللي دارت فالسونطر
سكينة: ختي كلميلي أسماء
أنا: هههههههه الله يمسخك دغيا نكرتيني
سكينة: ناري أنا بنت وطيحتيني واش شفتي راسك كيجيتي
أنا: صافي صافي حشمتيني حتى نتي جيتي زوينة بزاف
سكينة: شكرا شكرا ايوة يالاه نمشيو بلاما نتعطلو عليهم يااي ليوما لقصارة
أنا: ههه الله يخرج هاد الليلة على خير راني عمري عشت هادشي