The Billionaire's Obsession

Kabanata 4

TONIGHT IT IS.

Gustong pahintuin ni Camilla ang oras. Kinakabahan siya. Ngayon na ang gabing kung kailan magkikita na naman uli sila ng maangas na bilyonaryong si Hendrick Montemayor.

Ngayong gabi nga ay isasama siya nito sa Montemayor Cruise. Kinakabahan siya kung ano pa ba ang ibang plano ng lalaking iyon sa kanya, pero bahala na.

Bahala na, ang importante, okay ang kapatid niya. Walang ibang importante kundi ito.

"Kara, aalis muna si Ate, ha?" Nilapitan niya ang batang babae na nakaupo sa hospital bed, at hinalikan sa noo.

Ang maputlang pisngi ni Kara ay maaliwalas. Kahit may dinaramdaman ito ay pilit na lumalaban. Wala siyang karapatang sukuan ito. Ito ang pinagkukunan niya ng lakas. Ito na lang ang natitirang yaman niya sa mundo.

"Babalik din ako. Kailangan lang munang magwork ni Ate, okay?"

Ang alam nito ay may trabaho siya, never niyang ipapaalam dito ang totoong dahilan.

"Babalik ako bago ang operasyon mo," pangako niya.

Gaya nang sinabi ni Hendrick Montemayor, wala siyang dapat alalahanin tungkol sa kalagayan ni Kara. Bukod sa inilipat sa Montemayor Hospital ang kanyang kapatid ay nasa isang private room pa ito ngayon.

[ You are reading an old JFstories ]

Komportable ang  kwarto ni Kara na ni sa hinagap ay hindi niya akalaing maipaparanas sa kapatid. Mayroong sariling ref, aircon at sariling banyo ang  kwarto. May flat screen tv din at isa pang kama para sa bantay nito. Bukod sa priority si Kara sa Montemayor Hospital ay meron pa itong personal nurse na magbabantay rito habang wala siya.

"Ingat ka po, Ate."

"Paano?" Sinulyapan niya ang personal nurse ni Kara. "Ikaw na muna ang bahala sa kapatid ko," bilin niya matapos isukbit sa kanyang balikat ang dadalhing traveling bag.

Tumango ang mabait na personal nurse na ang pangalan ay Aleny. Nasa mid thirties ito. Ipagkakatiwala niya muna rito ang nakababatang kapatid.

Lumabas siya ng hospital room at lumulan sa elevator. Pagkalabas ng ospital ay pumara agad siya ng taxi at
nagpahatid sa VIP Parking ng Montemayor Hotel.

Panay ang pakawala niya ng paghinga habang bumabyahe. Nanlalamig ang kanyang mga palad. Nang pumasok na sa VIP parking ay natanaw agad niya ang mga unipormadong lalaki, in all black tux, na papalapit.

Pagbaba niya ng taxi ay sinalubong siya agad ng mga ito. Kung hindi lang kagalang-galang ang itsura dahil sa all black tux ay baka himatayin siya sa kaba. Hello? May mga baril sa tagiliran ang mga ito.

Feeling tuloy ni Camilla ay kikidnappin siya. Pero sa itsura ng mga ito, mukhang may mas pera pa kaysa sa kanya.

"This way, ma'am," narinig niyang sabi ng isa sa mga ito. Kinuha ang dala-dala niyang bagahe.

Inalalayan siya patungo sa midnight black Lamborghini na nag-iisa sa sulok ng malawak na VIP Parking lot ng hotel.

Nanginginig na nagsimula na siyang humakbang papunta sa gilid ng mamahaling sasakyan. Hindi niya malaman kung may tao ba sa loob dahil heavily tinted ang mga salamin.

Inilagay ng mga nakaunirpomadong lalaki ang travelling bag niya sa back compartment. Ang isa naman sa mga ito ay pinagbuksan siya ng pinto sa passenger's seat.