الحلقة ال(19)
مِــن روايــــة .,,
#مُمتلكـــات_عاـشق ..
......................................................
مها :: مانبيش .. ( قعمزت ع الكرسي بي عصبيه ) ماانبيش .. نحس في روحي مخنوقه معاهم ومانبيهمش .... حتى حساام الي كان ولد خالتي ونعامل فيه عادي .. توا بديت نضاايق من سمع اسمه ...
غصون :: مها !.. بالله عليك .. ع خاطر أمك ماديريش هكي . انتي الي وافقتي وانتي الي تبي هكي ... علاش بااه الي ديري فيه توا ؟
مها :: ( نزلـــت رأسها تبكي ) ..معااش عارفه شي ومعاش فاهمه شي ... مره نفكر في سيف ونقول نبيه هوا ومره نكرهه سيف ونفكر ف حسام وانه خلاص مقدر ليا .. مره نتقبله ونرد عليه ومراات نتجاهله ونحسسه بي برود حقير رغم انه مايستاهلش .... ( وزااد صوتها ف البكاء )
غصون :: ( طول مامنعتش نفسي وحضنتها ) مها .. حبيبتي .. الله يخليك اهدي شويـــه .... المفروض انك استنيتي سيف .. اقنعتي ... مش طول وخرتي ...
مها :: ي غصوون افهميني ... سيف رافض فكرت زواج بكل .. سيف مايبيش يتزوج .. يحساب لو تزوجنا بنكرهو بعض .. عقليـــه متخلفه ..
,,/ ( أخر كلمتين أكتر كلمتين حسيتهم أقنعوها بي أنـــها ترضى بي نصيبــها مع حسام .. وخلوها ترجع تفكر بي عناد ضد سيف من جديد .. وخلوني انا ذات نفسي نقتنع انه سيف مجرد علاقه عابره وح تمُر ... رغم أنه خوفي من القـــادم كان موترني ) ...
...
( ف سيارة )
عيماد :: تبو حاجة من طريــق ؟!
ساجدة :: اي وليدي وقفني ع محل حلويات بنااخد حاجة ...
( أنا وتهاني ومها كُنا مقعمزين ف الخلف )
تهاني :: ( شبحت لي مها الي كأأنت سرحانه ف شباك ) عمتي خلي مها تنزل توازي هيا وتو ننزل معاها انا ..
غصون :: حتى انا ... ( وضحكنا بي داافع المُزاح )
مها :: ( شبحتلنا )
ساجدة :: بااه ... خلاص امالا انزلو وختارو انتم ...
عيماد :: تي غير نلقاااه المحل وانتم تتعازموو ..
تهاني :: تلقاااه حبيبي غير بطل نقااان بس ...
عيماد :: ( شبحـــلها ف المراايه ) من هذا الي ينُق ؟
تهاني :: انا ...
غصون :: خوااافه هههههههههههههـ
تهاني :: صكفمك هههههههههه ..
................
( بعد مُده قصيــــره ,,, نزلنا من سيارة )
...
مها :: معاش تقررو شي من غير ماانا نوااافق ... من قاللكم بننزل نختار تو انا ؟
غصون :: صكريه هااالفم الاحرف الي عند فيتك .... خوشي وهنيني ...
تهاني :: هذااا كله باش نغيرولك جوك وماتخشيش ل خالتك تقولي عندك حد ميت وهما من يوم الي خطبووه فيك حتى عيونك مكحلات ماشفوهمش ...
( خشينا بعد نقــــاش طويــل وحااد قدام الباب )
..
,,
( وقفنا ومها ختآآارت بي جُهــد جهيد حلوياات حلوات ,, ومشينا لي جيهة الكآآآآسه و وقفنا والولد الي ع الكاسه مهنااش .. شبحت تهاني لي واحد من شباب الي يخدمو ف المحل )
تهاني :: وينه ؟!ّ
الولد :: هي شوي هي .... ( خشله ينادي فيه )
..
( ولما طلع وجي وقف ع الكاسه انا وتهاني كُنــا نشبحوله اما مها فكانت لاهيه ف تورته تشبحلها وعاطيه بي ضهر .. )
...
سيف :: اهلين ... سامحيني .. هاذم الي تبيهم ؟!
,,,,
( نخص القلب ... زيادة دقاتـــه .. رعشــة أيد ... صدمة عقل وتوقفه عن العمــلـ ... رجف العين ... رعشة رموش .. كُلها حــست بيها مها أولـ ماسمعت صوت سيف ,, لكن الغريب .. أنه سببهم مش مشااعر نفسها حست بيها ف الماضي معاه .. لا بالعكـــس .. كان سببهم شعور بارد .. مجرد صدمه .. مجرد صدفه .. ومجرد لحظه ماتوقعتش انه ح تكون جافه لي درجة انها ماتلفش وتقعدو وااقفه وعاطيه بي ضهر لين طلعنا مع بعض ) ....
..
( قدام بــــاب المحل )
تهاني :: خيرك مها ؟!
مها :: ( بدون أي تردد ) هذا سيف !
غصون :: من سيف ؟
مها :: سيف شن من سيف ... الي واقف ع الكاسه سيف .... انا سمعت صوته
غصون :: بااه اهدي حبيبتي ... كيف انا ماعرفتاش ... ؟
مها :: مش كيف انتي ماعرفتيش .. لا . كيف انا هكي نحس ؟
تهاني :: علاش شن حسيتي ؟
مها :: ( شبحت لي تهاني ) بي ولا حاجة !! ,,, ماحسيت بي شي .... معقوله الي كُنت حاملاته ف قلبي .. ضاع ف اسبوعين .... مستحيل !
غصون :: قصدك ,,,, حتى حاجة .. يعني مافي شي تحرك ؟
مها :: مجرد شعور بي صدمه .. وبس !
تهاني :: ( شبحت لي سيارة الي كان فيها عيماد يبيب ... ) هيا غير هيا تو غادي نهدرزو عيمااد يراجي ..
....
( مها حست بي شي .. حست بي لحظتها .. حست بي حاجة من أجمـــل مايمكن انه تحس بيها حواء بعد كُل علاقة ... الي حسااته صعب كانت توصفه .. اما انا .. ف فوراً فهمته وفسرته ...
الي حسااته هوا نوع من أنواع الحُريه ... نوع من انواع سعادة المُفرطه .. الي مُمكن الانسان يرفضها بي سبب صدمه حسها ف لحضتها .. نوع هذا هوا تفكك قيود .. خروج من دوامه تملأها الأسئلة .. ولا يوجد أجوبه .. خروج من خوف مُفرط .. الي سعادة وقمة ف راحه .. ولا يتقبلها الانسان ويستوعبها الا بعد حين ... )
.............................
( بعد ماوصلنـــا لي حوش الخاله وكُلنا مقعمزين ف صاله )
( كُـــل واحد لاهي ف شئ ... الخاله هيا وساجدة وتهاني كانو لاهين ف حديث طويل .. امال ولي هيا أخت حسام وحمااة مها كُنت انا وياها نتكلمو ع لبس ولبتات بنوته حلوة ونازكه مُصممه ومن مده بس حققت حلمها وداارت بوتيك صغير ليها تعرض فيه ملابس من تصميمها ... اما مها ف كانت واقفه جنب روشن كبير يفتح ع جنان حوشهم .. )
..
مها :: خويله !
الخاله :: نعم بنتي ؟! ...
( شبحنالها كلنا )
مها :: نبي نطلع برا ل جنان .. عادي ولا ؟!
الخاله :: ايح هههههههه .. عليك سؤال .. عادي امالا شن .. هذا بيبداء حوشك بنتي اطلعي واركبي وين ماتبي ...
( من العادة ف الاسبوعين الماضين وبعد خطوبتها من حسام .. مها تضايق من اي حد يفتحلها كلام ع زواجها وعيلة خالتها وتتغير ملامح وجهه للأسوء .. لكن المره هاذي ماضيقتش وبالعكس كانت مبتسمه .. صح ممكن تكون ابتساامة استلطاف لي خالتها بس برضو كاانت ف قمة الهدوء .. فرحت لي هاشي ف وقتها وبذات بعد الي صار ف المحل ولي قالته لينا .. تأكدت انه مستحيل تكون ف مشااعر اتجااه سيف ولو شوي ف قلبها .. لانه مها اصلاً ماكنتش تحبه .. كان نوع من انواع شعور بي رضااء الانثى بس مش اكتر )
......................................
( طلعت مها ورجع كُل منا لي دوامته هههههـ ,,,, شوية واتصل بيا أصيـل .. لي لحظه حسيت انها صنارة انقااد ههههه نوضت بسرعه ورديت عليه بعيد عليهم )
..
غصون :: حبيبي ...
( قُلتها وطلعت حروفي من وسط فرحــــه أكبر منها مافيش )
أصيـل :: روحه ليك ...
غصون :: وينك ؟! ,,, اليوم ماكلمتنيش بُكل ... قريب المُغرب .. معقوله هذا كله شغل ؟
أصيل :: أستحشتك ...
غصون :: هههه ـ ,, حتى انا .. لكن مش هلبه مُرعاة مشاعري المضايقه منك ...
أصيل :: بي معنى نكد قصدك هههههـ
غصون :: يس .. ههههـ ,,
أصيـل :: باه تمام ... نكدي ي ستي .. اصلاً حتى هوا استحشته ..
غصون :: هههه ... انت وين روماانسي وللهان ؟؟
أصيل :: هههه قدام حوش خالتي ..
غصون :: ااه ! ... باه خوش ؟
أصيل :: لا وانتي صادقه .... انتي بتطلعي ..
غصون :: علاش ؟
أصيل :: هكي هههه .. ت اطلعي تو نقولك ..
غصون :: قول نطلع .... يالله !
أصيـل :: مبرد شكلك .. حتى الواحد بيديرلك مفاجأة يندم ..
غصون :: احييييه مفاجأأأأأة .. طالعه اصبر خلي نقول للعيله
أصيـل :: بسرعه ههههههههههـ ,,
...................
( خشيت وقلت للعيله انه اصيل جي وبنطلع انا ويااه ع اساس عندي محل نبي نشوفه ... وطلعت )
...
( ف صاله )
الخاله :: نوضي امال ديري شاهي بنتي .. ياسرنا من القهوة هههه
ساجدة :: والله ي وخيتي شكلني لي صبح اليوم ههههـ
امال :: ت عادي خويله تمشي مره نوم ومره سهر ضروري هههـ ..
....
( ف الوقت الي فيه العيلة يهدرزو .. خش حسام بي سيارته للحوش درسها وجي بيخش للحوش سمع صوت جااي من جنان .. رجع خطوتين للخلف ومشي بي اتجاه المسبح .. وقت كانت مها مقعمزة جنب المسبح ع العشب وتبكي بصوت واطي بس صوت خنق العبره متعهاا واضح )
...
حُسام :: ( وقف قريب منها ) . مها!
مها :: ( بدون وعي واحساس لقت روحها رفعت رأسها وتشبحله وتبكي زي وكأنــها طفلة تُرسل بي عيناها نداء أستغاثه لي غريب عنها ) ..
حُسام :: ( أنزلها ومقعمز تاني رجليه ... بدون اي تردد وبي حواجبــ مقرونه بي صدمه .. حط أيده ومسحلها دموعها ) خيرك؟!
مها :: ( تبكي وساكته ... تشبحله وعيونها فيهم كمية رهيبه من سُخف .. )
حُسام :: ( زاد قرنهم ) تكلمي ؟! .. خيرك ؟
مها :: تعبااانه ! .. ( قالتها ونزلت رأسها ع رجليها الي كانت حاضنتهم ب ايديها بي خوف ورعشه )
حُسام :: من شني ؟ ...
/،
( {حس} ,, كمية الحُب الي ف الكلمة .. كمية الحنان .. كمية راحه .. كمية رجوله والاهتمام ... ف كلمة ( حس ) .. حس بيها .. حس انه ف شي متعبها من يوم خطبتهم .. حس بي تعااسه غامرتها من يوم حط ف ايديها خاتم من نظره فرحه ومن نظرتها عقاب ... حس بي كُل شي مُتعب ف قلبها .. (فهمها ) .. فهمها من عيونها .. فهمها انها ماتبيش .. ( ماتبيش ) ماتبيش تكون ليه وماتبيشي هوا ... لكن ( مافهمش ) .. مافهمش انه ف وقتها هيا مستغربه .. من نسياانها سريع لي سيف .. وشعورها بي الامان اتجاه حسام )
مها :: ( وهيا حاطــه رأسها لوطه ) ماتسألنيش .. لانه وااالله مانعرف ..
حسام :: ( وقف .. وجي قدامها وقعمز ع ركبيه ) .. خنقتك صح ؟ ... ( قالها وهوا متأكد من أنه سبب ف تعبها ومش عارف علاش تأكيد زي هذا )
مها :: ( رفعت رأسها بي أستغراب .. عيونها مليااانه دموع .. وكأنهم بحر .. ف وقتها حس بي روحه غاارق فيهم ) ..
حسام :: ماتبينيش ؟! ..
مها :: بتصدقني ؟
حسام :: قولي ...
مها :: والله مانعرف ...
حسام :: مها ... ف حد ف حياتك ؟
مها :: كان ...
حسام :: توا ؟!
مها :: نكرهه ..
حسام :: ( ب استغراب ) كيف ؟
مها :: صدقني مانعرفش .... ( ورجعت تبكي بي قوة كبيرة )
حسام :: تماااام خلااص تمام ( حضنها بي دون اي تردد ) اهدي .. خلاص حبيبتي ...
....
( حبيبتي ؟ ... كلمة لو ماحد حاسها مايقولهاش ... لو ماحد فاهمها مايقولهاش .. ولو ف حد حس انها ماتليقش بي شريكة عمره مايقولهالهاش .... بس حسام .. قالها بي خوف ورهبه .. (حضنها ) بدون وعي بس كان يبي يحسسها بي اماان .. ومش عارف ومايبيش اي مقابل ... المهم انه حس ف لحضتها انه المفروض ماتبكيش قدامه .. )
..
#يتبع ..
#سلمى
