حب وسط الدماء

البارت 22

الجزء التاني

كانحل عيني بتثاقل..الضوء ضرني فعيني..حليتهم بشوية باش نشوف فين أنا..كايبانلي غير للبياض..مكانحسش بأعضائي..هدوء رهيب..فين أنا؟ وشنو كاندير هنا؟ كنحاول نتفكر شنو وقع ..كان صعيب لدرجة أنه حتى سميتي مشاتلي من بالي..بقيت دقائق حالة عيني فالسقف عاد توضحات الأحداث فبالي اللي كان مشوش ومخربق بزاف.. تفكرت العرس ديالي مع توفيق.. تفكرت لاغوب.. تفكرت صوت الرصاص..تفكرت الألم ديال الرصاصة اللي ختارقات الجسد ديالي وأخيرا.. تفكرت وجه سكينة اللي تيرات فيا..
أنا: وااااااااااااااااااااااع اهئ اهئ اهئ فين أناااا.. خالتي نجمة اهئ اهئ واش أنا ميتة.. فين أنا وعلاش مكانحسش بالجسد ديالي..
الممرضة: (دخلات مفزوعة) وأخيرااااا (عاودات خرجات تاتجري)
بقيت متكية وعضامي تقال عليا ماقادراش نتحرك..وحتى صوتي باح كانخرج الهضرة بزز..بقيت مفيكسيا النظر ديالي فالباب اللي خرجات منو الممرضة حتى شفت الإنسانة اللي كاتحسسني بالأمان داخلة عندي وعينيها دامعين
نجمة: أسمااااااااء اهئ اهئ اهئ وأخيرا.. وأخيرا فقتي اهئ اهئ (جات طاحت عندي تاتبكي وتبوس فوجهي كامل ويدي)
أنا: خا..خالتي.. فين أنا ..شنو وقع اهئ اهئ
نجمة: راه كنتي فغيبوبة ابنتي ... طول هاد المدة كنت عايشة فعذاب حيت خايفاك تموتي وتخليني الله يحفظ
أنا: غيبوبة؟ شحال وأنا هنا؟
نجمة: شهرين ..شهرين ابنتي ونتي غايبة على الدنيا..
أنا: شهريييين!!!!!! و.. وشنو طرا ديك الليلة؟
نجمة: احياني على ديك الليلة ابنتي.. كان عرسك وكنا فرحانين حتى تقلب لجنازة.. شي بنت تيرات فيك وهربات.. خلاتك غارقة فدماياتك وحنا غارقين فدموعنا.. هزيناك بالجرى للسبيطار كانت حالتك صعيبة وكلشي قال موحال تعيشي.. حيت وحدة من الكلوات ديالك تضررات بزاف ومابقاتش خدامة... ودارو ليك عملية..
أنا: اشمن عملية؟
نجمة: حيدو ليك الكلوة ديالك.. وزرعو ليك فبلاصتها كلوة أخرى...نجحات العملية وتحيد الرصاص.. قالينا الطبيب أنه كلشي ولا مزيان.. بقيتي 3 أيام ونتي غايبة على الوعي.. الطبيب استغرب فهادشي.. وقالينا أنه السبب ماشي فالجسم ديالك ... إنما هو سبب نفسي.. قال باللي نتي مابغيتيش ترجعي تعيشي.. بغيتي تبقاي بعيدة عن العالم الخارجي عليها محاولتيش تجاوبي معانا وتفيقي اهئ اهئ😢
أنا: فين توفيق؟
نجمة: ممم توفيق.. توفيق مشغول شوية عليها مكاينش هنا.. أنا راه كل نهار كانجي للمصحة من الصباح حتال لعشية .. كانبقا نتسنا على أمل أنك تفيقي وترجعي ليا اهئ اهئ اهئ الله ياخد فيها الحق ديك المجرمة اش بغات عندك ابنتي
أنا: واش شدوها؟
نجمة: للأسف لا.... هربات بسرعة ولبوليس مزال ماقدر يوصل ليها... راه على برا كاين الحرس اللي كايبقاو قدام الباب 24/24 ساعة باش يضمنو أنك فالأمان....خلينا من هادشي.. قوليلي باش كاتحسي؟
أنا: مكانحس بوالو... بحالا جسمي ماشي مني..
نجمة: الله يستر... هاهو الطبيب راه جاي باش يشوفك.. ماتصوريش فرحتي قداش كبيرة مللي رجعتي ليا انوارة حياتي
أنا: الله يخليك ليا اهئ اهئ راه كانعتابرك ماما اللي ماعنديش والله.. نتي أحن إنسان عرفت فحياتي اللي ماعندها حتى معنى
نجمة: حتى نتي راك بنتي ومكانتك ولات بحال مكانة أسامة ...
بقيت أنا وخالتي نجمة جالسين حتى جا الطبيب اللي بقا كايفحص فيا وقلتلو أنني مكانحس بوالو وماكانقدرش نتحرك وهو بدورو طمئني وقالي أنه غير حيت شهرين وأنا على نفس الوضعية عليها عضامي ثقال عليا أما راه بريت وماعندي وااالو..
أنا: دكتور امتا غانقدر نخرج من هنا..
الطبيب: حتى من غدا.. راك دبا تعافيتي كليا
أنا: وخا شكرا
نجمة: على سلاااااامة كبيدتي..ماتصوريش فرحتي قداش
أنا: الحمد لله ياربي..
جابت ليا خالتي نجمة الماكلة وكلييييت حتى شبعت.. حاولات معايا حتى نضت ومشيت للحمام شفت فلمرايا كنت ضعيفة وعينيا دابلين ماحملتش نكمل فراسي الشوفة..رجعت لفراشي ولحد الآن كاينة معايا غير خالتي نجمة ماعرفتش علاش توفيق مجاش عندي!!!
أسامة: (داخل ومعاه الورد) مساء الورد أسومة😻😻 (باسني فراسي) على سلامتك فرحت بزاف مللي سمعت أنك فقتي...كنا مخلوعين عليك بزاف
أنا: الله يسلمك أسامتي شكرا بزااااف...كيف غادي مع الخدمة واش كتعاود
أسامة: كلشي مزيان يسول فيك الخير
نجمة: أسماء بنتي هانا غانمشي للدار نجيب ليك ماتلبسي باش تخرجي غدا ونرجع
أنا: واش صونيتي لتوفيق؟
نجمة: مممم لا راه دبا يجي غير عندو شي شغل..
أنا: (بنفخة) وخا وخا
مشات خالتي نجمة وأسامة وبقيت بوحدي فالغرفة.. نضت كانطل من الشرجم ونتأمل الجردة حتى بدات كاتغرب الشمس عاد جات خالتي.. جابت لعشا كلينا بزوج وحاسة بيها متوثرة ماعرفتش علاش..سالينا عشانا وكل وحدة تخشات ففراشها (عندها سرير معايا فنفس الغرفة)..هي نعسات لكن أنا لا..حاسة احساس غريب ومتشوقة نعرف الغد كيف غايكون حيت غدا هو أول نهار فداري الجديدة مع توفيق وعلي..لكن متملكني خوف كبير.. خايفة سكينة تعاود تعتارض طريقي ودير فيا شي مصيبة.. يااااربي السلامة واش أنا تهنيت من الأخ خرجات ليا ختو..تفو ندمت على النهار اللي شفتهم فيه..بقات أفكار ديني وأفكار تجيبني حتى غفيت ونعست..
#في_الصباح:
نجمة: صافي كملتي اللبس؟
أنا: اه صافي...
فقنا مع 7 دالصباح أنا وخالتي فطرنا ووجدنا راسنا باش نخرجو من المصحة..لبست تيشورط بيض وفيه أديداس فلكحل كان قصير معري من الكرش ولاسق..مع سبرديلة بحال التيشورط (أديداس) ولبست سورال جينز طاي هوت مقطع من الركابي وبوليرو طوييل فلبيض..جمعت شعري كعكة مهملة وشديت فخالتي وخرجنا..
أنا: خالتي شكون خلص المصحة فهاد الشهرين..واش توفيق؟
نجمة: اه
أنا: فين غانمشيو دابا؟
نجمة: اجي معايا...خرجنا من المصحة ولقينا طوموبيل كاتسنانا وواقف قدامها شيفور..
أنا: ديالمن هادي؟
نجمة: نااااري يابنتي ضريتيني فراسي بأسئلتك زيدي وسكتي..
درت داكشي اللي قالت ليا خالتي ...ركبت فالطوموبيل أنا وياها وساق بينا الشيفور..كانظن لدار راجلي توفيق.
الجزء98: /حب وسط الدماء/
بقينا غاديين مسافة طوييلة حتى بان ليا بدينا نخرجو من لمدينة! أوااااه فين غاديين؟ عييت مانسول فخالتي لكنها كانت كاتعطيني مبررات غير مقنعة..عييت بالهضرة وأنا نسكت حتى نشوف هادشي فين غايخرج.. المسافة طولات بزااااااااف حتى بانلي دخلنا لمدينة ماغريباش عليا وعرفتها من لون الطاكسيات.. طنجة؟
أنا: خالتي حنا فطنجة؟؟؟؟ اش جابنا لهنا شرحي ليا راه غانتسطا
نجمة: صبري وغاتفهمي كلشي ابنتي..
بقيت ساكتة وقلبي غايخرج من بلاصتو كان كايضرب بزاف وماعرفتش السبب...وأخيرا وقفات الطوموبيل وتصدمت من المكان اللي وقفات فيه! أمام قصر عائلة أسد.. واهيا سيدنا واهيا ناري اش هادشي عاوتاني؟ ديالمن الطوموبيل وخالتي فين كاتعرف شي طنجة ولا عائلة أسد..بقيت كانشوف فيها ووجهي كلو علامات استفهام وتعجب...خلاتني ونزلات وطلبات مني نزل.. بقينا غاديين فالجردة ساكتين حتى وقفنا قدام الباب ..تحل بهدوء وأسد هو اللي حلو..جات عيني فعينيه ..سرحنا فعينين بعضياتنا كان لابس تيشورط كحل وسروال جينز رمادي وسبرديلة كحلة..مطلع شعرو الأسود بطريقة خطيرة ومطراسي اللحية..عينيه الزرقين كايلمعو..خلاصة القول السيد منور عكسي أنا اللي بحالا يلاه خارجة من لقبر (لا لا ماشي تال ديك الدرجة😂) بقيت كانشوف فيه ونشوف فخالتي اللي كاتبتاسم..
أنا: اش كا......
قبل مانكمل هضرتي تلاح عليا أسد بتعنيقة..خشاني فصدرو وزير عليا...بقا مزير ونفسو كاضرب فعنقي وكانسمع دقات قلبو مجهههدة..بقيت منزلة يديا مبادلتوش لعناق..بقينا شحال وحنا فنفس الوضعية حتى قاطعنا صوت شيماء..
شيماء: وأخييييييرا رجعات ليك صحتك بخير وعلى خييير على سلامتك أحبيبة😊
طلق مني أسد بعدما جات شيماء..وخرج من للدار بلا حتى شي كلمة..أو هذا مالو
أنا: (سلمت على شيماء) الله يسلمك شكرا بزاف ولكن بلاتي كيفاش حتى...
نجمة: اجي ابنتي ندخلو مع شيماء لداخل وغاتعرفي كلشي..
دخلت وأنا متحمسة نعرف اش هادشي اللي واقع..كانت مدام سهام واقفة ومعاها كرزة وفوزية ولينا وسفيان وخطيبتو..
سهام: نتي اش جاية ديري هنا هاه؟
أنا: أنا..أنا ماجيتش بخاطري راه ماكنتش عا....
سهام: (بابتسامة) أسماااء بنتي تواحشتك بزاف اجي عندي (فتحات ليا يديها)..
فرحت وماتيقتش أنها مابقاتش مقلقة مني مشيت كانجري عنقتها بالجهد وهي بادلتني نفس حرارة العناق..
سهام: على سلامتك ابنتي ماتصوريش شحال وأنا كانتسنى النهار اللي غاتفيقي فيه..
سفيان وفيرجينيا: على السلامة أسماء  (سلمو عليا بلوجه)
فوزية: (من تحت سنانها) على سلامتك
أما لينا فخنزرات فيا ومشات طلعات لفوق بلا ماتقول حتى شي كلمة..
كلشي اللي كان تما هضر معايا الا كرزة اللي كانت واقفة وعينيها فالأرض..مشيت جيهتها بخطوات ثقيلة ونزلت على ركابيا..
أنا: مانستاهلش تشوفي فيا اهئ اهئ بسبابي عانيتي وتظلمتي وتعرضتي لاعتداء اللي حتى بنت مايمكن ليها تقبلو ولا تستحملو..فطريقي طرا ليك داكشي كامل وأنا عمري مغانسمح لراسي اكرزة عمري اهئ اهئ اهئ
كرزة: تواحشتك الكلبة
أنا: 😨
الكل: ههههههههههههه هاهي بدات
أنا: كرزة؟
كرزة: مك هادي ماشي كرزة اجي عنقيني الخانزة تواحشتك..
بقيت مخرجة فيها عيني بصدمة😨😨 هاويلي واش هادشي بصح ولاكانحلم...
عنقاتني وزيرات عليا عاد فقت من الصدمة وبديت نبكي ونضحك كي الحمقة.. كانعنق فيها ونقول ماعنقت نبوووس ونقول مابست ..كيفاش تبدلات نفسية كرزة فهاد المدة ماعرفتش ولكن اللي عارفة هو أنني أسعد وحدة فهاد اللحظة 💘
بعدما سلمت على العائلة كاملة وكتاشفت أن مدام سهام وكرزة سامحوني فرحت بزاف وارتاح قلبي...لكن مزال ماعرفت كيفاش وقع هادشي وكيفاش حتى خالتي نجمة جابتني لدار أسد وكيفاش توفيق ماسولش فيا رغم أنه راجلي ...بقيت كانتخبط فأفكاري حتى فيقني صوت شيماء..
شيماء: أسماء، أجي معايا نديك لبيتك ترتاحي
أنا: ولكن بلاتي راه...
سهام: أسماء رتاحي ابنتي دبا ونهضرو من بعد راه الكلام مغايهربش..
أنا: وخا..
وصلاتني شيماء لنفس البيت اللي كنت جلست فيه فالأول..لقيتو مرتب ولماريو عامر حوايج وكاع اللي نقدر نحتاج..استغربت من هادشي كامل وأول حاجة جاتلي فبالي بعدا هي ناخد شي دوش عالمي..هزيت بينوار ودخلت للدوش سخنتو مزيااان وجلست نحك ونعاود حتى عييت عاد عمرت البانيو وتخشيت فيه..بقيت شي ساعة وأنا مغمضة عيني حتى كان غايديني النعاس نضت غسلت شعري ودرت الصابون وخرجت بالبينوار اللي كان فالأسود وقصير قريب يبين مسعودة..وقفت فالماريو نشوف شي بيجامة حتى سمعت الباب تحل..ضرت نشوف شكوت لقيتو أسد واقف كايشوف فيا..بديت نجبد ونهبط فالبينوار زعما باش نتغطى ساعة المسخوط كان قصير بزاف..
أنا: عفاك سد الباب راه كانبدل
أسد: وخا (دخل وسد لباب) هاهو
أنا: اويلي واش نتا حمق واخرج وسدو ماشي دخل..
بدا كايقرب ليا بخطى ثابتة حتى وصل عندي بقيت كانشوف فيه وهو كايشوف فيا..قلبي بدا يزدح يزدح ماعرفتش نوصف داك الإحساس اللي تملكني..ماحسيت حتى حاوط خصري بيديه وطبع قبلة على عنقي..بقيت مبلوكية ماعرفت باش تبليت زاد باس بوسة ثانية وثالتة ورابعة وأنا غير واقفة بلا حراك...شوية هزيت راسو من على عنقي وأنا نحط شفايفي على شفايفو (بلا حشمة بلا حيا) وغمضت عيني.. هو بدا كايبوس ففمي شوية بدا يجر ويمص ويدو حطها على خصري وبدا يعصر فيه ودفعني حتى لصقنا مع الحيط..أنا صافي طلعات معايا الحرارة حاطة يدي فصدرو وكانطلعها حتى لعنقو وحنا مزال كانتبادلو القبل شوية حسيت بيه بدا يحل لحزام دال البينوار عاد فقت ووعيت على راسي....دفعتو عليا وصرفقو حتى دار وجهو وطحت فالأرض بديت نصرفق فراسي ونريش فشعري وندب...
أنا: اهئ اهئ ا..ا..اش درت.. اش درت (كانصرفق فوجهي) راني مرا مزوجة راني كاتبة العقد على سنة الله ورسوله مع رجل اخر..اويييييلي الله يعطيني غير شي موتة اش هاد الشوهة درت فراسي...
أسد: (جا وقفني وصرفقني حتى هبط الدم من فمي) سكتي! سكتي أ أسماء سكتي..علاش كاضربي راسك هاه واش حماقيتي..
أنا: (شادة فحنكي وساهية) ماعمري غانسمح لراسي..و ربي مغايسمحش ليا على هادشي اللي درت
أسد: اه ربي مغايسمحش ليك بصح..لكن هادشي الى كنتي مزوجة!
أنا: وراني تزوجت راني مرا مزوجة اهئ اهئ
أسد: أوااه وفين راجلك؟
أنا: راجلي ف....راه...ما...ماعرفتش..راجلي فالرباط
أسد: قولي توفيق فالرباط ماتقوليش راجلي.. حيت هداك ماشي راجلك.
أنا: واش نتا حمق كيفاش ماشي راجلي راه درنا العقد والعرس وليلة عرسنا تضربت بالرصاص..
أسد: اه كيفما درتو العقد والعرس راكم تطلقتوا
أنا: تطلقنا!!!!!!!!
أسد: اه تطلقتو
أنا: ولكن علاش؟؟ كيفاش طلقني بلاما نعرف؟ أنا كنت فغيبوبة معاقلة على والو ..كيفاش طرا اهئ اهئ اهئ مابقيت فاهمة والو (شديت فراسي)
شدني أسد من يدي وجرني بهدوء وجلسني فوق الناموسية.. تحنى على ركابيه وتقابل معايا..
أسد: أسماء تهدني..شوفي لبسي حوايجك أنا كانتسناك قدام الباب مللي تسالي خرجي عندي
أنا: (كانتنخصص) و..واخا..
خرج أسد من البيت وأنا بقيت جالسة شي 2 دقايق ساهية والدموع ماحبسوش..نضت لبست كيطمة فالرمادي مزيرة ومعرية من الكرش مع بانطوفة وخليت شعري مطلوق وخرجت..لقيت أسد مربع يديه ومتكي راسو على الحيط..
أسد: اجي معايا..
مشيت معاه نزلنا لتحت وخرجنا من الدار فاتجاه الجردة وبالضبط قدام لابيسين..كان جو هادئ وزوين لكن أنا الدنيا كانت كتبانلي كحلة ..واش اعيباد الله حتى قلت صافي قطعت الواد ونشفو رجليا.. لقيت راجل كامل مكمول بغاني للحلال..تزوجت بيه..نهار عرسي طرطقولي كرشي ومللي بريت لقيت السيد طلقني اش هاد الزهر ديال لخرى عندي..
أسد: فاش ساهية؟
أنا: علاش جبتيني هنا
أسد: باش نجاوب على كاع الأسئلة اللي كاضور فراسك
أنا: تفضل هانا كانسمع..
أسد: عمري نسمح ليك.. خليتيني فالسبيطار وغبرتي .. مللي مشيت عندك باش نشوفك عرفت أنك خويتي الدار! عييت مانقلب عليك لكن تمحا ليك الأثر (زير على يديه) بقيت ديما كانحاول نعرف عليك شي حاجة وطلبت من حسام يعاوني.. أنا أصلا عندي مشاكل فالخدمة وفالدار وزدتيني نتي.. كرزة كانت مريضة بزاف.. أنا وماما وشيماء تكلفنا بعلاجها النفسي.. بقات مدة وهي كاتلقى العلاج اللي كانت رافضاه فالأول لكن تقبلاتو من بعد... ماما أيضا كانت مقلقة منك بزاف لكن قنعناها أنا وشيماء بللي نتي ماعندك حتى دخل فهادشي...ونهار عرفاتك تضربتي بالرصاص زادت سامحاتك وبقيتي فيها وبكات بزاف على ودك..وحتى كرزة أثر فيها الحادث اللي وقع ليك وحن قلبها من جيهتك..
أنا: وكيفاش عرفتوني تضربت بالرصاص؟
أسد: واحد النهار كنت فكافي كانرتاح وبالصدفة شفت كاطا (سكينة) داخلة تما...خبيت وجهي باش ماتشوفنيش..جلسات فالطابلة اللي قدامي وجبدات شي تصاور.. كانت تصويرت ليو (مجد) بقات كاتشوف فيها وهي تبوسها..شوية جبدات تصويرة ثانية اللي كانت تصويرتك..بقاو يديها كايترعدو وهي تجبد عكر حمر من صاكها وخربقات ليك بيه وجهك..تما عرفتها أنها ناوية تنتقم منك حيت بسبابك خوها فالحبس..درت اتصال سريع بواحد من رجالي وطلبت منو يجي للمقهى ومن بعد ماجا طلبت منو أنه يتبعها فينما مشات....وخبرت حتى حسام بالأمر لكن قال بللي ماعندو حتى شي تهمة ضدها.. هي كاع الجرائم اللي كادير كايكونو فأمريكا وهنا ماعندهم مايصورو منها حيت مكاين حتى حجة ضدها..وكلف حتى هو شي رجال يراقبوها..دازت يومين وصلني اتصال مع ل1 دالليل كايقولو فيه رجالي باللي سكينة خرجات بالليل وشدات الطريق لمدينة معارفينهاش ، طلبت منهم يتبعوها ومايتلفوهاش..نضت لبست حوايجي وتاصلت بحسام وشدينا الطريق حتى حنا
أنا: الصمت
أسد: من بعد مدة عرفنا أن الوجهة ديالها كانت هي مدينة الرباط..شافوها الرجال حتى نزلات فأوطيل ومن بعد نصف ساعة خرجات لكن ماركباتش فطوموبيلتها بل ركبات فموطور وزادت..تبعوها لكن هي كانت أسرع منهم ..أنا وحسام كنا يالاه دخلنا للمدينة ديك الساعة..كنت حاس غاتوقع شي كارثة ديك الليلة واحساسي ماخيبنيش..وصلنا اتصال صادم من عند واحد من الرجال قال أنه شافها حتى تيرات فشي عروسة قدام قاعة الأفراح..كانو تما البوليس لكن ماقدروش يتبعوها لاهوما لارجالنا..طارت بحال البرق..
أنا: (دموعي كايطيحو بحال لحجر)
أسد: أنا مافهمت والو..تيرات فعروسة؟ عرفتها بغات تيري فيك .. لكن عروسة! المهم هادشي ماهمنيش ديك الساعة اللي همني هو نوصل عندك بأقصى سرعة... بعدما وصلنا لعين المكان لقينا الدنيا مقلوبة الناس كاتغوت والجوقة..نزلت كانجري من الطوموبيل فاتجاه الناس حتى كاتبانيلي طايحة جثة هامدة وكسوتك البيضة ولات كلها حمرة ولالة نجمة حاطة راسك على ركابيها وكاتغوت لربي اللي خلقها.. وحداها مولاي السلطان مصدوم..مشيت دخلت وسطهم هزيتك وبديت نجري بيك جهة الطوموبيل..تبعوني توفيق ونجمة مافاهمين والو ...تدخل حسام وقال ليهم أننا من عائلتك...هزيناك نيشان للمصحة وتبعونا لوخرين بطوموبيلتهم..بقيت كانتحسس دقات قلبك واكتاشفت أنك مزال حية لكن كنتي كاتنزفي بزاف ، وصلناك بسرعة ودخلوك نيشان لغرفة العمليات بعدما عرفو أنك متصاوبة بالرصاص.. دخلوك ساعات ..بقيت تما أنا وحسام ولالة نجمة وولدها وتوفيق..حتى خرج الطبيب وخبرنا أن الكلوة ديالك تضررات بزاف ومابقاتش صالحة وأنهم ماعندهم حتى متبرع..
أنا: ولكن خالتي نجمة قالتلي بللي شي واحد تبرع ليا!
أسد: اه، هي اللي تبرعات بالكلوة ديالها ليك
أنا: كيفاااااااش؟!!!😨😨😨
أسد: كيفما سمعتي...كانت خاصاك العملية فأقرب وقت.. وباش نقلبو على متبرع كان غاياخد وقت.. فالأول تطوعت أنا لكن فصيلة دمي مختلفة على ديالك... الشي للي خلا لالة نجمة تطوع ولحسن الحظ كانت فصيلة دمكم متطابقة ودارت العملية.. فالأول حاولت نمنعها ونوضت الحيحة باش يشوفو كيديرو لكن مكان حتى شي بديل آخر..
أنا: اهئ اهئ اهئ (طحت فالأرض) نتي راك مي اللي ماولداتنيش اهئ اهئ عطيتيني طرف منك باش مانموتش.. بغيت غانعرف باش غانجازيك على هاد الخير اللي كاديري فيا...نتي ملاك ماشي إنسان..اهئ اهئ
أسد: (جلس حدايا فالأرض وربع رجليه) كاين شي ناس اللي تلقا فيهم الخير كثر من عائلتك...فعلا مرا طيبة.. كانت وخا مريضة ودايرة العملية كاتبقى واقفة حدا راسك بلاما تمل.. باين عليها كاتبغيك بزاف
أنا: (كانتنخصص) حتى أنا كانبغيها...مي اللي ولداتني لاحتني بلاما تسول فيا ولا تهتم بيا اللي من لحمها ودمها.. لقيت الخير فهاد الإنسانة اللي غانواعد نفسي من اليوم أنني نهزها بسناني وعمري نفرط فيها ولا نتفرق معاها... حسيت بمعنى العائلة ودفئها فحضنها..مستحيل نتفرق عليها مستحيل😢
أسد: الله يخليكم لبعضياتكم
أنا: آمين.. كمل؟
أسد: اش غانكمل
أنا: 😒 داكشي اللي كنتي كاتعاود.. وكيفاش حتى توفيق....
أسد: أياياااي.... من بعد العملية ديالك اللي نجحات دخلتي فغيبوبة..النهار الثالت كنت خارج من المصحة باش نجيب ماما وختي عندك وأنا نسمع توفيق وماماه كايهضرو.. كانت كاتعاتبو على ختيارو ليك وأنك ماعندك لا أصل لا مفصل والقضية فيها القرطاس وبللي ولات سيرتهم على كل لسان.. وراجلك 😒 مدافع عليك بحتى كلمة بل أيد مو فهضرتها .. أنا من بعد هادشي اللي سمعت ماعجبنيش الحال وماحملتوش عليها خديت قرار نطلقكم
أنا: (جمعت الوقفة) كيفاش خديتي قرار طلقنا؟ علاش شنو كايسحاب ليك راسك؟ هوما شافو داكشي تصدمو واش يسحاب ليك بحالك موالفين بالمنضمات والمافيات..!
أسد: (الصمت)
أنا: علاش ديما كاتدخل فحياتي هاكا واش حتى راجلي تبعتيني فيه..  اش قلتي ليه حتى طلقني هاه؟
أسد: (جالس فنفس الوضعية بملامح هادئة) قلتلو أنك خطيبتي وهربتي ليا وبللي حنا عائلتك وبللي كاينة شي مافيا باغا تقتلك نتي واعائلتك عليها من الأحسن يطلقك😊 السيد خاف على راسو وعلى ولدو وفالغد جاب وراق الطلاق ماعطلكش
أنا: (بقيت حالة فيه فمي) من نيتك؟ واش محرشك عليا شي واحد؟ علاش ديما خارج عليا هاكا واش درت ليك شي حاجة غير قول؟
أسد: درتي بزااااف..
بديت نبكي ونترطا غا بوحدي وهو يجرني من يدي حتى طحت عليه جيت جالسة على رجليه بقيت كانشوف فيه ويشوف فيا حتى تلاحينا فأحضان بعضياتنا ..عنقتو بالجهد وكانبكي بالصوت وهو مبادلني نفس العناق وكايدوز يدو على شعري بقيت هاكاك حتى ماعقلتش ايمتا نعست..
كرزة: ويلي ويلي خخخخخخ 😂😂😂😂
سمعت صوت شي واحد كايوشوش ويضحك حليت عيني لقيت الشمس ضاربة فيا... هزيت عيني كانلقا راسي ناعسة على صدر أسد اللي مزال ناعس... كان جالس ومتكي ضهرو على واحد الطابلة حدا لابيسين وأنا متكية حداه وحاطة عليه راسي.. أوااااه بتنا الليلة كاملة فالجردة 😨 هزيت راسي نشوف منين جاي داك الصوت لقياها كرزة لابيسة دوبياس وبحالا ناوية تعوم..مقابلة معانا وخاشية صبعها ففمها كاتعضو وتفرنس..
أنا: امالك كاتحنززي😞
أسد بدا يحك فعينيه فيقتو بصوتي.. ناض جلس وبدا يرجع فشعرو اللور وشاف فيا.. بتاسم وناض بلا حتى كلمة
كرزة: (جات تاتجري عندي) اوووووف وااااااااو يااااااااي
أنا: (متبعة أسد بعيني ) امالك الخرى
كرزة: كون تشوفي على ديكور كنتو فيه يضرك خاطرك ا الصاطة
أنا: وا هضوووور تعلمتي أ الصاحيبة
كرزة: شوفي فيا... علاش بتو هنا الليلة كاملة ومعانقين واش...
أنا: مكاين حتى حاجة من داكشي اللي فبالك! غير صدفة وصافي.. راه ماعقلتش على راسي امتا نعست
كرزة: مممممممممممممممم ماعقلتيش امتا نعستيييييي
أنا: (نضت وقفت) واسيري تخراي مقالوهاش ليك هادي
كرزة: طليه أ وجه لخرى... شوفي ضربي شي دوبياس واجي نعومو لميمة
أنا: لا ا ختي مكانعرفش باغا تقتليني نتيا
كرزة: يخ صافي سيري سيري
دخلت للفيلا كان الهدوء حيت باقي الصباح بكري... طلعت لبيتي نيشان للحمام غسلت وجهي اللي كان صابح منور وخا كاع الحزن اللي عشت لبارح..عاودت جمعت شعري ومشيت حطيت راسي على لمخدة وبقيت كانفكر فأسد😒 وا مسخوط هذا فينما يكون عندي شي عرس يخسرو ليا ههههههههه ولكن يقدر يكون كاع هادشي اللي كايدير غا على مصلحتي ولكن علاااااش بغيت غير نعرف علاش كايدير معايا هاكا!!! وأنا مكاتربطني بيه حتى علاقة..بقيت متكية وساهية وأنا نتفكر خالتي نجمة .. خصني ضروووري نهضر معاها نضت خرجت من بيتي بلا مانبدل الكيطمة دالبارح هبطت لتحت وسولت الخدامة على فين بيتها.. نعتوه ليا وطلعت كانجري فالدروج..وصلت قدام لباب عينيا كانو غايدمعو لكن حبستها ودخلت.. لقيتها ناعسة بهدوء وملامح الحنان والطيبة طاغية على وجهها الزوين .. قربت وجلست على طرف الناموسية ..بقيت كانشوف فيها دقائق وحطيت قبلة مطولة على جبهتها حتى بداو دموعي يطيحو ...لامسو وجهها الشي اللي خلاها تفيق مخلوعة من منظري..
نجمة: أسماء بنتي مالكي؟ لاش جيتي عندي ومالكي كاتبكي واش كاضرك شي حاجة هاه؟
بدون سابق إنذار عنقتها وبقيت كانبكي ونتنخصص وهي معنقاني وتسول مالي حتى بردت شوية عاد جاوبتها
أنا: عمري شفت بحالك... الطيبة ديالك مابقاتش عند الناس فهاد الوقت ... عمري غانسا التضحية ديالك عمري غانسا المعاملة ديالك عمري غانسا الخير ديالك.. ماعرفت كيفاش ندير نشكرك.. الكلام مايقدرش يعبر على امتناني ليك أقسم بالله
نجمة: اشمن تضحية علاياش كاتهضري راه مكاين والو
أنا: بلاما تحاولي تخبي عليا راني عرفت كلشي وعرفت أنك عطيتيني الكلوة ديالك وبقيتي عايشة غير بوحدة باش مانموتش اهئ اهئ اهئ
نجمة: ايوا الله يهديه هاد سي أسد عييت نطلبو مايقولكش لكن مدارش بكلامي.... أسماء راه كانقولك نتي راك بنتي وكون كانت بنتي أ.... كون كانت عندي بنت كنت غاندير معاها نفس اللي درت معاك... محبتي ليك كبييييرة و سبحان من زرع معزتك فقلبي.. ماتخافيش راه الطبيب قالي صحتي مزيانة ومافيها باس نعطيك كلوتي وشوفي سبحان الله حتى دمنا صدق بحال بحال.. وعاد نتي مزال صغيرة ومحتاجاها كثر مني أنا كبرت وغانمرض غانمرض
أنا: (حطيت راسي على ركبته) الله ينجيك ويحفظك ليا .. ندير المستحيل باش تبقاي ديما بخير ومرتاحة
نجمة: آمين... صافي ياك برينا بزوج.. ايوا خلينا من الحزن ولخناين وعاودي ليا شكون أسد !!!
أنا: مانعرف ليه.. مكانعرفوش😒
نجمة: 😒😒 هاويلي على مكاتعرفيهش... السيد دار الشوووهة المشوهة نهار تضربتي بالرصاص قلب عليهم الصبيطار وكايطلبهم يحيدو كلوتو ويعطيوها ليك... يضل واقف حدا راسك ويهضر معاك كيشي حمق ونتي مجايبة للدنيا خبار وتقولي مكاتعرفيهش؟ هادشي غا مكاتعرفيهش كون كنتي كاتعرفيه اش كان غايدير؟ وهاااااادي زويينة
أنا: 😨😨😨😨😨 حلفي
نجمة: والله ابنتي بحالا شفتيه بعويناتك .. مكاينش اللي فقصني وسالا معايا قد داك توفيق ماعمري نويتو يكون هكاك السيد غير شاف القضية فيها الرصاص والبوليس جاب ليك براتك بالحق عبر عليه غا أسد خلعو باش طلقك أما راه السيد مفضي مامنوش..
أنا: 😨😨😨😨😨 حلفي
نجمة: تي اش غانحلف اش اش؟ اويلي على حلفي
أنا: حلفي حتى أسد دار داكشي على ودي😨
نجمة: والله ا أسماء ابنتي حتى بصح.. عليها قلت ليك منين كاتعرفيه.. واش هادي عائلة ولا كايجيوك؟ أنا راه دارو معايا نهار تفيقي نجيبك عندهم وداكشي اللي درت
أنا: لا ماشي عائلتي.. هاد الناس بحالك! من نهار عرفتهم وهوما كايديرو فيا الخير
سهام: (واقفة حدا لباب) أسماء راه بهاد الهضرة غاتقلقيني منك وبزاف
أنا: مدام سهام صباح الخير... حاشا واش نقلقك
سهام: ايوا عمرك تقولي درنا فيك خير نتي راك وليتي بحال وحدة من العائلة... وحيت قلبك زوين كايلاقيك الناس مع الناس الزوينة (شافت فنجمة بابتسامة)
أنا: ربي يخليكم ليا ومايحرمنيش منكم... فعلا وليت نحس بللي عندي عائلة
سهام: الشرف ليا تكوني من عائلتي.. المهم نوضو نوضو تهبطو تفطرو راه الفطور واجد
أنا ونجمة: وخا
مشات مدام سهام عاد تبعناها أنا وخالتي.. هبطنا لتحت لقينا كلشي مجموع على طابلة لفطور من غير أسد.. قلبت عليه بعينيا لكن مبانليش..
فوزية: ايوا يا ختي سهام قلبك كبييييييير فالأول استقبلتيها عندنا حتى ولينا نحسو بيها هي مولات الدار... شوية هربات.. شوية رجعات وعاد جايبة معاها الزايد..ايوا تبارك الله...
لينا: هادشي اللي بقا.. مابقيت فاهمة والو أنا فهاد الدار
أسد: (هابط من الدروج بلباس أنيق وريحتو طغات على المكان) أنا غانفهمك ا بنت عمي! أسماء ولالة نجمة غايسكنو معانا فهاد الدار وابتداء من ليوم
لينا: كيفاااااااش!!!! ولكن....
أسد: مزااال ماكملت هضرتي... غايبقاو معانا كأنهم أفراد من عائلتنا واللي تصرف معاهم ولا قاليهم شي كلمة ماشي حتال ليه حسابو غايكون معايا أنا
نجمة: سمحليا وليدي ولكن راه داري ومدينتي وولدي و...
أسد: لالة نجمة ماعندك ماتبقاي ديري فديك تمارة... راه هضرت مع ولدك وخبرتو أنني غانخدمو فالشركة... وراه كاينا دار فالجردة غانعطيها ليه يسكن فيها.. ونتي راك حرة مرة سيري عندو مرة اجي عند أسماء هنا..
سهام: الله ياوليدي على فرحة فرحتيني هاد الصباح ولاهيلة أحسن مادرتي نيت كنت باغا أسماء تبقا معايا
نجمة: الله يكثر خيرك ا ولدي لكن مغانقبلش حتى توافقو على الشرط ديالي
سهام: قولي
نجمة: مايمكنش نبقا جالسة لا شغل لا مشغلة.. مانكرهش تخليوني نتكلف فالطياب فالكوزينة ولا شي حاجة نديرها الى وافقتو طبعا.. باش نحس براسي ماشي غير عالة عليكم
أسد: حاشا ا لالة نجمة.. لكن مدام هذا هو شرطك باش تبقاي فأنا موافق.. لكن ماتعذبيش راسك.. غير كوني مشرفة على الخدم فالكوزينة
نجمة : واخا ا ولدي الله يحفظك ويسهل عليك
أسد: ونتي ا أسماء موافقة؟
أنا: (من الصباح وأنا غا ساكتة وكانشوف) فينما كانت خالتي نكون معاها
سهام: ايوا صاااافييييي مرحباااا بكم من اليوم الدار ولات داركم
نجمة: لالة سهام.. أنا غانسكن أنا وأسامة فالدار اللي قالينا سي أسد وأسماء هاهي تبقا معاكم
أسماء : لا ولكن...
نجمة: (خنزرات فيا) صافي ا بنتي سمعي الهضرة
أنا: وخا😊
بعدما كمل أسد هضرتو فطرنا مجموعين... شي ملامحو باين فيها الفرحة وشي ملامحو كاتعبر على غضبو حول قرار أسد..
أنا داك الطبسيل بقيت غاكانلعب فيه حيت أفكاري مشوشة..واش غانبقا ساكنة فهاد الدار؟ وعلى أي أساس! بقيت ندي ونجيب فالأفكار حتى سمعت كرسي أسد تحرك .. ناض على الطبلة ودعنا ومشا للخدمة لكن قبل همس لمدام سهام فوذنها الشي اللي خلاها تشوف فيا.. أنا مافهمت والو..
سهام: نجمة.. أسماء.. اجيو معايا واحد الدقيقة
أنا ونجمة: وخا (نضنا تبعناها حتى وصلنا للكوزينة)
سهام: نجمة.. عتابري راسك من ليوم نتي المشرفة على الخدم كاملين اللي فلقصر.. هادي مسؤولية كبيرة كانتمنى تكوني قدها
نجمة: غاندير اللي فجهدي ونتمنى ربي مايخيبنيش..
سهام: يكون خير.. راه أسامة فطريقو لطنجة ومعاه حوايجكم وكاع مستلزماتكم..مللي يجي كلفي شي خدم يعاونوك تقادي الدار اللي فالجردة راها مفرشة خصها غير شوية التنظيف وترتبو حوايجكم فيها
نجمة: الله يعطيك الخير ا لالة سهام
سهام: الله ياودي على الراس والعين.. أسماء عزيزة وكاع اللي يجي من جهتها حتى هو عزيز..حقا أسماء بنتي بغيت نخبرك بشي حاجة وماعرفتش شنو غايكون رأيك..
أنا: تفضلي!
سهام: اللي عارفة هو أنك حبستي قرايتك حد التالثة إعدادي ياك؟
أنا: اه
سهام: اش بان ليك تكمليها؟
أنا: (خرجت فيها عيني بتعجب) نكمل قرايتي؟
سهام: ومالكي تصدمتي؟ اه تكملي قرايتك.. هذا اقتراح تناقشنا فيه أنا وأسد لبارح... نتي بنت مزال صغيرة وزوينة حشومة مايكونش عندك مستقبل
أنا: ولكن راه عندي 20 عام كيف غاندير ليها
سهام: اويييلي سكتي سكتي اللي سمعك يضحك عليك.. راه لقراية ماعندهاش عمر ا بنتي غير توكلي على الله ويكون خير
أنا: فالحقيقة من ديما وأنا حلمي هو نكون قارية ومثقفة وكنت ديما كانجي أنا الأولى حيت كانت عزيزة عليا لقراية بزاف (غرغرو عيني) مدام سهام شكرا بزاف حيت فكرتي فيا وفكرتي أنك ترجعيني نقرى
سهام: هذا واجب ..عادي ابنتي مادرت والو.. دبا قوليلي شنو ميولك وشنو تبغي تقراي؟
أنا: فالصراحة ميولي كلو للغات! حلمي أنني نولي نهضر ببزاف داللغات بطلاقة
سهام: وخا.. أول خطوة هي الباك بعدا.. غانشوفو كيفاش خصك دوزي باك حر لكن القضية غاتكون صعيبة حيت مزال غير شهرين لامتحانات الباكالوريا.. ويلا كتاب ونجحتي غاندخلك لأحسن سونطر ديال اللغات..لكن قبل خصك ديري مجهود وتحاولي تكوني منضبطة باش تقدري توصلي فين بغيتي
أنا: (عنقتها) كنواعدك! كنواعدك غاناخد الباك .. غانوجد فهاد الشهرين اللي بقاو خصني غير الدروس غانخدم بالليل وبالنهار باش نكون عند حسن ظنك.. لكن كيفاش غانتسجل و...
سهام: هادي خليها علينا.. نتي غير خدمي ووجدي.. وغايوصل كلشي حتال عندك
شيماء: (دخلات عندهم) ممكن تقبلي بيا نعاونك؟
أنا: شيماء! لا بلاما نعذبك معايا فالصراحة هادشي بزاف عليا والله ..حشمانة منكم
شيماء: اويييلي اش كاتقولي.. غانعاونك بزز منك أصلا أنا هاد الفترة غير فالدار..غانكون فرحانة الى ساعدتك ووجهتك.. ومللي تاخدي الباك غانفرح كثر منك
أنا: شكرا بزززاف
سهام: صافي متافقين؟
أنا وشيماء: ههه متافقين
نجمة: يالاه يالاه كلا يمشي لبيتو خويو ليا كوزينتي😡
أنا،شيماء وسهام: ههههههههههههه حاااضر