My Boyfriend is a Freak (Published under Pop Fiction)

3: Mira

"OMG, sis! Have you heard the news?" I just got back from a meeting, at pagkapasok na pagkapasok ko muli sa office ko ay bumungad sa akin ang umiirit na si Alexia, with Mavi and Hannah closely behind him. Mukhang kanina pa ako hinihintay na makabalik ng tatlo.

I rolled my eyes. Napaka-dramatic talaga nitong si Baklita. "Ano na naman 'yan, Alexia? Siguraduhin mong news-worthy 'yang sasabihin mo, ha?" pagbabanta ko sa kanya, siyempre, in a joking way.

"Aba! Hinahamon mo ba ang Reyna Chikadora na si Alexia? O sige, sabihin mo ngang hindi ito news-worthy?" nakapamewang na sagot ng bruha, sabay pakita sa akin ng cellphone niya. The screen showed an article from a certain entertainment website.

Binasa ko naman ang titulo ng article.

Dr. Vince Allen Montevilla, One of the Country's Most Eligible Bachelor, is Allegedly Getting Married!

Kung may kinakain o iniinom lang ako ngayon, malamang ay nasamid o nabulunan na ako.

Si Vince, ikakasal na? Kailan? And most importantly, kanino?

"Ano? Nagulat ka, 'no?" nakaismid na tanong ni Alexia.

Bago pa man ako makasagot ay nagsalita na si Hannah, na noon ay may hawak na isang yellow na mug. Kaya pala amoy-kape ang loob ng office ko.

"Ano ba kasi 'yan, ha Mira?" nakakunot ang noo na tanong ni Chinita. "Kanina pa namin kinukulit 'yang si Alexia na ipakita ang phone niya sa amin. Pero pinagpipilitan niyang dapat ay nandito ka rin. Napakaarte — dapat daw ay ikaw ang unang-unang makaalam ng balitang 'yan!"

"Siyempre naman! Because this news is about Papa Vince!" Tapos, sa gulat naming tatlo, biglang nag-"walling" si Alexia. "Jusko! Una, si Papa Vren, inangkin ni Mira. Tapos ngayon naman, si Papa Vince? Paano na ako?" Umaktong umiiyak ang loka, pero wala namang lumalabas na luha.

Nagkatinginan kami nina Mavi at Hannah at iiling-iling na tumawa. Sumunod ay nilapitan ni Mavi si Alexia at ginawaran ito ng isang batok. "Umayos ka nga! Napakadrama mo!"

"Aray naman!" pag-alma ng emotera naming kaibigan.

"Tutal, nandito na si Mira, pwede na ba naming malaman kung anong ganap tungkol sa ex-manliligaw niya?" Hannah demanded before taking a sip of her coffee.

Dahil sige pa rin sa pag-fake cry si Alexia ay ako na ang umulit sa title ng ipinakita niyang article.

Ilang segundo pa ay nagsimula na ang hapit na pag-ubo ni Hannah, na animo'y biglaang nalunok ang lahat ng laman ng mug niya.

"OMG! Hannah baby, are you okay?" irit ni Alexia na biglaang napatigil sa pagdadrama niya.

"Hala! Hannah, anong nangyari sa'yo?" natataranta ring tanong ko.

Si Mavi naman, kaagad na nilapitan si Chinita at hinimas-himas ang likod nito.

It took a few more moments for Hannah to recover. Nang natigil na siya sa pag-ubo ay muli namin siyang kinumusta.

"What on heaven and earth happened to you, Chinita?" tanong ni Alexia habang nakapatong sa dibdib ang isang kamay. "Kinabahan naman kami sa'yo!"

"W-wala! Nasamid lang ako!" For some reason, Hannah found it difficult to look at us.

"Ganern?" Awtomatikong tumaas ang kilay ni Baklita. "Narinig mo lang na to be married na si Papa Vince, nasamid ka na sa kape mo?"

Nakatingin lang kaming tatlo kay Hannah habang hinihintay ang paliwanag niya. Pero sa halip na sumagot ay biglang namula ang pagkaputi-puti niyang mukha, na ikinagulat naman namin nina Alexia at Mavi. Nagkatinginan kaming tatlo na para bang iisa ang nasa isip.