حب وسط الدماء

البارت 28

كرزة: أسماء
أنا: (مزال ساهية) مممممم
كرزة: تكلمي لأسد
أنا: هاااااا 😍 فيناهو؟
كرزة: لفوق
أنا: اوكي..
طلعت كاندردك للطابق الثاني ومشيت قدام باب بيتو كاندق الساعة ماجاوبني حد وأنا نفتح الباب بشوية وطليت مابانش ليا..دخلت كانتسلت ونضور فعيني حتى حسيت براسي تهزيت..
أنا: واااااع حطني هههههه
كان أسد لاوي عليه فوطة وشعرو فازك.. هزني حتى وصل راسو لكرشي وكايهرني بوجهو بحال الدراري الصغار
أنا: وا طلق ههههه طلق إلا الهران لا
أسد: ماسوقيش ليوم غاناكل كريشة حبيبي ههههههه (كايهرني بفمو فكرشي)
أنا: ولااااا 😂😂😂😂
بديت نفركل حتى طحنا بزوج فوق الناموسية...جا هو على ضهرو وأنا فوق منو.. ووجهي على وجهو..شعري غطانا بزوج
أسد: عقلتي على هاد الطيحة..هاكا شفت عينيك أول مرة
أنا: اه عاقلة
أسد: تواحشتك بزاف....عام دوزتو عذاب ..ديما صورتك فبالي وكانحسب الأيام غير باش نشوفك
أنا: حتى أنا والله..تعذبت بزاف بلا بيك..عام ماشي قليلة..عمرنا غانعاودو نتفارقو ياك
أسد: لا أبدا...داكشي للي كان ممكن يفارقنا دوزناه..ودبا أنا حر وبريء..غانتفرغ ليك ولخدمتي ولعائلتي
بقينا فنفش الوضعية حتى بدينا كانقربو شفايفنا لبعضياتنا..يالاه غمضنا عينينا وهو يقفزنا الدقان فالباب
أسد: بففففف شكون
كرزة: هبطو تغداو 😊
أسد: تاكلي جنابك
أنا: هههههههههههه😂😂هههههههههههه
أسد: مالك
أنا: اويلي على تاكلي جنابك😂 حتى نتا كاتعرف لهادشي
أسد: 😒 ومالي كيجيتك
أنا: ناااري جيتيني بحال كرزة فهاد اللحظة
أسد: (خرج فيا عينيه)
أنا: (بستو فنيفو) كانبغيك (ضربتها بجرية حتى خرجت من بيتو)
أسد: هه حمقة
بعد مانزل أسد تجمعنا كاملين على الطابلة..بقينا كانتعاودو على كاع هاد المدة للي دازت وحنا مفارقين وشنو طرا فيها.الصراحة كلشي كايبقا غير تعاويد..
أسد: المهم خصنا نرجعو للمغرب أنا كرهت هاد الجو ديال أمريكا والله
سهام: حتى أنا ا ولدي...نوجدو راسنا باش غدا نرجعو فطائرتنا الخاصة
أسد: اه داكشي
سهام: (شافت فيا) راه عندنا شلا مانقضيو فالمغرب
أنا: 😇
كلينا وسالينا وكل واحد طلع لبيتو يرتاح..طلعت لبيتي دوشت ولبست قميجة فلبيض قصيرة خشيتها فشورط قصير فلكرونة وبالغين بيضة..سرحت شعري ودورتو جنب..درت ماكياج خفيف ، آيلاينر وفاراجو وعكر بارد..وبديت نطل من لبالكون حتى سمعت ميساج فتيليفوني...لقيت فيه أنه خصني نزل للجردة لتحت..قلت مايكون غير أسد ولا كرزة..داكشي للي درت نزلت حدا لباب كانقلب بعيني حتى حسيت بشي واحد شدني وسد ليا فمي وشي واحد غطا ليا عينيا وجروني حتى خشاوني فشي طوموبيل..بغيت نغوت لكن فمي كان مسدود..بديت نتركل ونقاوم لكن كانو صحاح بزاف..تحركات الكوموبيل مسااافة وهوما شاديني... أنا كنت غانسخف بالخلعة حتى شوية وقفات الطوموبيل...خرجوني منها وزادو..حيدت لغطا للي على عيني بالزربة حتى كانلقا راسي وسط غابة.. بقيت كانشوف مزيان فيها.. أواه مايمكنش..فهاد لبلاصة بالضبط كنت واقفة كانتسنى شي واحد يجي يعتقني مللي هربت من المستودع..مايمكنش....شكون غايكون جابني هنا وعلاش..بقيت واقفة شادة فالسنسلة للي فعنقي وعرقت من جبهتي بالخلعة حتى سمعت شي صوت فالسما..هزيت راسي بانتلي واحد الطيارة صغيرة مكتوب فيها بالأحمر "حب وسط الدماء" بقيت كانشوف فيها مافهمت والو كيفاش حب وسط الدماء..
أسد: حبنا كان حب وسط الدماء أولا!
سمعت صوتو مورا وذني وأنا نحس براحة كبيرة حيت كنت خايفة بزاف..جيت نضور لقيتو محني على ركبتو بلباس رسمي وهاز خاتم ألماسي فيدو ..حطيت يدي على فمي بالصدمة..
أسد: أسماء..تزوجي بيا؟
أنا: (غرغرو عينيا) اه...اه نتزوج بيك..
غير قلتها وديك الطيارة بدات ترمي علينا الورد حمر من الفوق..بديت نضحك وهو يشد أسد يدي وركب ليا الخاتم وباس ليا يدي من الجهات بزوج وناض هزني وبقا يدور بيا وأنا معنقاه وكانضحك...حمق هذا يالاه خرج من الحبس غا الصباح ودغيا دار ليا فيلم هندي..عندو كلشي خف من البرق..
أنا: (مزال هازني وكايضور بيا) أسااااد واش مازربتيش
أسد: أنا راه ماكرهتش كون طلبت منك الزواج قدام الحبس غا حشمت
أنا: هبطني هبطني بعدا...
أسد: (هبطني)
أنا: (كانخنزر فيه) اش هاد الطريقة باش جبتيني ومالقيتي غير هاد لبلاصة للي عشت فيها أخيب ذكرى
أسد: أنا بغيت نطلب منك الزواج بطريقة مميزة وفمكان مميز خلينا من المطاعم ولبحر وداكشي
أنا: دبا حبنا حب وسط الدماء😒
أسد: ومالكي تكذبي ..ياك من نهار عرفتك وحنا غا وسط الدم هههه وحتى نهار لقيتك هنا لقيتك غارقة فدماياتك
أنا: صافي صافي بلاما تفكرني
أسد: أنا فرحان حيت قبلتي تكوني مراتي..كانواعدك أنني غانعوضك على أي حاجة خايبة دوزتي فحياتك ا حبيبي
أنا: حتى أنا غاندير كل مافجهدي باش نكون ليك أحسن زوجة
باس ليا أسد راسي وعنقني..بقينا شوية وهو يجي لينا الشيفور وصلنا للدار لقيناهم مجموعين وخبرناهم بللي صافي تافقنا على الزواج..وريتهم الخاتم وعجبهم بزاف كان خفيف وزوين
سهام: الله على فرحة دبا مابقى لينا غير نرجعو للمغرب باش نديرو شي عراسية
أسد: وا ثلاااتة لعراسيات
سهام: علاش ثلاتة
أسد: أنا وأسماء..كرزة وأسامة..و شيماء وحسام
سهام: كيفاااااش؟؟؟
أسد: اه ا ماما..حسام كايبغي شيماء وراه هضر معايا فهاد الموضوع..وكانظن حتى شيماء موافقة😉
سهام:(شافت فشيماء) واش بصح هادشي؟
شيماء : (بخجل) اه ا ماما
سهام: اياااااه وأنا آخر من يعلم ايوا الله يرضي عليكم ا وليداتي
شيماء: وصافي ا ماما.. اجي معايا نعاود ليك..
شيماء جرات ماماها بخجل وداتها تعاود ليها وأنا بقيت مع أسد وكرزة..غمزني أسد ودارليا حركة بعينيه باش نشدو فكرزة..مشينا شديناها وجريناها للصالون وحطينيها وسطنا😂
كرزة: 😱 ها مالكم
أسد: عاودي لينا كيفاش حتى طيحتي أسامة فشباكك هااا دوي😉
كرزة: ايوا كيما كاتعرفو أنا زينة وكانضرب اللبس ولميني ايوا صافي تزعط السيد ماشي لخاطرو
أنا: 😂😂😂😂😂😂
أسد: أهاه وكليتو شي حلوة ولا والو
أنا: أسد 😨
كرزة: امالكي مصدومة ويلي عادي كوني كول... ايوا اش نقولك دبا النهار الأول دفعت كبير مانكذبش عليكم ولكن من بعد كنت مشيت ولقيتو خارج من الدوش و....
أسد: هيه هيه هيه اش هاد لبسالة ياكما درتيها بصح..بنتي ليا ضسرتي واقيلة تواحشتي لعصا
كرزة: ولكن راه نتا للي...
أسد: ماتجاوبيش معايا..بسالة كيدايرة
ناض أسد جمع لوقفة..غمزني وضحك ومشا طلع لبيتو وخلا كرزة وجها صفر ماعرفات باش تبلات
أنا: وييييييع وااااا هههههههههخخخخخخخخخ
كرزة: كاضحكي ا بزازل الكلبة (تحية لشيماء😂) ولكن انا للي حمارة دايرة فيكم راسي يخخخ وليت على آخر يامي نتقمع
أنا: الصراحة هو للي كايعرف ليك..اجي شفتو يضور يضور يقولك واش تواحشتي لعصا واش كان كايعصيك
كرزة: 😒 اه....كنت ضاسرة عليه فالأول وواحد المرة شدني سلخني بقا عليا غا للطرمة حتى 3 أيام مابقيت قادة نجلس على قاعي😢
أنا: وااااااا ههههههههههههههه لا بزاف ولاهيلة الله يعطيه الصحة حبيبي ديالي كاينتاقم ليا منك
كرزة: (كاتعيب فيا) حبيبي ديالي ... ايوا هاكي (عطاتني الصبع) حاشة صبعي...حبيبك حتى يضرب ليك شي كوية عاد سميه حبيبي (كاتعوج)
أنا: قودتيها ابنت العبد هانا دبا غانوض نقوليه هادشي للي قلتي
كرزة: اه سيري قولي ليه كرزة قالت ليا خصك حتى تكويني عاد تولي حبيبي
أنا: 😳😨
كرزة: يالاه نوضي 😈
أنا: (تحطمت) تفووو على بنت
كرزة: دوري تقودي خليني نمشي ندوش راه ريحتي عطات
أنا: سيري الخانزة
مشيت جلست فالجردة وبقيت كانهضر مع ماما فالتيليفون ونعاود ليها كاع داكشي للي طرا معايا حتى ظلام الحال وتجمعنا على لعشا.. عرفت أن شيماء صافي تافقات هي وماماها هلى موضوع زواجها وعاود لينا أسد بللي هو من شحال هادي وهو عارف أن حسام كاتعجبو شيماء وان شاء الله غايجي يخطبها مللي نرجعو.. تمنينا لبعضياتنا ليلة سعيدة وكل واحد مشا لبيتو..تكيت فبلاصتي وبقيت كانشوف فخاتمي حتى داني النعاس..
#في_المغرب:
أنا: ماما ماشي معيق بزاف هاد التاج
نجمة: اويييييلي على معيق راه ليوم لملاك ديالك خاصك تكوني نتي الأميرة
أنا: ماعنديش مع هادشي تقيل بزاف وموحال نعجب أسد
كرزة: غاحشمت نقلز ليك قدام ماماك..دبا سدي فمك خليني نعاود ليك لعكر كاع كليتيه
شيماء: خالتي نجمة صباطها فالماريو ياك
نجمة: اه ا بنتي جيبيه ليها دغيا...
دازو 4 أيام باش جينا للمغرب ودغيا زربو عليا فهاد الزواج ههههه ليوم لملاك أي خطبة وعقد فنفس النهار..ليوم غاتولي سميتي هي سمية حبيبي أسد للي يضور يضور ويتحلف عليا😒 كلشي واجد لتحت والناس وصلو..على ماقالتلي ماما أن الحضور قليل جاو غير شي ناس من عائلة مدام سهام و من عائلتي حضرو بنات خالتي للي ماتت..شاداني الخلعة وحاسة بتوثر كبير لكن ماباغاش نبين..لبست قفطان فلباج مخيط بالقهوي..معري من لكتاف وبأكمام مشبكة..شعري درت ليه مشيطة مطلوقة جنب وماكياج ثقيل شوية فلون القفطان عاد التاج والأكسسوارات للي قنطوني ولكن الصبر هادشي لابد منو..صافي وجدت وساليت وهوما يقولولي أنه خاصني نزل..بدات دقات قلبي كاتسارع..هابطة ومنزليني ماما وشيماء وكرزة للي كاتبرح بالصلاة والسلام..مشينا للصالون فين كاين لعدول..وهو يتعرض لينا أسد للي كان لابس جابادور فالأسود مخيطة بالأصفر ومطراسي اللحية ومطلع الشعر أنا صافي كنت غانحوال..شد ليا فيدي وباسني فجبهتي قدام الناس وكملنا الطريق حتال فين غانجلسو..جا لعدول وسولنا واش قابلين جاوبناه قبل مايكمل هضرتو ههه بقا كايبتاسم وعطانا العقد وقعنا عليه وعينينا كايلمعو بالفرحة..غير سنينا بدات الصلاة والسلام وكرزة جابت لينا لخواتم ركبناهم وبدات الموسيقى للي كانت أندلوسية..بداو يجيو الناس يباركو لينا ويتمناو لينا حياة سعيدة..
أسد: (فوذني) واش صافي دبا وليتي ديالي بوحدي؟
أنا: (ضحكت بخجل وهزيت راسي بالايجاب)
أسد: بففف ايمتا غاتسالي هاد الحفلة..غانعيط لكرزة تقوليهم باش يحطو ليهم الماكلة دغيا ويمشيو لديورهم راه تعطلو
أنا: 😒
أسد: (ربع يديه) اووف هاهو ساكت
أنا: 😂😂😂😂😂
بقينا جالسين والناس ضايرين بينا ها للي كايشوف فينا ها للي كايهضر ها للي كايتصور حتى وصلات الماكلة للي كانت فالبيفي بداو الناس ينوضو ياكلو وحتى حنا نضنا..بقات ديك الحفلة تال الليل عاد بداو الناس يمشيو أما بنات خالتي فشداتهم ماما يباتو تال غدا حيت ماعندهمش الطوموبيل فاش يمشيو تال كازا..طلعت لبيتي حيدت عليا داك القفطان وفكيت شعري ومسحت الماكياج..لبست بيجامة قصيرة فالأحمر وتلاحيت فناموسيتي نرتاح حتى شفت لباب تحل ودخل منو أسد لابس تيشورط بيض وشورط أزرق..
أسد:(تلاح حدايا) ناري تانتي عييتي بديك الجلسة ياك
أنا: واييه مانعرف اش غانديرو نهار العرس
أسد: ممم العرس مزال ليه سيمانة قلنا ياك..أسماء عندي فكرة وبغيت نعرف رأيك فيها
أنا: أما هي
أسد: أجي عندي بعدا (تكاني على صدرو) اش بان ليك نديرو مفاجأة لكرزة وأسامة
أنا: اشمن مفاجئة
أسد: نهار عرسنا نجيبو ليهم لعدول ونزوجوهم ونفرحو مجموعين
أنا: (قفزت) فكرة واااااعرة غايكون نهار مميز
أسد: آري بوسة عليها بعدا
أنا: (بستو من فمو) موااح
أسد: ولكن مفاجئة مايعرفو حتال اخر لحظة😉
أنا: اه اه😈😈
بقينا أنا وأسد نفصلو ونخيطو حتى دانا النعاس وحنا فحضن بعضياتنا حتى صبح الصباح
#في_الصباح:
أسد: أسومتي (كايلعب فشعري وأنا مزال على صدرو)
أنا: مممممم
أسد: خصني نوض ماتنسايش راه ليوم حسام غايجيب واليديه باش يخطبو شيماء
أنا: لا لا ماناسياش..حنا درنا معاه بللي يجي مورا نهار عقدنا نيشان..خصني نوض نيت يالاه نوقف مع شيماء كيما وقفات معايا
أسد: مغاتكونش شي حاجة غير عائلتو وحنا صافي
أنا: اه
أسد: باسني فراسي...هانا مشيت..نتلاقاو عشية
أنا: وخا حبيبي
مشا أسد وأنا نضت ندوش..الصراحة ولا كايحمقني ماشي غا كانبغيه...وخا مراتو ماقربش ليا وخا بتنا فنفس لبلاصة..حيت قبل نهار العقد قلت ليه أنني باغا ندوز كلشي بحلاوتو أي حتال ليلة الدخلة ونسلمو نفسي برضاي التام ووافق بلاما يعذبني وخا هو عقليتو أوربية وماكايتسوقش لهادشي ولكن كايديرلي خاطري فللي بغيت..
دوشت ولبست قويميجة مشبكة فلبيض معرية من لكتاف مع سروال بيض وصندالة فلبيض..عروسة زعمة هههههه طلقت شعري ودرت ماكياج خفيف ونزلت لتحت..
سهام: أسماء.. اجي اجي
مشيت عندهم لقيتهم مجموعين فالصالون..مدام سهام أولا نولي نقول خالتي سهام..شيماء كرزة وماما..
أنا: هانا
شيماء: لميمة قولي ايناهو للي حسن واش هاد القفطان لكرونة ولا لبيض..
أنا: اري نشوف..مممم عجبني لكرونة كثر
شيماء: ايوا الله يجيب من يقول الحق..صافي هو للي غانلبس
كرزة: (كاتعوج فمها) ايه تلاقيتو😏 اش كاتعرفو اش اش
سهام: وصافي ا كرزة بلاما ديري ليهم لعصا فالرويضة عيقتي..
نجمة: كبيدتي تبعيني للكوزينة تفطري
أنا: وخا ا ماما
مشيت فطرت وطلعت نتسلت جمعت خالتي سهام وشيماء وعلمتهم بالخطة للي قتارحنا أنا وأسد وعجباتهم بزاف وبدينا نخططو كيفاش نفدوها..دوزنا النهار فالتوجاد حتال الليل...وصلو عائلة حسام للي ستقبلناهم أنا وخالتي وأسد فالباب..أنا لبست فراشة خطيرة فالأزرق ملكي كلها أحجار ومفرفرة وطلقت شعري درت ليه بوكلي. مع ماكياج خفيف..أسد كان لابس لباس رسمي فلبلو مارين ومدام سهام كانت لابسة قفطان خفيف فلباج مع مشيطة راقية..كان حسام منور وحتى عائلتو باينين ناس راقيين..دخلو وستقبلناهم فالصالون..طلعت عند شيماء للي كاترعد بالخلعة..جات فنة بلكرونة..طالقة شعرها سامبل ودايرة خيط الروح فجبهتها بانت أميرة..مع ماكياج خفيف للي حافظ على براءة وجهها..أما كرزة فلابسة تكشيطة فالسومو وضور كي نكافة😂
أنا: شيماء واجدة..راه جاو
شيماء: قيسي يدي (شدات فيا كاترعد) ناري غانسخف
أنا: اوبييلي تهدني ياك غا حبيبك وعائلتو..باين عليهم ضريفين
شيماء: الله يدوز كلشي على خير..
بقينا جالسين معاها حتى عيطو لينا وهبطنا عندهم..غير شافوها بغاو يحماقو عليها وقالو أنها دخلات لخاطرهم..طلبو يدها من خالتي وأسد للي وافقو بكل رحابة صدر وطلبو رأيها حتى هي للي بدورها وافقات..قرينا الفاتحة وحددنا موعد العرس للي غايكون بعد 3 أشهر..ركبو لخواتم ديال الخطوبة على نغمات تبراح كرزة بالصلاة والسلام..بقينا مجمعين حتى وجد لعشا وتعشينا..كانو ناس فشكل وكايدخلو للقلب..ودعونا ومشاو مع التأكيد على التواصل الدائم مع خالتي حول التحضيرات المقبلة..
سهام: هااا هي خطبة شيماء ودازت..ودبا خاص نتفرغو هاد السيمانة للتوجاد دالعرس راه مزال مادرنا والو..
أسد: ماما بلاما تكلفي صحتك بزاف راه غاتكون غا شي حاجة بسيطة ياك ا أسماء
أنا: اه اه بلاما تعذبي معانا ا خالتي
سهام: سكتو قالاك علاه شحال عندي من أسماء وأسد.. المهم كيفما قررنا قبل أن العرس غايكون فالجردة حدا لابيسين..هضرنا مع النكافة و درنا رونديفو مع ل beauty center وعلمنا حتى الطريطور والناس دالموسيقى وداكشي و...
أسد: 😨 ايمتا درتي هادشي كامل
سهام: الانترنت ا وليدي الانترنت😉
أسد: بشاااخ وقالت ليك مزال مادرنا والو هههههههه
سهام: وا خصني نوقف على داكشي بيدي..المهم نوضو ترتاحو راه فات الحال
مشينا كل واحد لبيتو يرتاح ويفكر فبلاناتو..هاد السيمانة كلها أفراح دازت وغادوز عندنا فهاد لفيلا...الله يدوز كلشي على خير ياربي😍