ذات الرداء

باعني لأجل شهوة !!

#ذات_الرداء

بقلمي السيدة العلوية

الجزء 15

جنت حيل احب عشرتج رحاب .. تزعلين وتثكلين مع هذا جنت حيل احبج ورايدج .. مااذكر بيوم نسيتج حتى لو جان بيني وبينج الف محطة والف ميل مااذكر بيوم بخلت عليج بشيء .. ياجرح بعمري ولهسة جاي ينزف .. لاتتوقعين اني بعدني احبج او اريدج او اصلا اهتم بيج .. بس ندمان وحيل فشلان وفشلتي من نفسي على نفسي .. فشلان لان من يوم رحتي لحد هسة واني بأيدي جنت اخرب حياتي ..استسلمت لوحدتي وخليتج كدامي شي هزني واضعفني وخلاني مهزوم ..خليتني اضيع عمري وعمر اقرب شخص كان المفروض يكون الية بس بأيدي ابعدته وبيدي قسيت عليه .. معركتي وياج حيل طلعت منها خسران .. شحصلت اني من ذاك اليوم ومن ذاك الوجع والخيانه بيت فارغ لاحياة ولا ونس لاأبن يرتاح بيته ولا رجال يفرح من يلاكي ابنه .. ابني القسيت عليه وخليته يكره اللحظة لو كعدها يمي !! اني الغلطان .. اني السبب ..

أمال بصوت حنون وهي تركض ورى يوسف : يوسف انتضر ماما انتضر ولك لاتعبني

اسماعيل {ابو فضل } واللي انتبه لدخول أمال لبيته : هلة هلة باباتي اليوم اتأخرتو علية أمال : اعتذر عمي والله مقصرة حتى اليوم ماردت اجي لان حيل مريضة بس يوسف مايكدر الا يجي يم جدو ..

اسماعيل : ياروح جدوة تعال تعال ..

يوسف بصوت طفولي : اريد اطلع

اسماعيل: بس نتريك اخذك نفتر بالبستان

أمال : شنو عمي اليوم ماتروح للمحلات

اسماعيل: مالي واهس .. العمال يهتمون واني يجوز العصر أمرلهم

أمال : شبيك عمي خوما رجع الضغط يرتفع ؟؟

اسماعيل بتنهيدة وحسرة طويلة : وشنو الجديد ومنو اليهتم

أمال: ليش ياعمي انتو اهلي وعزوتي اني ماعندي غيركم ليش كل شوية واحد يوجع قلبي

أسماعيل اللي استغرب لهجة امال المحبطة : سلامة قلبج بابا شنو الصار

أمال : عمي لاتزعل مني الى متى عايف فضل وفرقد يلعبون بحياتهم .. يعني اكول لعمي يكول معلية واكول لبابا يكول همه احرار وانته شايل ايدك منهم ماتكولولي الى متى كلمن عايشلي دور العازب والراهب .. يعني شنو بيتنا محكوم عليه يضل بلا اطفال ولا سعادة ولا دنيا ..