مرات الحلم والواقع يختلطون بداخلك لانك ببساطة تريد تعيش هالحلم وتريد تتشبث بي بكل قوتك ولانك ترفض ترجع للواقع ..واقع مؤلم بي بس جروح ودموع وذكريات مزعجة تخليك تكره وجودك .. مرات الهيبة والثكل بداخلك تموت وتبقى اطلال وتبقى روحك جريحة وزعلها يوميـة يسببلك وجع وصداع مزمن .. مرات تحجي وتسولف بس وية اشخاص من احلامك ..ناس اما افترقت عنهم او القدر خلاهم يبعدون بالموت .. وتكتشف انك تضل تطارد اشباحهم وتريد ترجع لعالـمهم .. هيج وضعي جان يومية ذكرياتي صارن يدكن الباب يومية اضطر انام بس شلون نوم .. نوم الا بمسكن وحبوب ..جان طبيبي وصفها بهدوء واني بكل عواصفي وزعلي بديت اخذها بكل وقت ..
تـمر الايـام وحال فرقد وحسن والعائلة حال لا يسر حبيب ولاعدو .. كانما انفاس فضل رادت وانعجبت بهالنوم الطويل وكانما عيونه قررت تغمض وتهرب وتنسى .. بقت حالة فضل مثل اول يوم غيبوبـة لكن طالت والناس بدأت ترجع لاحوالهـا بس اسماعيل ودجلة مناطريـن الغرفة ويتناوبون على الكعدة يمه ..
