الحلقة(5)
من روايـــة ..
#ممتلكَــات_عاـشق ✊💜
....
( تاااني يوم الصبــح )
( نزلـــت نجري أقووى من ســــرعة البرق .. )
طققطقطقطقطقط
مها :: ( فتحت باب دارها وهيا تحك ف عيونها ) خيرككك العفو ؟؟!
غصون :: ( بي وجه خاايف ومصدوم ) مصيـــبة ...
مها :: شن فيييه ؟!
.,,,/,,,.../
( ومن توتري ماقدرتش نحكــي بس لي مــها ف أتصلنا بي تهاني ونزلت وكلمت بتول أختي وقالتلي شويـــة ونجي وكلمنا ريهام صاحبة مـــها )
( وبعد ماجتمعـــو كلهم ف حوشي وف صالة حوش بي تـــحديد قــدرت نتكــلم .. )
,,,
( ف حـــــــوشي )
( كلهم مقعمزين ع صالــــون الا انا كنت واقفة وندور قدامــهم بي توتر وخوف ونحك ف أيديه ف بعض )
مها :: أأيواااه لي امتى هذا ... ت تكلمي عااد
تهاني :: منوضتيني من صبااح الله خير باش تحوسي قدامي زي نمووسه ... تي تكلمي
بتول :: غصوون تكلمي عااد كلنا قريب نهبـــلو .. شن فيه ؟
غصــون :: ( خديت نفس عميق وشبحتلهم ) تمامم تمام أسكتو واهدو شوية تو نتكلم
ريهام :: اممم .. ع اساس احنى المتوترين وانتي بسم الله عليك هاااديـــه جداً
مها :: غصون هيا حبيبتي .. ماتخلينيش نرتكب فيك جريمة يحكموني أعدااام ...
غصــون :: أأوكـ ,,, أسكتووو .. شوفو
البنات :: أي !؟
غصون :: أصيل اليوم بعتلي مسج .. يعني نوضت لقيــت المسج ع الفون متعي ... كتبلي فيه إنـــه يبيني نمشي لي شركة متعـــه اليوم ,,
مها :: ( تكلمـــت مها بي طريقة وكأنــــها مش فاهمـــه وين المصيبـــة ) أأي !؟؟ .. وين المصيبـــة ف الموضوع ؟
غصون :: ( شبحتلــــها بي عصبية وأستغرااب ) ورأأأس أمكـ أشبحي لي منضري شوية ... هذااا منضر أنسانـــه تخش لي شركــة ؟؟!ّ
تهاني :: أي فهمـــت عليك ...
( تهاني الام الحنونه بالنسبـــة ليا .. من يوم زواجي انا واصيل وهيا الانساانه الي تفهم عليا شن نبي من غير مانحكي .. وانسانه طيبة رغم انها حادة طبع شوية ... )
تهاني :: انتي تبي نسااعدوك ونجهزوك باش تقدري تكوني ف شكـــل مثالي لي مشيـــــة اليوم ؟؟ . صح !
غصون :: ( بي ضحكــــة طفولية ) ااااايوااه بي ضبط
بتول :: ( وهيا مستغربـــة وإبتسامة ع وجهه ) يعني انتي تبي تغيري شكلك ؟؟؟
غصون :: ( بي كل ثقـــة ) أأأي
ريهام :: هههههههههههههههههههـ مستحيـــــل ... يعني .. أنتي ماكنتيش ترضي ترقدي من غير نظارتك تبي تغيري شكلك توا ههههههـ
مها :: هههههههـ ’’ غصون حبي مركزة ؟؟؟ يعني مافيك شئ صح ؟
,,
( كان معاهم الحق أنهم يستغربو من طريقة تفكيري الجديدة .. لأنه غصون صاحبة العقل العنصري المتشددة بي مبادئ الضيعة .. تغيرت وبدت تبي تكون زي بنات اسطنبول وقررت اني نظهر جمالي المختفي ... يعني بي ألأصح قرررت وأخيراً أنــه نهتم بي روحي .. ونفاجأ أصيــل بي شكـــلي جديد )
..
( بعد دقائــق تهاني حطت خطـــة لي تنفيد عملية تغير شكلي الخطير هههههـ ,, وبعتت مها لي مصحة العيون باش تعرض الكشف متعي وأذا كنت نقدر نجي ونغير من نظارة لي عدساات .. أما بالنسبة لي بتول ف بعتتها تهاني لي مصحة الاسنان باش تحكي عن تقويمي الدائم اذا كنت نقدر نجي ونحيه ونستغنى عنه او لا .. و واخيراً وليس اخيراً ريهام الراقية تكفلت بي الملابس وقررت تمشي تاخدلي ملابس وطبعاً عطتها تهاني فلوس لي يوم الفلوس المهم يكوني ملابس حلوين ههههه .. و انا وتهاني مشينا وقعمزنا في كافي نستنو ف باقي العصابة ترد علينا خبر )
...
( وأحنـــي ف الكافيـــه حكيت لي تهاني كل شئ .. من يوم زواجي لي يومنـــا هذا وسبب تغيري )
,,
( الكــــافي )
,,
غصون :: ( بي أبتسامة هادية رغم شعور الالم الي يراودني ف كل مره نحكي قصتي الكئيبة لي غيري ) وبس ..
تهاني :: ( وهيا شــاده فنجان القهوة ومتأثرة وتشبحلي ) ي عمري انتي قـــداش ماتحملتي ... الرجال كلهم حيوانات حتى حبيبي عماد ..
غصون :: ههههههههههههههههـ ( أطلقت ضحكة حقيقه من وسط قلبي )
تهاني :: (ضحكـــت ) .,, أصيــل شخص كويس وانسان محترم .. وصدقيني لا مروة ولا غيرها ممكن تخلي اصيل يحبها بي الغصب ... صدقيني لو كل الي صااير هذا بينك وبينه ف اخر يومين ماكانش حب .. تعالي خودي مني شن ماتبي ..
غصون :: اوك نبي شحن الفون متعك جهزي من توا لانك بجديات تحلمي واحلامك وردية هلبه ههههههههـ
تهاني :: صــار حاطــه عينك ع شحن ي قريده هههـ
( رن فون تهاني )
...
تهاني :: ها طمنيني ؟؟َ!
مها :: ميه ميه شاف الكشف وقالك تقدر تجي اليوم ساعه 9 باش تنحي نظارة ويعطيها عدسات بس لازم يكشف كشف اخير عليها ..
تهاني :: تمام تعالي لي كافي *** احنى هنا ..
مها :: أوكـ ’’
,,
( شبحتـــلي تهاني بي جديـــه خالصــة )
تهاني :: أنتي كلمتي أصيل ولا ؟!
غصون :: لا !
تهاني :: ي حماره كلميه .. قوليله بنجي لكن متأخره شوية ..
غصون :: تمام ..
................
( نوضــت كلمت أصيل وقلتلــه وماكانــش عنده مشكله .... وبعدين أتصلت بتول وقالت أنه دكتور يراجي فينا وخدت موعد ع ساعة 10 .. )
,,
( وبدت الرحلـــــة ,, مشيت أولـ شئ لي مصحة العيون ودكتور كشف عليا وعطاني عدسااات ... وبعدين مشينا لي مصحة الاسنان وبالنسبة لي سنوني ف مشكلتهم مش كبيرة لانه عالجتهم كل موضوعهم انه المفروض إنحي تقويم ونفس شئ قالي انه سنوني كويسااات ومش بي ضرورة نخلي التقويم ونحهولي ... وبعدين أنتقلنا للجزء المضحكـ ف رحلة >>
....
( ف الكوافير )
,,
تهاني :: غصووون بتقعمزي والا واللهِ نقتلكـ ’’ يالله
غصــون :: مانبيش ... خلي شعري هكي ... يعني مش متعودة نفتحه ونستشوره .. خلاص خليـــه هكي
تهاني :: غصووون ... ( بي عصبية )
بتول :: حبيبتي ... مش انتي الي قلتيلنا سعدوني ونبي نغيـــر شكلي ؟؟ ( بي هدوء ورقة )
غصون :: أأأي ( بي نفس الهـــدوء )
بتول :: ( بي عصبيـــة ) اي معنااااها هيا قعمزي وصكري فمك مش وقته تبوديع متعك ...
,,,
( قعمزت وسلـــمت نفسي للمزينـــة ...)
,,
( وبعدين أنتقلنا لل جزء الاخيرة من رحلتي .. وهوا الحوايج ... ريهام شرت حوايج هلبه .. خشيت لي دار من كثر شكااير معاش فرزت شئ هههـ ,,
( وبدو البنات يجهزو فيا وماعترضتش ع شئ .. سلمــت نفسي وقررت نتغيــر فعلاً ع خاطر أصيـــل .. ماحبيتـــش إنــه نحشمــه قدام صحـــابه والموظفين .. رغم أنه قالي تعالي بدون مايحسب حسااب لي حد )
,,
( وبعد ماجهزت تماماً ,, لبست شورت سمواي .و تيشرت أبيض وفوقـــه بلوز أحمر .. ودرت شعري نص مفتوح ونص لا مع مكيااج هادي وحلو ... يعني خليط بين النزاكــه وسبور )
,,
( وصلتنـــي مها لي شركـــة )
مها :: لو كملتي و أصيل مزال كلميني نجي نروح بيك .. أـوك؟
غصون :: ( بي خوف ) تمااام ..
مها :: ( كنت نازلــه من سيارة ) استني استني
غصون :: خييير !؟
مها :: حبيبتي الحلوة ماتنزلش هكي ... انتي طالعه أطيري العقل وتبي تنزلي بي الكئاابه هاذي كلها ؟!
غصون :: ( أطلقت ضحكــة بي دافع سخرية )
ههههههههـ ,, هكي كويس ؟!
مها :: هههههـ اي ي هبله .. انزلي انزلي لانغير راي ونروح بيك ..
غصون :: بااي ..
,,
( نزلــت وقعدت أكثر من عشرة دقائق وااقفة ومرتبكـــة لبس مش لبسي وشكل مش شكلي ونحس ف ناس تشبحلي تقولي كنت ف قبر وطلعت منه ,, نشبح للمبني الضخم الحلو الي قدامي ومصدومة فيه ,, وبعدين خشيت للمبنى هذا ,, ومشيت بي خطوات لي الاستعلامات وسألت عن مكتب أصيل و قالولي انه ف دور تاني ,, ركبت لي دور تاني وكان في سكرتير ف بداية الممر ,, )
,,
غصــون :: سلام ؟!
السكرتيرة :: ي اهلين .. تفضلي بي شن نقدر نخدمك ؟!
غصــون :: ( الواضـــح انه سكرتيرة ف وقتــها ماعرفتنيش رغم انه ف عرسنا جو كل الموظفين وانا مذكرتها سكرتيرة .. بس طبعاً شكلي جديد يخلي حتى عمتي تسألني من انا ) , انا غصون .. وجايه نبي نشوف أصيل ..
السكرتيرة :: ( بي فرح عميق ) اااه مدام غصون .. ي اهلاً وسهلاً ,, أسفة ماعرفتكش ..
غصون :: ههـ ولا يهمك عادي .. اصلاً حتى انا ماعرفتش روحي ( قلتها بيني وبين نفسي بس بي صوت عالي )
السكرتيرة :: عفواً ؟!
غصون :: ههههه لا ولا حاجة ..
السكرتيرة :: هه .. سيد أصيل يستنى فيك .. هوا المكتب الي ف اخر الممر تفضلي معاي
غصون :: لا خليك انتي كملي خدمتك .. بس وريني وينه وانا نمشي
السكرتيرة :: اوك هه ,, المكتب الي ف اخر الممر الي بابه اسود .. شرفتي مدام ..
غصون :: ( بي أبتسامة ) شكراً ,,
,,
( وقدمـــت خطواتي إتجـــاه مكتب أصيـــل ,, أحياناً يقولو بعض الناس أنـــه مهمـــا كـــانت فرحتنــا كبيــرة بي الحيــاة وحلاوتــها لازم يدخــل القــدر ويقلب كل شئ باش نحــس فعلاً بي الحيــاة الحقيقـــة وتعاستـــها )
( كنت مستمرة ف المشي بي سلاســـة تامــه وماكنتـــش نعرف إنــه القدر مجهزلي شئ عكس شئ الي كنت متوقعاته )
,,
( ولمـــا وصلت لي مكتب أصيــل كان الباب نـــص مفتوح وكــان وااضح انه داخــل المكتب في نقاش حاد دُكر فيه إسمي شدنــي وخلاني نوقف قـــدام الباب غصــب عني للأستماع الي باقي الحديـــث ,, )
,,
غصــون :: ( وقفت وبدأت علامات الاستغراب تحظر الموقــف) ,, !!
..
( داخــل المكتب )
مروة :: ي أصيــل علاش تكذب علي روحكـ وعليا وانت عاارف انه هذا مش صح ..
أصيل :: مروة لو سمحتي للمره الالف ح نقولك أسكتي .. المره الجايـــه ح يكون ليا تصرف تاني معاكـ ,,
( كانــــت العصبيــة واضحةة في حد صوت عند أصيــل )
مروة :: تمام ,, تمام ... شوف انا عارفه انك طلعت معاها اليومين الي فاتو وخصصتلها أيام حلوة ولحظاات حلوة .. بس هذا كلـــه كان بي داعي شفقـــة مش أكثر ,,
أصيل :: ( ساكـــت )
مروة :: حبيبي انت تحبني انا وبس ... بنت زي هذي مستحيل تشغلك .. صح ؟؟؟ ,,, أصيل رد .. انت زعلان عليـــها بس .. ولا ؟
,,
( هنا أطرت نغمات الاغنية تحظر ... وعذااب الكلماات يقطع شراين قلبي .. و سكووت أصيــل كان شبه بي موت ليا )
( أغنية # sonumuz bu mu? التركية )
أصيل :: ( ساكت )
,,
مروة :: تحبني انا ولا ؟؟ .. أصيل انت تزوجته غصب واانا عارفه انك عمرك ماقربت منها لانك تبيني انا وبس ...
أصيل :: ( تلفت لي جيهة روشن وقعــد يشبح لي دنيا برا )
مروة :: أصيل لو سمحت .... غصون مجرد بنت عادية خشت حياتك وح تطلع منها ... سنين هذي كلها ماحد خش قلبك الا انا
,,
( حضرت دموعي واخيراً ,, وحطيت ايدي ع فمي وكأنــــي كنت نمنــع ف صوت يطلع ,, )
..
( لفيت ومشيــــت من غير وعي من غير مانلاحظ انااس من جنبي .. انا ونغمات والكلمات والاحاسيس المؤالمـــة بس كنا موجودين ... كنت وكأني حاطـــه ضباب ع ناس وماكنتش حاســه بي حاجـــة ,, أصيل خلاني نحلــم ونحلم ونغير من نفسي ع خاطــره وف الاخيره بنت زي هذي تتكلم هكي وهوا مايقولش ولا كلمة )
,,
( ف مكتب أصيـــل )
أصيــل :: ( بي عصبية ) مروووة ... خلاص .. قتلك لو تكلمتي اكثر من هكي ع غصون مش ح تلومي الا نفسك .. وبالنسبة لي احساس الشفقة الي تحكي عليه .. انا عمري ماحسيته الا توا .. اتجاهك انتي ... زعلان عليك كيف تفكري انه قاعد نحبك ... انتي تحسابي لو انتي قلتي انه امي كذاابه ح نصدق ... بس حقيقه انك خنتيني هذي مستحيل تتغير .. وزواجي من غصون كان بي رضاااي .. وانا توا مش حاس بي شئ اتجاه غصون الا احساااس وااحد .. ولي هوا الحب
مروة :: ( ف صدمـــة تامه ) ,,
أصيل :: ( بي غصـــة العشق الحلوة وبي لكنة الحنيــه القاتلــه) أنا نحبــــها ... نحبـــها فهمتي ؟! ,,,, أطلعي مروة
,,
( ف صالة الشركة )
( كنت طالعه ومش حاســـه بي شئ ... العصبية والدموع والحزن والخوف وخيبــــة الامل كلهم كانو موجودين ومش مخليني نركز ع حد ...
( ف لحضتـــها نخبطت ف علي صاحب أصيل و سبحان الله عرفني طـــول ... سألني خيرك شن فيه بس مارديتش وطلعت نجري ,,
,,,,,,,,,,,,,,,,,,,
( ركــب علي يجري لي مكتب أصيـــل ,, فتـــح الباب وخــش)
,,
علي :: أصيل ؟!
أصيل و مروة :: ( تلفتو زوز )
علي :: شن فيـــه ؟! ,, غصون خيرها طلعت مضاايقة ؟!
أصيل :: غصون ؟! .. وين ؟
مروة :: ( ساكتـــه )
علي :: توا شوفتها طالعه من باب شركة وكانت تبكي ... أحكي شن فيه ؟!
أصيل :: ( شبح لي مروة ,, وطلع )
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
( سرعـــة أصيل باش يلحق عليا ماكانتش أكبر من سرعتي وانا نجري باش ركبـــت في تااكسي ,, تفجرت وقعدت نبكي حكااايات المسلسلات صارت معاي صاحب تاكسي قعد يشبحلي وانا نشبح لي روشن ونبكي ونذكر ف كل كلمــة من أصيل ... )
,,,,,,,,,,,
( وصلــت لي حوش بتول ... نزلت وانا كلي هموم دفعت لي صاحب تاكسي ومانعرفش شن عطيته وشن ماعطيتاش .. خشيت للحوش وكانت بتول واقفة تشبحلي وتسأل فيا وانا ماسمعت شئ ركبت طول لي داري )
,,
( خشيــت لي داري وتلوحـــت ع سرير وقعدت نشبح لي سقف ونبكي بي هدوء تااام ... نتفكـــر ف كلام أصيــل لما قالي انه ماحسش بي شفقة إتجاهي ... ندكر ف كلام مروة وكيف أصيل ماردش عليا بي ولا كلمة .. جمعت ع قد مانقدر من كلام وأحداث )
..
( بعد دقائق معــــدودة طق الباب )
بتول :: ( فتحت ) أصيل ؟!
أصيل :: بتول اهلين ... غصون هنا ولا ؟
بتول :: اي ,, ركبت فوق ف دارها .. علاش شن فيه فهموني خيركم ؟!
أصيل :: نبي نشوفها ضروري ..( كان خاش بيركب )
بتول :: ماتعبش روحك .. غصون مصكره الباب ومش ح تفتح لي حد ...
أصيل :: ( أنزل الخطوات الي ركبهم وجي قدام بتول وشد ايديها ) بتول انا ضروري نكلمها هيا سمعت حاجات غلط وانا لازم نوضحلها ... باللهِ عليك
بتول :: ( تشبـــح لي ايديها ) ههههههـ اي اي تمام .. نحي ايديك توا ليجي عمران ويفهم غلط هههههـ ,, وتعالى معااي
...
( طلعـــت بتول أصيل لي جنان و وقفااته تحت بلكونة داااري .. )
,,
( ف دااري )
( كنت راقدة ع سرير وجاافين دموعي ... وماعيتش من تفكير .. وانا ف نص تفكيري سمعت صوت مش غريب عليا .. مش جااي من وراء الباب ولا من الحوش .. وقفت وتلفتت لي البلكونه وقدمت .. وكل مانقدم خطوة يزيد صوت يعلى .... وأولـ ماطلعت للبلكـــونه لقيت أصيــل واقف تحت البلكونـــه وينادي عليا )
,,
أصيل :: غصووون ؟!
غصون :: ( وقفت وقعدت نشبــحله ) !!
,,
( صدمــة أصيــل كانت أكبر .. بي شكلي المتغير لي درجة قعد نص ساعــه تقريباً هه يشبح )
أصيل :: غصون افتحي الباب باللهِ عليكـ ضروري نتكلمو ..
غصون :: ف شن ؟؟ ... ما انا سمعته كله ... وماشاء الله حبيبتكـ ماقصرتش ..
أصيل :: غصون .. مافيش حد حبيبتي الا انتي ... الكلام الي سمعتيه انتي غلط الكلام صح انتي مشيتي وماسمعتيشي ..
غصون :: ااااي ... المفروض انه نرجع نصدقك زي قبل صح .. أصيــل امشي .. ع ماأعتقد كان لازم تقولي الحق .. حتى لو كان الحق وجااع المهم مش كذب
أصيل :: غصوون واللهِ ماافي كلمة مروة قالتها كانت صح .. انا مستحيل نحس بي شفقة اتجاااهك .. تعرفي شن قلتلها لما مشيتي
( كانت كل كلمـــة يقول فيها أصيل كان مبتسم وسعيـــد ومافهمتــش علاش . رغم أنه الموقف كان حاسس ع ماأعتقد ., )
غصون :: ( بي ضحكــة سخرية ) شنوو ؟؟؟
أصيل :: قلتلها انه ماحسيـــتش بي حاجــة اتجاه غصون الا احساس واااحد وبس ..
غصون :: واللهِ ... ولي هوا ؟؟! ( بي نفس سخريـة )
أصيل :: الحب .... انا نحبك
,,
( ولا كلمــة ولا صوت ولا أحساس يواافي شعوري ف وقتـــها .. غير صدمة ورعشــة جسمي ودقات قلبي زاائدة ودمعتي عيني الحااضرة ف كل موقف حساس .. الكلـــمة الي ممكن أنتضرتها 5 سنين .. 5 سنين سمعتــها توا ,, سمعتها بي موقف مضحكــ ,, أصيل كان مبتسم وفرحـــان وشئ كان واضح .. وانا كنت مصدومة والابتساامة طالعـــه من عيوني ... شئ وااحد حظر مع صمتنا ف وقتها ,, )
( نغماات ألأغنيــــــة ,,,
ألتركيـــــة ,,
( أنت قدري )
..
#يتبع
#سلمى
