ذات الرداء

قلب صغير

#ذات_الرداء

بقلمي السيدة العلوية

الجزء 9

{نرجع للماضـي .. حجي اسماعيل والد فضل .. خلونا نشوف وين وصلت احداثهم .. }

مرت اشهر على الانفصال بين اسماعيل ورحاب واخوية يومية جاي تسوء حالته ونفسيته .. ابنه من يوم اللي صار الصار وهو عندي وية ابني وبنتي .. اشهر واني واخوي مانتلاكة الا بالصدف لان حابس روحه وملتهي بالشغل ومنهك نفسه .. البيت مانعرف بي هو بي الا من نشوف الاضاءة مال غرفته بالليل الي كمنا نعرف شوكت موجود شوكت لا ..

ام فرقد:عيوني ماتشوف صرفة لاخوك

علي {ابو فرقد } شأسوي مثلا يعني شبيدي ..

ام فرقد : ماتودو لطبيب او احد اخوك يوم بعد يوم يحبس نفسه اكثر واكثر

علي : انته من كل عقلج تحجين ؟؟ اودي اخوي لطبيب حتى يكول بي شي ..اللي بي هو صعب ومو هين .. صعب من تحس بالخيانه وزوجته ماخلت بي عقل بسوايتها

ام فرقد : الله يسامحها مرة ابد ماجنت طايقتها نافخة نفسها على الرجال ليش !! بربك وحده مثل دلالها تحمد ربها وتشكره بس شنكول وشنحجي ينطي الجوز للماعنده اسنان

علي : اسكتي وروحي سويلي لكمة خلي الحك اروح اشوف ابو شهم بلكت يمر وياي

ام فرقد : دقايق والاكل جاهز ..

بعد فترة ..

ابوشهم {عمهم الثالث} :وينك ليش بطيت علية {تأخرت }

علي : بين ما اكلت لكمة وشربت جاي

ابوشهم : عفية رجال بس اكل وشرب حياتك

علي : هسة ابتليت اهتميت بروحي شوية ثم هسة شراح ينقص من الوكت

ابوشهم : امشي امشي .. باوع اخوك شيحجي تسكت وتخليني اتصرف وياه بطريقتي .. يلة وصلنا دك الباب ...

اسماعيل : كمت واني من يوم ذيج السالفة ماريد اشوف احد ولااحد يشوفني جاي احس بروحي ناقص احس بروحي رجولتي مجروحة ومالي عين ارفعها بوجه اي احد .. مرتي خلتني بوضع مااتمناه لااي احد . عزلت روحي ونفسي عن اخوتي ..اي اجتماع عائلي جنت اتجنب بحجة الشغل حتى دورة السنة مال الوالد ماحضرتها مثل كل سنه ولا سويت ثواب .. مااريد احد يباوعلي بشفقه لو يكول خطية مسكين .. تجيني لحظات اتمنى احظن فضل بس شيطان افكاري بدأ يخليني اختل ويختل ميزان فكري .. هااااااا اخاف مومن عندي ؟؟ هااااااااا اخاف هذا ابن حرام !!!!!! هاااااااا وهااااااااا والف حسبة موزينه تجي براسي مرات تجيني حالة اريد اروح اخذه من بيت اخوية اشمره باي ملجأ.. بس من اذكر شلون يناغيني جان تنمرد روحي .. نار بروحي تشتعل .. كلت من ابتعد عنهم شوية أهدأ لكن لاااااااا صرت التهي اغلب الوقت بالشغل .. شغلي كبر بس ساعة واكول لروحي المن تشتغل ومنو عنده ... ميخالف اشتغل يااسماعيل بلكت التعب يهدك بلحظة وتموت .. اطلع من الصبح وماارجع الا بتوالي الليل .. اكلي وشربي من برة .. بيوم رجعت تعبان واحس دماغي مصدع واوجاع بأسفل راسي من جهة رقبتي وعيوني حمر .. كلت خالي انام بلكت شوية استعدل .. نمت وغفيت شوية واحس الباب تندك