هوة ديدكها فتحتها
عهد: صباح الخير
اسامة بابتسامة: صباح النور
عهد: تفضل
دخلت وهوة يمشي وراي فتت للاستقبال والنوب للصالة حتى اعبر للمطبخ وبابا كاعد بالصالة من طلعت افتحلة الباب جان ديغسل بس هسه كاعد وكفت
عهد: صباح الخير بابا
اسامة: صباح الخير عمي
ابو ايسر: صباح النور
اسامة ضل متوتر واني خجلانة
ابو ايسر: تفضل للمطبخ احسب البيت بيتك اخذو راحتكم
اسامة: تسلم عمي
دخلت للمطبخ ودخل وراي اسامة
عهد: تفضل اكعد
كعد والابتسامة متفارق وجهة طفيت الطباخ وشلت القوري صبيتلة جاي وصبيت لنفسي رجعت القوري وكعدت كدامة
اسامة: ليش عود اني بيضتين وانتي وحدة
عهد: اني ما احب اكل هواية
اسامة: وليش فكرتي اني احب اكل هواي
عهد: تاكل لفتين ع الغدا معناها بيضتين ع الريوك
ابتسم : بسم الله
بدة ياكل واني اكل ضل يباوع علية ويا كل لكمة ياكلها اختنكت بلكمتي
اسامة: اسم الله هاج مي كام وكف اجه يمي يفرك ضهري
شربت المي ورفعت راسي اله: لتباوع علية والله انعمي
اسامة: اسف بس شعرج اول مرة اشوفه على طبيعته ومفلول
توترت ولا انتبهت شعري بدون شال رجع كعد بمكانة وياكل خلص استكانة
كمت وكفت
عهد: اصبلك بعد جاي
اسامة: والله ياريت
اخذت الاستكان غسلتة وصبيتله من جديد حطيته كدامة وبديت الم مواعيني هوة هم كمل
اسامة: عاشت ايدج
عهد: بالعافية عجبك بكل صراحة
اسامة: بشنو احلفلج مماكل هيج اكل من يوم وفاة الوالدة
ابتسمت : الله يرحمها يعني عجبك
وكف على حيلة واقترب يمي لزم ايدي رفعها وباس باطنها : لتعوديني على هل دلال ترة ماتحمل واسوي العرس الخميس
ابتسمت
اسامة: اريد اغسل
عهد: اي تعال
مشيت وهوة وراي الحمد لله ابوية طلع لغرفته يبدل وكفت يم المغسلة وهوة يغسل اباوع على كل حركة يسويها صفنت واني لازمة الخاولي بيدي
اسامة: عهد الخاولي
عهد: ها اي تفضل
نشف وعلك الخاولي واني غسلت وهو منتجي ع الحايط ويباوعلي شعري نزل على وجهي سحبة بايدة كبل وكفت وسحبت الخاولي هو وخر ايدة نشفت
عهد: انتضرني دقايق بس البس شالي واعدل مكياجي
اسامة: اوك انتضرج بالاستقبال
نزلت فرح شايلة صينيتها ومبدلة كامل هيه هم عدها كلية بس هيه تربية اساسية سنه ثانية
فرح: صباح الخير
اسامة: صباح النور
راح اسامة كعد بالاستقبال طبيت للمطبخ اريد اغسل مواعينه
فرح: عوفيهن اني اغسلهن انتي متلحكين
عهد: والله اخاف زحمة
فرح: امشي لج رجلج ينتضرج
بستها : والله وردة
طلعت من المطبخ باوعت للاستقبال لازم موبايلة ومبتسم دخلت بهدوء اشوفة على شنو يبتسم وكفت ورا شفته يباوع بخلفية الجهاز صورتنه واحنه نركص بالحفلة مال كطعان مهرنة ابتسمت رفع راسة واندارلي
اسامة: كملتي
عهد: ها
ابتسم: يلة ع السريع سبعة الا ربع
عهد: اوك
طلعت ركض لغرفتي حطيت مكياج خفيف لبست شالي والجاكيت شلت جنطتي وطلعت ويا طلعتي من باب الغرفة صادفت بابا ديدك باب غرفتي
عهد: ها بابا
ابو ايسر: راح تطلعين
عهد: اي بابا
مد ايدة بجيبة وانطاني ٢٥ الف
عهد: بابا عندي
ابو ايسر: اخذيهن بابا
اخذتهن حطيتهن بجنطتي باس راسي بست ايدة ورحت للاستقبال وكف على حيلة
عهد: جاهزة يلة
اسامة: يلة
عهد:بس لحضة
مديت راسي من باب الاستقبال: ماما رايحة
ام ايسر: الله وياج ديري بالج على نفسج
عهد: اوك ماما باي
طلع كدامي وطلعت ورا فتحلي باب السيارة يا الله احس نفسي اميرة ابتسمت وصعدت صعد هوة هم وساق السيارة اول مرة اطلع ويا وحدنه خايفة ومتوترة وخجلانة مشينه مسافة خمس دقايق السيارة هدوء بس صوت التدفئة ينسمع شغل المسجل على اغنية قولي احبك ضليت ساكته ومدنكه راسي اباوعله من اطراف عيني يدك باطراف اصابعة ع الاستيرن ويا لحن الاغنية وكام يدندن ويا الاغنية قولي احبك كي تزيد وسامتي ...... ندار علية يباوع الان قوليها ابتسمت ودنكت راسي واني لازمة الجنطة بايدي وكاعدة مد ايدة طفى التدفئة وفتح الجامات الجو شهر ال ١٠ كلش حلو وعلى جانبي الطريق اشجار صرت ما اسمع غير صوت العصافير الي على الاشجار وصوت الاغنية درت وجهي على جهة الجامة اباوع للاشجار مد ايدة وسحب ايدي من حضني وحطها بنص ايدة وهو يسوق بالايد الثانية تشابكت اصابعي باصابعة وهو يدك باطرف اصابعة على ايدي ويا الحن طلعت موبايلي ورفعته داطك صورة ندار باوع للصورة طكيتها واحنه مبتسمين سديت الموبايل ورجعته للجنطة مرت اكثر من نص ساعة وصلنا كدام الجامعة وكف السيارة وندار علية باوع بعيوني طلع المحفضة من جيبة وطلع ٢٥ الف ومدها الي
عهد: عندي والله بابا انطاني
اسامة: عهد شكلنا
عهد: من احتاج اكلك
اسامة: عهددد
اخذتهن منه باس راسي نزلت من السيارة واني خايفة اول يوم الي. نزل وياي
عهد: وين
اسامة وهو يلزم ايدي: ماعوفج وانتي اول يوم الج
هو اني اصلا جنت خايفة انزل وحدي
عهد: ودوامك
اسامة: هسه اخابر اكوللهم راح اتأخر لينشغل بالج انتي تعاي
لزم ايدي ودخلنة للجامعة ضل وياي واحنه بالاجراءات دندخل لاول محاضرة
اسامة: خوما تخافين
عهد: لا
اسامة: امانه احجي الصراحة اضل وياج والله
عهد: لا والله ما اخاف
اسامة : اوك خلي جهازج مفتوح كل شوية اخابرج واطمئن عندج رصيد
عهد : اي
اسامة: بعد ممحتاجه شي
ابتسمت : لا والله بس سلامتك لتخاف علية
فاتت وحدة من يمي دتفوت للقاعة لزمت جتفي
المرة: شنو خايفة الحلوة
عهد: هاا
اسامة: عفوآ
المرة : اني الاستاذة عبير مبينة انتي طالبتي الحلوة
عهد بابتسامة: نعم ست
االاستاذة انتبهت للحلقات بايدنه: وانته زوجها خايف عليها
اسامة: اي والله
الاستاذة: لتخاف بعيوني اخليها عوفها تعتمد على نفسها
اسامة: شكرآ دكتورة يلة عهد ديري بالج على نفسج
عهد: اوك الله وياك
الاستاذة: مبين رجلج يحبج حيل
عهد: خطيبي
الاستاذة: الله يتمملكم على خير
دخلت للمحاضرة ورا ساعةونص خلصت المحاضرة خلال المحاضرة تعرفت على بنية اسمها ايلاف خوش بنية طلعت اني وياها كعدنه ع المصطبات باوعت لجهازي حاطته صامت امي داكه عليه واسامة داك مرتين وداز رسالة من تخلص المحاضرة خابريني خابرت امي سألتني على الدوام كلتلها عادي حلو والنوب دكيت على اسامة📞📞
اسامة: الوو
عهد: هلوو
اسامة: مو كتلج خلي الموبايل كدامج
أنت تقرأ
عهد❤ أسامة
ChickLitانا تلك الفتاة التي لا أومن بوجود الحب نهائيآ ...عهد... انا ذلك الشاب الذي لا أومن الا بحبها ....أسامة.... كيف سيستطيع اسامة تغيير نضرة عهد عن الحب تابعوو القصة تعرفون قرأءة ممتعة (( باللهجة العراقية))...... لا احلل لأي شخص بأعادة نشر القصة بدو...
