لم ارد ان احبها (جزء اول)

الجزء العاشر

#لم- ارد- ان- احبها
ساره   &   ننو
الجزء العاشر
قراءه ممتعه 👌✌😊

ملاك: 
من رجعت من الكليه حضرت نفسي ولميت غراضي الي احتاجها لان باجر لازم اروح لاهلي خابرت ماما وكتلها راح اجيهم باجر وكعدت يم البنات شويه ورحت نمت.
كعدت الصبح بنشاط اليوم اروح للكليه ومن ارجع اخذ سياره عبريه واروح لاهلي لان مشتاقتلهم هواي هواي هواي.
بدلت وحظرت نفسي وطلعنه اني والبنات،  دخلنه المحاضرت طبيعي كلعاده وبالاستراحه رحت لحمد كتله راح اروح اليوم لاهلي.
احمد.. اليوم ترحين وشوكت ترجعين؟؟!
كلت.. ارجع على الاغلب الاثنين.
احمد.. راح اشتاقلج والله،  مو تقطعين التواصل بينه اريد يوميه اسمع صوتج تعودت عليج والله.
ابتسمت وكلت.. ان شاء الله.
احمد.. وشلون ترحين ؟ ؟؟
كلت.. اخذ سياره عبريه واروح.
احمد... وحدج
كلت.. اي وحدي اكيد

احمد.. لا ملاك شلون ترحين بسياره وطريق طويل وحدج.
كلت.. يعني شسوي ماعندي غير حل.
احمد.. خليني اوصلج اني.
كلت.. لا شنو توصلني
احمد.. ما بيها شي ملاك،  غير الصديق وقت الضيق واني مستحيل اخليج تصعدين بسياره وحدج.
كلت.. ما اكدر احمد مايصير.
احمد.. عادي تكعدين ويه واحد غريب ويه احمد مايصير.
استغربت منه هاي اول مره احسه يصير عصبي وضايج.
كلت.. احمد ما اريد اتعبك وياي
احمد.. اصلا اتعب اذا ترحين بسياره ويه واحد غريب وحدكم.
ما فهمت قصده يعني شلون يتعب اذا رحت ويه واحد غريب هذا شبي اليوم الولد مريض لو شنو.
كتله...  بس هو هذا شغله يوصل الناس انت طالب ما يصير اروح وياك.
احمد.. اعتبري دين اني اوصلج اليوم،  يمكن باجر يصير وياي شي وترديلي الدين،  ملاك الله يخليج لا تقلقيني عليج وخليني اني اوصلج لاهلج.
بقى يقنع بيه وكتله.. اوافق لكن بشرط،  تاخذ فلوس.
مسح على وجهه وكال.. اوك اخذ منج فلوس البانزين بس.
كلت.. اوك هسه قبلت اروح وياك.
حددنه الموعد بعد ما نرجع نتغده ونطلع.
خلص الدوام صليت وتغديت ويه البنات وحضرت غراضي وبقيت اودع بيهن ووصيت مروه تسجلي المحاضرات مال يوم الاحد والاثنين وبقيت منتظره احمد يجي.

امير: رجعت من الدوام للبيت تغديت وكعدت بالغرفه..
مددت على الجربايه افكر اذا ابوي شاف الصوره شنو راح يسوي، اني ما خايف بس ملاك شلون اكيد الكل راح يتهم شرفها ومحد راح يصدك هي جانت خايفه فسوت هيج، اكيد راح تصير علج بحلوگ الناس بس احمد شيقنعه عباله اني خايف على نفسي من ابوي..
اني مو ما اخاف من ابوي بس احترمه....

كمت اخذت ملابسي خليني اروح لاحمد سحبت السويج وطلعت ركض على الدرج شافني ابوي..ها وين بويه.
كلت واني امشي..راح لبيت عمي ما اتاخر
اخذت السياره ورحت لبيت عمي علمود انفذ الي براسي علمود احمد يحذف الصوره.
دخلت للبيت سلمت على عمي بسرعه ورحت لاحمد دخلت لغرفته لكيته مبدل ومحضر روحه ويرش عطر، شعجب احمد هيج وقت نايم وبسابع نومه هو دائما يرجع من الدوام ينام مباشره.
كلت..ها شو محضر نفسك وين.
اتوتر من شافني كال..ها امير..شعندك هنا، اني طالع عندي شغله.
كتله..وين طالع وليش ما كتلي
احمد..هيج طالع وين اصدقائي.
حسيته ديضم شي عليه بس ما بينت هل شي وكتله..جا خليني اروح وياك.
احمد..لا شسوي رايح وياي.
كتله..شبيك احمد طول عمرنه واني وياك سويه، ليش هسه ما تقبل نروح سوه، احمد اذا ادري بيك ضام شي عليه اكسر راسك..
احمد..هاي انت دووم ادكول اكسر راسك واكسر راسك..ياخي اني مو صغير هيج تحجي وياي.
كلت..بس تصرفاتك مال واحد جاهل..وتبقى طول عمرك صغير ولا راح تكبر.
درا وجهه وبقى يمشط بشعره وما اهتم لوجودي ضوجني كلش..
طلعت من الغرفه ورحت كعدت يم عمي واني افكر شنو الي غيره ليش هيج يصرف هو دائما يكول انت ابوي واني ابنك ليش هسه يكول صار جبير..
احمد ما جان يضم عليه شي وكلشي يصير وياه يكولي، وهسه بس يضم عليه وحتى ما يقبل يكول وين رايح...
نزل احمد ومن شافني كال..شو بعدك هنا ليش ما رحت.
كلت..بيت عمي وبكيفي ابقى لو اروح.
احمد..يله اني طالع.