بديت كنحاول نفتح عينيا بصعوبة باش نشوف فين أنا ولكن وخا هكاك كايبان ليا غير الظلام حاسة بيديا معلقة ومربوطة بشي حاجة قاصحة بحال السنسلة وحتى رجليا مربوطين.. راسي ماقادراش نهزو بكثرة ماهو تقيل عليا..فمي ناشف وشعري هابط على وجهي زيادة على صمت رهيب وريحة خانزة بزاف ماعرفتش منين جايا بقيت دقائق كنحاول نستوعب فين أنا ونتفكر شنو أخر حدث طرا..بقيت جامدة وكانشوف فالظلام حتى طاح فبالي مجد وسكينة عائيلتي الجديدة اللي بعدما كنت غانركب معاهم فالطوموبيل باش نتوجهو للمطار ماعرفت اش طرالي..واش أنا كانحلم؟ فين أنا؟ فين مجد؟ علاش أنا مربوطة وشنو هاد الجو الغريب اللي أنا وسطو؟ عقلي مزال ماتقبل هادشي اللي أنا فيه حتى حاولت نقطع هاد الصمت..
أنا: ممممممم...مممممممم(فمي مسدود بلصقة قوية) بديت نحرك فيدي ورجلي اللي فعلا كانو مربوطين بالسناسل ..ياربي فين أنا اهئ اهئ اهئ واش خطفوني؟ غايكون مجد وسكينة كايقلبو عليا اهئ اهئ مممممممم..ممممم (كنحاول نغوت)
الشخص: هاهاهاهاهاهاها (بالإنجليزية) لمشيشة ديالنا فاقت
أنا: ممممممم مممممم (يا ربي شكون هادا وفين هو راه كايبانلي غير الظلام)
تحل باب بطريقة مزعجة ضراتني فودني باين عليه باب ديال لحديد مصدي كايبانلي خيال راجل واقف بديت كانقفز بالخلعة
الشخص: welcome sweetie (أهلا حلوتي)
شعل ضو فالمكان اللي تمنيت كون ماشعلش.. شفت أبشع منضر يقدر يشوفو الإنسان فحياتو حسيت بقلبي وقف وأعضائي تشللو مادرت حتى ردة فعل من غير جسمي اللي مبلوكي ولساني اللي تعقد وعينيا غايخرجوا من بلاصتهم..
كانت غرفة كبيرة على شكل مستودع وكانوا ضايرين فيها عدد كبير من الجتث البشرية معلقين بنفس الطريقة اللي معلقة بيها أنا ولكن الأمر ماسالاش هنا لأن هاد الجثت مكانوش عادين لكن كانو مشوهين بطريقة اللي مايقدرش يتقبلها لعقل..محلولين من لوسط وكايبانو خاويين من لداخل بحال الحولي فالعيد لكبير مللي كانحيدوا ليه الدوارة.. كانو لابسين ملابس مبقاش كايبان لونها بكثرة الدم ..كانو بنات ودراري اللي وجههم كان أزرق ومنفوخ كانوا جثت معفنة وكاتنباعث منها ريحة خانزة بزاف..بعدما شفت هاد المنظر كانت ردة فعلي هي نغيب على الوعي مرة أخرى..
أنت تقرأ
حب وسط الدماء
Horrorقصة مغربية تحكي عن معاناة شابة و العذاب الذي مرت به و فقدانها التقة في البشر ... بعدما تقراو القصة تعرفوا علاش
