عاهدتني

١٧

#عاهدتني
للكاتبة ام مصطفى
البارت السابع عشر

.... فاتن.....
يعني كدرت اطلعه من الحزن الي جان بيه
الف الحمدلله 
حبيبي  شكد يحبني لعد
رجعت لغرفتي  ردت اخابره
بعدين كلت لا خلي فتره يرتاح وهو راح يخابرني
اكيد راح يشتاقلي 
ثاني يوم داومت 
وطلعت درجاتي  الحمد لله  داخله بكلوريا
كلش فرحت ورجعت فرحت امي
تمنيت افرح باقر 
بس انتظره هو يخابرني
مااريد اضغط عليه
بهاي الفتره كعدت من المدرسه لان عطلة انطونه قبل الامتحانات
بدينه نحضر لدورة السنة مالت ابوي
حسين اخذ سياره جبيره
وامي اشترت ذبيحة وسوة غدة بثواب ابوي
حسين عازم باقر  ع دورة السنة
وعازم عمي وولده 
وجيرانه الجدد 
بدينة  نصب
واجوي بيت عمي كلهم
واني عيني ع الباب  اريد اشوفة يجي لولا
تغريد: ولج انتي سويلج شغله
لا والله افتن عليج لخالتي 
فاتن.  شبيج تغريد مو جاي اشتغل
تغريد.  لج وينج صافنة ومگابله الباب مالت الكليدور
لو ادري مكتلج حسين عزم باقر
تحركي تحركي سويلج شغله
شوفي عمتي انكسر ضهرها وهي تطبخ
واني بطني لخشمي
وطاح حضي وانتي تصفنين
فاتن..  شبيج والله ادي متاخذ ع شغله
اريد اشوفه يجي
والله اذا اجه اغسل كل الاماعين وحدي نذر علي
ضربتني تغريد ع راسي وج امشي احنه هسه بحال نذور
امشي
ام حسين..  شبيجن واكفات وعايفات الشغل شجاجن الناس تريد غده
فاتن..  اي خاله جايه بس فاتن ضاله واكفه واجيت اجيبها تساعدني
ام حسين..  اي فاتن اعرفها تحب تسخت
ولا دكول عدنه خطار
كامت مرت عمي
فضيله..  شعدكم اني اساعدكم 
ام حسين.. لا خيه استريحي  شعدنا قابل
هي بس تصب عود عشتو
بس فاتن من يوم يومها بارده
فاتن.. اني ماما
زعلت  😢
ام حسين..  اي انتي ولج يله امشي كدامي
اشرت ع فاتن بسيطة اعلمج
مدت لسانها تعيب علي
رحت طلعت المواعين  شطفتهن
وكمت اصب تمن وفوكاه شعريه
وحبشكلات
وامي تخلي لحم فوكاه
شويه واجه حسين ها
خلصتوا
كملنا صلاة
كالت امي  كم واحد همه حتى اصبب ع العدد 
ضل يحسب
حسب باقر
اني فرحت وابتسمت
تغريد غمزتلي المواعين كلهن عليج تره
بلعت ريگي تره جنت اشاقة
والله انت نذرتي النذر نذر
ههههههههههه حل
اي عادي فدوه لعينه يستاهل اغسلهن لخاطر جيته
وج اسكتي فضحتينه ع كيف احجي
اجت نوسه ورانه
انطوني اناوش للولد
اعرفها مميته ع الشغل
تريد تحجي وي علاوي
كتلها اخذي عيني  وحطي بيد علاوي الماعون مو لغيره
وضحكت الها
ولي عابتلج لعد شعندي غيره
اخذت ماعونين وراحت
وبدوا يشيلون واحنه نصب
ومصطفى كل شويه كال فاتن ناوشيني هذا وذاك
طاب طالع
يجيب وويدودي
لحد ماكملنا للرياجيل
انوب صبينا سفره النه النسوان
امي خلت كيتلي الجاي ع الطباخ
وكعدت ويانه
شفتها تاكل كلت اكوم اني احضر الاستكاين
وبلكت اشوف باقر من يطلع يغسل
لان جانت المغسله بالحوش
وباب المطبخ كبالها 
دخلت للمطبخ  اغسل بالاستكاين
دخل مصطفى  للمطبخ  جايب اماعين
وكف يمي
جان باب المطبخ ع الحوش مالتنه وبصفه باب الكليدور الي يطلعون منه من الاستقبال
كال اكلج خاولي  كتله موجودات ع المغسله هذنيج شوفهن
ها زين
فاتن اريد اسئلج 
كتله كول ليش رفضتيني
كتله جاي تشوف وكت هالحجي
سكت كال صح مو وكته بس والله ضاله ابالي
حسين فات للمطبخ  كال صيني  اجيب المواعين بيها
شاف مصطفى واكف كله انت داك سوالف هنا 
غير تجي تشيل يمعود
كله اي جاي ديحجون
وفات باقر بيده الخاولي مغسل
باوعلي وباوع لمصطفى
خزرني 
يمة خفت من يمي  خرب حضي شسوي
شجابني هسه اني بالمطبخ 
راحوا ثنينهم
ورجع مصطفى
اكلج هذا باقر مدري شسمة
ولا حبيته شايف نفسه وكروه ومعقد
قال الله وقال الرسول جنه من جماعة اسامة ابن لادن
كتله مااسمحلك تحجي ع باقر
كال لا بله  وشدعوه
كتله عشرة عمر جيرانه
وولد اخلاق ومتدين  ودارس وفاهم
شنو تشبها بالارهاب
ع كيفج عيني  شبيج كمتي ترجفين
سكتت بس صدك احس نفسي كمت ارجف
بدي اكله لمصطفى
يقلد
تروحله فدوه 
ماغيرك الارهابي
صبيت الجاي اجه امير ابن عمي
اخذه
ومصطفى لا طش بالمطبخ
اجت نوسه كالت اساعدج كتلها اي والله ياريت
كامت تعزل بالاكل الزايد
وتناوشني اغسلهن ع المغسله
اجه مصطفى
ها اساعدكم
كتله  🙄😏 الله وايدك
وكف يسولف ويشاقي، بنوسة
ومصطفى واكف عادي
ع اساس بعد علاوي خطيبها
وهو واكف عينه ع حركاتي
مال خي حضي
دشوفيهم شلون مندمجين
شوكت الله يهديج علي
ع شنو مصطفى انت مثل اخوي تره
كوه خوما كوه الحب
واجلف حيل بالمواعين
طلع باقر
مدري شحجه مصطفى
واني عيني عليه
باقر طلع سلم وراح واني اباوع من وره البرده عليه ردت بس يدير وجها يشوفني
ماكو
مصطفى كال مو احجي وياج
كتله هااا شنو شكلت
رفع البرده
شاف باقر يطلع
خزرني وطلع
خب حضي اني ضابه عباد الله بس تخزر بيه
اغسل وادردم وي روحي
ونوسه تبسبس وي علاوي
درت وجهي عليهم
احممم
وين مساعدتكم عيني
اشو بس تسولفون
يله كملوا لا اصيح عمو عليكم
نوسه...  شبيج فاتن  هسه كلهن اغسلهن
كتلها امبين
طلع علاوي
كالت سم كله من وراج طلع 
ديلله يلله كملي
رجع مصطفى شعندج وياه
منو
هذا الجنه وهابي
شبيك مصطفى
ترى اني مو غبي  گولي شكو بينكم
وليش تراقبيه من يطب ويطلع
تره يتخيلك ماكو هيج شي
لا ميتخيلي
مساعة من حجيت عليه تخبلتي عليه
اي عادي عشرة عمر  جيرانه ونحبه
ها تحبيه
اني مكلت احبه كلت جيرانه ونحبه عادي
شتحبين منه جنه ارهابي لحيته ودشداشته وهو
امي فاتت كالت من الارهابي
كتلها ماما يحجي ع باقر
كالت لا لا حدك مصطفى تره هذا شيخ باخلاقة وديانته
هذا احسبه ولد من ولدي
ارهابي شنو لا عمه ماارضاها
باقر نعم الباقر 
عمه بس شكله جنه من جماعة ابن لادن
لا مااقبل هيج دكول
عيب  جيرانة هذا  اخلاق وادب وديانه
كل الناس تعرفة وتحبه
شدعوه سويتوه امام
اني بالنسبه الي مسويته مرجع
حتى عمك الله يرحمة
يكلي انت عندج باقر مرجع عوزج بس تقلديه
بكلشي ترحيله
لا مااقبل تحجي عليه
فشل هو وطلع من المطبخ
حلللل بردت كلبي امي بيه...

بيت عمي باتو عدنا
واجت ابتهال وزوجها وجهالها هم باتو عدنا
ع مود نطلع بالليل للنجف
حضرنا انوب ريوك ناخذه ويانه
ترسنا ترامز جاي
وامي لافة كبه بثواب ابوي
وكليجة
وسلكنه بيض
وحسين جاب صمون واحبان
وصعدناهن للسياره
وصعدنا
من الساعه ثنتين بالليل
وصلنا وي صلاة الصبح
دخلنا للامام علي ع
زرنا وصلينه بيه
بعدين دخلنا للقبور
من شفت المقبره عيوني مسكتت بس ابجي وامي تنعى ع ابوي
لحد ماوصلنه لكبر ابوي
جيتنا عليه
ونتصارخ
بويه يابويه 
شبعنا بجي كلش
ابتهال خطيه ماتت بجي 
يشيلوها وترجع
دكول ضلت لجمه بكلبي مات ومشفته
كوه عفنه الكبر وطلعنا
رحنا رجعنا للامام علي
صبينا الريوك وتريكنا ورجعنا 
الطريق كله بس دايخه وراسي يوجعني
من البجي والتعب والنعاس
امي كل شويه دكلي هسه
ينزل ضغطج ادري بيج
وصلنا للبيت
لفيت راسي ونمت 
ماكعد اله ثاني يوم
وكلها رايحه
عاد سويتلي اكل واكلت
بعدين كلت اروح اقره
امي كالت اي كافي  بعد تضيعين وقت روحي اقري بعد
كلشي منريد منج
دخلت للغرفة طلعت كتبي
مدري شلون اذكرت المبايل
كلت اشوفه بلكت مخابر
فتحته ولكيت مكالمات
ورسائل
فتحت اول رسالة كاتب
اطلعي من المطبخ لا تضلين واكفه
الظاهر دازها من شافني بالمطبخ
وثانيه
وينج جاوبي
اووي سودة علي حبيبي 
كل هذا واني ماادري
قفلت الباب  وكلت اخابره
دكيت عليه جاوب
وللحكاية بقيه ام مصطفى