لم ارد ان احبها (جزء اول)

الجزء الثاني عشر

#لم- ارد- ان- احبها
ساره & ننو
الجزء الثاني عشر
قراءه ممتعه 😘👌

استمرت الكوابيس تجيني ويوميه احلم بسيف يريد يذبحني ومن اخاف جنت اخذ ستره امير اخليها يمي واشبكها ارتاح صارت هاي عاده من افز بليل اخذ تسره امير حتى قررت ما عاد ارجعها اله اذا اشوفه، مرت الايام على هذا الحال لحد يوم الاحد علي قرر ان ارجع لبغداد يمكن الدراسه تلهيني او تنسيني  واني وافقت لان عجبتني الفكره طلعت من البيت اني وعلي ودعت اهلي واخوي محمد وصلني علي لبغداد جان الطريق طويل ومتعب، وصلنا لبغداد وصلني محمد للقسم ودعته وراح دخلت للبنات لكيتهن  راجعات من الدوام سلمن عليه ويبوسن بيه..
كعدنه يسألني شسويتي وما سويتي حجيتلهن بس ما حجيت عن الي صار ولا عن الكوابيس الي تجيني...
باليوم الي وراه جان اثنين صح عندي عطله بس خليني اداوم ليش افوت المحاضره عليه رحت داومت عادي والمحاضره الفائته اخذتهن من مروه جنت بالاستراحه كاعد وحدي شفت امير مر كلت خليني اروح اشكره على الي سواه وياي..
كلت.. لحظه امير.
دار وجهه كالت.. نعم
كلت.. اهلا شلونك؟؟ ؟؟
كال.. بخير الحمد الله انتي شلونج.
كلت.. اني بخير بفضلك وما اعرف شلون ارد جميلك دائما انت واحمد واكفين وياي وتساعدوني وما قصرتوا ابد.
شو هذا عبالك ما جنت امدحه عبالك جنت ارزله او اسبه شو صار عصبي وكمش ايدي واخذني لمكان مابي احد وكال... اذا ما تبتعدين عن اخوي راح تشوفين شي ما راح يعجبج.
كلت.. شبيك امير ليش هيج تحجي.
امير.. اسكتي ولا حرف، بسببج انتي اخوي تغير عليه انتي انسانه نذله واني من ساعدتج ما جنت ادري هاي انتي عبالي بنيه مسكينه لو ادري هاي انتي جان لا ساعدتج ولا باوعت لشكلج لان انتي تستاهلين.
ورفع حاجبه وكمل..واصلا شمدريني ما انتي وياه متفقين تسوون هذا الشي لان اني ما سمعت لا عياط ولا اي حركه منج جنتي مسلمه نفسج اله (حجاهه من بين سنونه)
حسيت روحي انطعنت واني اعتبرتك سندي اعتبرتك بطلي ادكول هيج عني حاولت اقاوم وما تنزل دموعي بس ما كدرت بدن ينزلن مثل الشلال..
امير.. هاي ادموعج كدرتي تضحكين على احمد بيهن بس مو عليه يا ملاك اني مو احمد علمود تضحكين عليه بكلمتين اني كاشفج على حقيقتج واعرف لعبتج الوصخه.....
بعد ما اتحمل راد يكمل بس اني عفته ورحت اركض اريد ابتعد اريد انسى كلشي كاله بس كلماته لسه تترد براسي..
طلعت من الكليه مع ان هذا مو موعد الخروج بس ما اكدر ابقى بمكان امير موجود بي...
طلعت ركض ورحت للاقسام وبقيت ابجي وابجي، ورحت لرقم احمد وانطيته حضر اذا اني جنت السبب الي خلاك تبتعد عن اخوك فما اريد بعد ابقى مستمره بعلاقتي وياك، دائما جنت معتبره احمد هو اخوي احسها يشبه اخوي علي بطيبته وحنيته، بس اني لازم ابتعد عنه علمود يرتاح مني.

باليوم الي وراه ما داومت لان كرهت الكليه والدراسه بسبب امير ما اريد اشوف وجهه اكرهه اكرهه.
ومر يومين عليه واني ما مداومه وبس كاعد بالقسم ومن تجي مروه اخذ المحاضرات منها وادرس وحدي.