كرونيك : 💕بنت الحي💕

2⃣

الحلقة 2:
راكش في راس النهج..يتظلل تحت الحيط..الحال صيف و الدنيا سخونة تشعل..لابس شورط في الgris طايح شوية...ظاهر منو البوكسار الrouge متاعو ..لابس خلعة بيضة مفصلة على بدنو...و عندو وشام على طول ايدو....ضارب حاجبو و حاصر لحيتو..جبد سيڨارو شعلو ...خذا منو نفس و نفخو...فادد و منرفز ..منرفز على روحو و كاره عيشتو ..الي يصبح عليه يرقد عليه..لا خدمة لا زدمة ..نهار كامل يسركل في الحومة...حاسس روحو مخنوق و احب اسيب غشو في حاجة.. تلفت ايمين و ايسار..الحس بيات و الحركة خفيفة في الحي...الي يتعدا اهبط راسو اسلم و يزرب في خطواتو ...الناس الكل تهابو و تقدرو..الخوف كان من ربي و منو.."صقر" اسم على مسمى..اقوى و اشهر مصارع بين الاحياء الشعبية ..يملك اخطر و اكثر حومة معروفة في البلاد "حومة الvitnam" ..هو الفاطق الناطق فيها..ميصير شي بلا بيه..و كل شي على ايديه ...صعيب و ميراتيش ..اما زادا حقي و حنين...نرفوزي و فيسع تطلعو اما مع كبارت الحومة راسو ديما اللوطة... كيما اقولو العين متعلاش عالحاجب....سمع حس عياط من طرف النهج..عرفها لاحمة بين ولاد الحي ..تبسم على جنب لقى فاش اسيب غشو..جبد نفس طويل من السيڨارو ..طيشو وعفص عليه..نفظ الشرط متاعو و مشالهم بخطوات ثابتة....
يمشي و خطواتو قريب تنقب الارض..كابس على بونيتو..مستعد باش اوجها لاول واحد احل فمو...يرى فيهم محظبين على راجل كبير في العمر ..فاكينلو فلوسو و يتقاسمو فيها قدامو ..و فوق هذا يتعاركو شكون باش ياخو اكثر من صاحبو ..هبل و تجنن ..زادوه غش على غش..صاح على طول صوتو..
- لولااااد
لكلهم تلفتو مرعوبين ..صوتو زعزع الارض تحت سقيهم..وخرو خطوتين بعاد على الراجل..و هو زاد زرب في خطواتو ...في رمشة عين كان واقف قدامهم بالضبط...تكلم الطفل الي في ايدو الفلوس و هو يرعش..
-صق...
و قبل ما يكمل ينطق جاتو بونية لا تقرا لا تكتب..طيرتلو سنة من فمو و بركتو في القاعة..لولاد لوخرين وخرو مرعبوين . عرفوه ظلّم و مبقاش فارز شي..الي هذا فيهم تلفت و عطى على ساقيه بالجري ..طبس طول على الطفل جبدو من رقبتو و خنقو بايدو لخرى..تكلم و هو لازز على سنيه باش اكسرهم من بالعصب ..
- شنو ڨطوس تتمرجل عالكبار..
- صق..ر سيبني بر...اس ا..مك(يتغصور مخنوق)
-امي متجبدهاش اا خامج ..شتحب نعملك تو ..اه نقتلك..
زاد كبس بايدو عليه ..لين زراق و خظار ..تقطع عليه النفس و بدا افرفط بساقيه..نڨز الراجل يجبد فيه و يصيح..
-سيبو عيش ولدي..يهديك الطفل باش اموت..تسيبو ..
ما بعدو عليه كان بالسيف و هو كيف الثور الهايج ...ادز في ايدين الراجل احب يرجعلو ..يتهدد و يتحلف فيه..مرجع لوعيو كان على صوت بوه اعيط من في راس النهج..رخى بدنو الكل ..خذا نفس طويل اهدي في روحو ..ستوا دبشو و طبس فك الفلوس من الطفل ..هز ساقو و ضربو على جنبو..
-طير من قدامي ..و مزلت نشم ريحتك ادور في الحي ..ما تلوم كان روحك..
تلفت لراجل مدلو الفلوس و طبطبلو على كتفو ..تبسم و قالو
-امسحها فيا بابا..
جاء يجوابو ..قص عليه كيف خلاه واقف و مشي يجري يعرض في بوه ....