لم ارد ان احبها (جزء اول)

الجزء الرابع

# لم- ارد- ان- احبها
ننو & ساره
الجزء الرابع
قراءه ممتعه ♥

رحت للكليه الصبح وحاولت اتجنب اشوف هذا امير، ما ادري اخاف منه لو تجنبا للمشاكل بس المهم ما اريد اشوفه لان دائما يضوجني ويطلعني غلطانه وهو شخصيته قويه وعنده سلطه لسان مثل ما سمعت ابوه الشيخ يعني اكيد يعرف يحجي، بس هذ امير حجيه يسم البدن..

دخلت للمحاضره الاولى الحمد الله ما صار شي وحتى هذا احمد ابن عمه ما باوعت بوجهه اصلا بس حسيته كلساع يباوعلي، مثل من تشوف مخلوق فضائي وكلساع تباوعله بخوف هيج خلاني احس روحي حسسني اني شي شاذ هنا بالكليه..

انتهى الدوام وكعدت ويه البنات وگتلهن خلونه نشتري ملابس ونطلع للسوگ هن كيفن، ما ادري ليش وافقت مع ان اني ما مقتنعه بس شي بداخلي يكول لازم اصير متفوقه بكل شي بالدراسه والادب والمظهر الخارجي، لان الصراحه بديت احس نفسي نشاز ( مختلف او غير مطابق مع الوضع)..

رحنه للسوك مال بغداد الجديدة ازدحام مدري ليش هاي الناس كلها تشتري ملابس بهذا اليوم لو شنو.
ريماس.. حبي ملوكه هي بغداد اربع وعشرين ساعه ازدحام بكل مكان..لا تخافين راح تتعودين.
اشتريت تنوره وقميص وثواب هواي واشترن تراكات البسهن بالقسم من يخلص الدوام..
طلبن مني اشتري مكياج بس ما قبلت احنه عدنه ممنوع البنيه تحط مكياج بس لرجلها واني ما مزوجه يعني ميصير اخلي مكياج.. جنت اعتقد البنيه حرام تحط مكياج اذا ما متزوجه بس يعدين عرفت مو حرام..

الجو حار والساعه صارت 6 واحنه بعدنه بالسوگ ساعه ونص واحنه نفتر اني اشتريت والبنات همين اشترن غراض الهن.. وما احس اله ساره تعيط.. لك حقير تعال جنطتي..حرامي الحكوا حرااااامـــــي.
اني شفته ورحت ركضت وراه (وتندمت بعدين) ركضت بسرعه اني متعوده اركض بالبستان من جنت صغيره والعب هناك فتعودت وصرت سريعه كلش بالركض ومن نسوي سباق دائما اني افوز...
اركض وراه واركض مدري شكد اشوفه يروح منا ويجي منا بس ازدحام فما يكدر يركض بسرعه...
وره تعب هواي كمشت الجنطه وسحبتها منه ودفرته وطاح بالكاع وزلته لان باگ الجنطه مالت صديقتي وهي فلوسها ومستمسكاتها كلها بيها جان مدري شيصير بيها لو راحت الجنطه.
بعد ما شبعته كتل بالكوه كدر يشرد رفعت راسي بنصر كدرت اخذ الجنطه.
ردت وجهي هاي اني وين!!!!!
لا يالحمزه اني ما اندل ولا شبر بغداد شورطني شلون ارجع هسه..
كمت امشي واباوع منا ومنا عسى ما اشوف وحده من البنات صرت مثل الطفل الي مضيع امه بالسوگ.. اي نفس الشعور بالضبط بالكوه كامشه دمعتي ما اطيح عيب الناس تباوع عليه واني شطولني وعرضني ابجي بالسوگ.
الدنيا صارت ضلمه واهل البسطيه لموا غراضهم وراحوا واني ادور وماكو احد.
كعدت على الصبه وخليت اديه على وجهي وكمت ابجي..
ضيعت كلشي هسه راح ابقى هنا مشرده محد يعرفني واكوم اشتغل هنا واكل من الزباله والجهال يجون يضربوني بالطابوگه اي هذا الي راح يصير ويايه ادري بحظي فگر.. ابد ماعندي حظ هسه اهلي عبالهم متت والبنات عبالهم انخطفت والمدرسين عبالهم بطلت، وامير عباله اني منه خفت..
اسمع صوت ضحك من وراي.
مسحت دموعي وباوعت عليه، انصدمت ووگفت على حيلي وكلت احمد!!!!
كال.. اي احمد جا الجني شسوين هنا وليش تبجين ومنو خطفج وشوكت متي كل هذا صار هسه..
ورجع يضحك عليه.
من شفته يضحك كمت ابجي، هو شافني ابجي توتر كال.. اسف والله مو قصدي... ااا انتي انتي وحدج هنا.
كلت.. انباكت... كتلت الحرامي.. تيهت... وكعدت هنا
كال.. شنو شكاعد تحجي كافي لا تبجين خليني افهم كلمه.
جابلي مي غسلت وجهي وشربت كال احجيلي.
كتله.. اجينه للسوگ وجنطه ساره انباكت واني رحت وره الحرامي وكتلته واخذت الجنطه وهسه بعد ما اعرف مين طريق الرجعه.
كال... عيني سوبر مان انوب من تريد تنقذ العالم شوف روحك من يا طريق رحت علمود ترجع.
كلت... هسه شسوي.
كال.. خابرتي عليهن سئلتيهن وين.
كلت.. اخابرهن؟؟!!!! يا نسيت اني اكدر اخابرهن.

كال... ثول حتى ثول كل هذا البجي وخابصتنه وانتي حتى ما مخابره.
طلعت المبايل لكيت 20 مكالمه فائته من البنات خابرت على ريماس... الوو ريماس وينجن.
ريماس.. ولج انتي وينج اجينه نموت عبالنه هاهيه متي وبعد ما نشوفج واطيح براسنه لان احنه جبناج.
احمد يضحك ويكول.. هاي انتم كلكم البنات هيج اذا وحده اختفت دقيقتين ادكولون هاهيه ماتت.

ريماس.. ولج عزا هذا منو الي يمج.
خزرت احمد وكلت.. هذا طالب ويانه شافني بالسوگ... هسه عوفيج منه انتم وين...
كالتلي على المكان بس اني ما اعرف وين صاير كلت لاحمد وكال عادي اني اوصلج الهن.
شفت البنات وركضت عليهن شبكتهن عبالك سنه ما شايفتهن وابوس بيهن.
احمد..احمم احممم
مروه..خير
احمد تره الوقت تاخر وممنوع احد يدخل للقسم بعد الساعه 8.
باوعت للساعه الي بيدي الساعه 7:55..عزااا ولجن بنات يمكن ما يدخلونه.
ريماس..وشلون هسه نروح وين نلكه تكسي.
احمد...واني شنو جيس روبه ادورن على تكسي.
ساره..لا خويه تسلم تعبناك هوايه ويانه.
احمد... واني رجولتي ما تسمحلي اعوف بنات وحدهن بليل يدورن على تكسي امشن وياي احسن،
اقنعنه احمد واخذنه وصلنه ونزلنه على الشارع العام شفت مبايل كلساع يدگ ويغلقه عرفت عنده شغله كتله هنا نزلنه وهو صدك نزلنه وراح بسرعه ..
وصلنه البواب كال ممنوع الدخول وقت الزياره خلص.
كلت..لا مو زياره احنه ندرس بالكليه وهذا مكانه.
كال..انطيني اوراقج.
كلت..ما شايلتهن وياي شعندي رايحه للسوك اخذ الهويه مالت الكليه.
كال...ممنوع الدخول.
كلت...يعني وين نروح بهل ليل.
كال...مو مشكلتي..
باوعت على البنات..يعني وين نروح بهل ليل....
لكن حدث ما لم يكن بالحسبان....

......................يتبع.......................

الى هنا ينتهي البارت الرابع
اسفه ان كان البارت قصير
لان كتبته بسرعه وما اريد اتاخر عليكم بالنشر
اتمنى يعجبكم انطوني رايكم

الى اللقاء في البارت القادم

صديقاتكم

روايات ننو

صيدلانيه المستقبل
Princees092

معلومه جديده

هل تعلم ان لو ضغطت على زر النجمه👇 ⭐
يصبح لونه احمر
جرب وشوف 🙈