عاهدتني

الثامن

#عاهدتني
للكاتبة ام مصطفى
البارت الثامن

اعاهدج لطول العمر مااعوفج
بس اريد منج تصيرين قويه حبيبتي 
وتتلتزمين بصلاتج
وتقرين قران دائما  
حتى يزيد ايمانج  وتؤم نين بقضاء الله وقدره
والنعم بالله 
حبيبتي كلنه نموت وكلنه ع هذا الطريق
هذا كاس لكل الناس
باقر اني ممعترضة ع موته
بس الطريقه الي مات بيها مروعة
كلما اذكر شلون يضربوه كدامي
اموت وگلبي يضل يوجعني
المنظر ميروح من بالي
حبيبتي  فاتن لعد الله يساعد سيدتي
ومولاتي زينب عليها السلام 
شلون  شافت الشمر وهو يصعد ع صدر الحسين
ويذبحه من القفا للقفا
شلون شافت اخوها الامام العباس
وهو مقطوع الكفين
شلون تحملت اولادها ينقتلون
شلون تحملت العطش والاسر
وراحت سبيه للشام
وتركت جثث اهل البيت ع الرمضاء   بله دفن...
وصبرت وتحملت وهي بنت بنت رسول الله
والي استشهدوا هم اهل بيت رسول الله
احنة لازم نقتدي باهل البيت وبالسيده زينب ع
ابوج اذا مات مضلوم  الله راح ياخذ حقة حتى لو بعد حين
واذا لا  الله يغفرلة ادعيله بالمغفره
والرحمة....
بقى باقر يحجيلي قصص
ويسولف وياي لوجه الصبح
بوكتها اول يوم مااصرخ
حتى اهلي جانوا متفاجئين
اني نايمه عبالهم
صليت صلاة الفجر
ونمت
كعدت لگيت امي وتغريد وابتهال جاية
يشدشدن بالاغراض مالت البيت
امي شافتني اجت يمي
هاي يمه صح النوم
شلونج اليوم
كتلها الحمد الله  احسن ماما
كالت اغسلي وجهج
حتى احطلج ريوگ
صاحت ع ابتهال
يمه توهة سوي لاختج ريوگ
شفتها سلمت عليها شلونج ابتهال
وباوستني
رحت غسلت لگيتها
خاله الصينيه بالكاع
وتصبلي جاي
اكعدي حبيبتي  تريگي
شويه گعدت نفسيتي مرتاحه
من كلام باقر الي
شكد حلو كلامة وقصصه
احسة مو شخص عادي
عبالك ملاك ونازل من السما
ترگت وكمت غسلت مواعيني
وبلشت وياهم
عمو ابراهيم اجه
كال لكيت بيت وفارغ بعد عنه دربونتين
وتفقت وي صاحب البيت وانطيته
مقدمه ايجار
وسلمني المفاتيح
امي گالتله اني شددت
ان شاءالله  لليل
نشيل نص الاغراض
گلها الله يسهل عليكم
صاح علي فاتن ها بنيتي اليوم شلون صرتي
لا عمو الحمد الله  احسن
دووم يارب
گال حسين وين
امي جاوبته طلع يشوفلة شغل
هاي من صارت الحادثة والهسه  كاعد
بطل من شغله
وضل يدور ع شغل ماكو
ان شاءالله  يلگه شغل
اروح وارجع الكم وره العشة اجيب سياره حمل تشيل الاغراض
كل الهلا بيك والله جاي نكلف عليك
لا ام حسين لا دكولين هيج
انتم عايلة اخوي وهذا واجبي اتجاهكم
قابل اني مصخر عليكم
ربي يوفقك خويه
طلع عمي
امي صاحت ع تغريد يله تغريد
سوي غده بعد امج
وكفن حالجن بسع بسع
كمت وي تغريد كتلها اخذيني وياج
للمطبخ
بقت ابتهال هي وجهالها يم امي
واني وتغريد دخلنا للمطبخ
كتلها شراح نسوي غده
كالت سالگه فاصوليا
ونسوي تمن وشعرية
وسلاطة 
كتلها نعمة
اني شسوي هسه
كالت سوينه سلاطة
كتلها اي فتحت الثلاجة طلعت الخيار
وطماطة  وكعدت اثرم
گالت تغريد اوف يافاتن
مقهوره ع حسين
گتلها شبي كالت فلس مابجيبه
ويستحي ياخذ من خالتي
تعرفين هو جان ع اليوميه ماعنده غيرها
ويصرفها يوم بيومه
وهسه يدور ع شغل ماكو
ابو المطعم مقبل يرجعة وياه
يكله جبت غيرك
وهو ضايج
يريد شغل وماكو
كتلها الله كريم خطيه حسين هالنوب
شال حملنه اكيد يحس صرنة بمسؤليته
گالت اي والله 
هيج يگول
اووف وين جانت هاي النه
الحمد لله  والشكر ع كل حال
صدگ فاتن شنو شكلج باقر
ما گال شي هو بس واعدني مايعوفني. وكال صحتج اهم من البيت
واني موجود وين راح اروح قابل
وبقى يصبر علي ويحجيلي قصص اهل البيت والانبياء
والله هالباقر خوش ولد الله يوفقة
صدگ فاتن ليش متحاجيه يشغل
حسين وياه
هو مو عنده معمل مال شرابت
اي عنده
اي دگليله
وج شلون اكله استحي
لا عيب
اوف صدگ عيب بس والله حسين
نفسيته تعبت كلش
خلصت كتلها تردين شي
گالت وين كتلها صاعده لغرفتج اخابر باقر
لان واعدته اخابره الصبح واطمنه عليه
شويه وراجعه
واذا امي سئلتج
كوليلها
صعدت تلم باغراضي
كالت اوكي
طبيت لغرفتي اخذت المبايل وصعدت
دكيت علي بسرعة جاوب
صباح الخير 
صباح النور
شلونج اليوم لا بفضلك زينه
مو فضلي بفضل الله انتي زينه
ودوم زينه
والنعم بالله
شنو الاخبار يمج
والله جاي نلم بالاغراض بالليل نحولهن
عمو جان يمنا وراح
وهسه ابتهال وجهاله عدنه
وحسين طلع يدور شغل
ليش يدور لعد وشغله
مو بطل وبعد ماقبل ابو المطعم يرجعه
هااا
زين اذا اشغله وياي يقبل
كتله هاا والله ماادري انت گوله
اي اشوفه واكله
يله اني اروح كلت بس اطمنك علي
زين يله روحي
بس مو تكطعين خابري
والمبايل لا تغلقيه
ان شاءالله 
نزلت فرحانه
بلكت باقر يشغل حسين خطيه
كلت لتغريد هيج باقر كال
كالت اي يا الله بلكت يشتغل وياه
ربي يوفقه
شويه واجه حسين ضايج كولش
سلم وطب غسل وغير ملابسه
واجه امي سئلته شسويت
گلها ماكو شغل تعبت واني ادور
احسن شي اشتغل لوعماله
لو حمال
امي كالتله شلون حجي هذا شنو عمال شنو حمال مامجبور
الحمد الله حاليا عدنه جم فلس جوه ايدنه
يمةة بس راح نگعد ايجار يعني يراد فلوس
الله كريم يمة ربك يدبرها
عمك دفع اول شهر
ونشوف بلكت ينباع البيت
بس مال حمال لا يمة مامجبور...
صبينا الغده وكعدنا ناكل....
لليل اجة عمي براهيم
وابنه الجبير جواد و مصطفى  ابن عمي
عمي جان عنده ٣ ولد وبنيه وحده
جواد مزوج
ومصطفى وامير بعدهم
والبنيه اصغر مني
دخلوا سلموا 
سلمنا عليهم
عمي گال جاهزين اجرت سياره
وجبت الولد وياي حتى يساعدوكم
حسين كله ماعدنه شي مجهزيهن
كامو يطلعون بالغراض
التمو الجوارين بالباب علينا
سمعت صوت باقر يحجي وي حسين
والولد يحملون علاوي ومرتضى وجواد ومصطفى
واحنه اناوشهم
شوية طبوا حسين وباقر هم يشيلون بالاغراض
باقر شاف ولد عمي
احسه تنحس
وكل شويه يأشرلي فوتي جوه
وامي دكلي ناوشيهم
وضليت بحيره
اخر شي احسه ضاج وطلع وكف بالباب
شالو نص الاغراض وراحو وامي ومرتضى وعلاوي راحوا وياهم
طب حسين صاح ع باقر فوت
گله لا والله اخذوا راحتكم عندي شغل
راح وفات حسين
كال لتغريد يا الله فرجت
گالتله خير
باقر راح يشغلني وياه وشهريه زينه
راح يطيني ٥٠٠الف بالشهر
بس شفلتي مراقب ع العمال
اي الف الحمد لله  مو گتلك هسه تفرج
اي والله  الحمد الله  والشكر
اني كلت خلي اخابر باقر اشكر منه
كلش فرحت من شفت حسين فرحان
اجيت لكيت المبايل يدك
بسرعة جاوبت
گال ليش تعاندين عود
كتله شنو شكو
اني مو أشر الج اكلج فوتي جوه
ثوبج لازك عليج
وشعرج طالع من كدام وانوب ادنگين
انت متفتهمين
متعرفين تسترين روحج
لشوكت تبقى اعلمج  تره مو صغيره انتي حتى ابقى اعلم
جان عصبي ويحجي بصياح
گتله ع كيفك باقر تره ممتقصده
وبعدين همه ولد عمي وين افوت منهم
اصلا عادي عدهم يطبون ويطلعون جوه
وانتي متعرفين تسترين روحج بثوب عريض
لو اله لزگ
هي هاي ملابسي
قابل البس هدوم امي
اي البسي هدوم امج شبيهن
گتله انت الظاهر عصبي هيه بعدين اخابرك
يله مع السلامه
وسديته صدگ غثني
وخنگني
ع كلشي يحاسب ويركز
بقيت اباوع ع ثوبي
عادي الثوب
حتى مو لازگ مثل ميكول
انقهرت منه
حجيت لتغريد
گالت خطيه يغار تره
گتلها مو شغلة يغار
بس هو شكوكي ومعقد
اختنكت منه
هاي هيج ع طول
هذا ضيك وذاك قصير
وهاي لا تمشين وياها
ولا تضحكين
والبسي عبايه
ودنكي من تمشين
والله خبلني 
گالت صراحة  الي تاخذ شخص مثل باقر
لازم تتوقع حتى يلبسها بوشي
لان همه المتدينين
هيج اكثر شي يركزون ع لبس المره
وتصرفاتها
فانتي كلشي توقعي
صراحة تغريد ماادري اني مااتحمل هيج ابد
يمة يعني العمر كله هيج يخنگني
بعد انتي بكيفج مو تحبي
اليحب يتحمل كولشي
حتى يرضي محبوبة
وهاي المشكله احبه
تره ماكو مشكله عادي....

رجعوا اهلي وامي كالت البيت زين نضيف وجبير
وباجر الصبح ان شاءالله  نتحول
بيه
احسين گال لامي ع شغله وي باقر
امي كيفت وضلت تندعي لباقر
بالليل ردت اخابره
گلت لا خلي يهدأ خاف هم يعصب علي
رحت نمت يم امي
ونفس الحلم اجاني
وهالمره هذا الي دفرني
يريد يقتلني بالحلم
سحب سلاحة علي
وكمت اصرخ
طفرت امي
وضلت تقره علي المعوذات
وضليت ارجف
خفت لا يرجعون صدگ ويكتلونه
گتلها يمه خلي نطلع من البيت من الصبح
بعد مااريد ابقى هنا فدوه
كالت من الصبح ادزج واحنه نجي وراج
وللحكاية بقيه
ام مصطفى