كرونيك : 💕بنت الحي💕

2⃣2⃣

لحلقة 22:
-لازمك دروس صقر...(قالتها و عينها في عينو)
نزل على جنابها...فارعتو و دزتو من فوقها..جات تقوم عود جبدها ...فقدت توازنها..شدتو من الشوميز متاعو حلتها بكلها ..طاحت و طاح هو فوقها..طبس عليها ..قرب وجهو لوجهها..غزر لعينيها و تكلم...
-علمني انت...
تبسمت على جنب..هزت راسها قربتلو...ذبلتو عينيها...ذاب مع تذبيلة عينيها..قربتلو اكثر..ضربو نفسها في وجهو ..غمض عينيه مستمع بوجودها بين ايده...حس بيها كحطت خدها فوق خدو ..قلبو رعش..و بدنو خض..حطت فمها فوق وذنو و تكلمت بصوت واطي ..
-ما نبوسش الخماج الي كيفك..
كلب و هبل من كلامها..هز ايدو دخلها في شعرها...جبدلها راسها بعدها عليه..تضحك رغملي قاعدة تتوجع في داخلها...هز ايدو نترلها السلسلة من رقبتها..تكلم بصوت راكز ماليان غش..
-هاذي متستحقهاش ..و تهنى ما بستكش قبل باش نبوسك تو...(طبس قابل وجهها و قالها بعناد) عندي الي ماليتلي عيني ...
دزها و قام من فوقها..
ضحكت ضحكة قوية... تلفتلها و عينيه تشعل بالغش..
-وااضح ..اكا علاه موش اسمي بحذا قلبك..
حل عينيه مصدوم ..غزر للشوميز متاعو ..محلولة و الوشام ظاهر اعيط يا بابا يا وخي..عض على شفتو ..دار و عطاها بظهرو ...
- ذكية ..دقيقة الملاحظة ..عنيفة و قوية ...عجبتني مبروك عليك الخدمة...(تلفتلها و حط ايديه في جيابو و تكلم )....من اليوم تنسى اني نعرفك و تعرفني...نبداو من جديد...الكلام الزايد منحبوش...انت لا تسمع لا تشوف و لا تتكلم..ديما في الموعد ..كل شي نحبو في وقتو...وين انا وين انت..باش تلازمني كظلي ...وااضح..
وقفت نفظت دبشها..لمت شعرها بايدها و قالتو بصوت راكز و و هادي...
-وضوح الشمس...
طبس هز الفاست رماها فوق كتفو ....لبس صباتو ...حط ايدو في جيبو و دخل للاسونسار هابط...
عينيهم في عينين بعضهم..نظراتهم كلها تحدي ...تسكر باب الاسونسار في وجهم...رخى بدنو اتكى عالحيط...رخّت بيها ساقيها طاحت في القاعة...هز ايدو حطها على بقعة الوشام متاع اسمها...هزت ايدها حطتها على رقبتها تتحسس في بقعة السلسلة ...تنهدت ...تخنق....
هبطت دمعة على خدها تحرق...كبس على ايدو ..هزها و كسّر بلاّر مراية الاسونسار...قلبها تقبض ...هزت ايدها الزوز حطتهم عليه..تاخو في النفس ...برك في القاعة...ضرب راسو عالحيط وراه...دموعها زادو..صوت شهقتها واصل لطرف الصالة...شد راسو بايديه الزوز.. المواجهة مكانتش ساهلة عليهم الزوز...مشاعرهم تخلطت عليه..حب و اشتياق..نقمة و قهرة ...تمنى لو كان ينجم يحضنها..تمنات لو يعطيها عذر للعملو...منجمش اصرحها بالحقيقة..منجمش اقلها راني سمعتك اش قلت لصحباتك...حبتو يطلب السماح منها و لو بالكذب...لكن هو استعرفلها بفمو...تسللت نسمة باردة من شباك الصالة..حضنت بدنها البارد بايدها الي ترعش...عودت وقفت ..هزت الفاست متاعها لبستها..سمعت تليفونها انوقز..حلت ساكها جبدتو...
-وي هزار...
-(.......)
-ايه مشيت معاه ..و وليت نخدم في الشركة ماتع صقر..
-(.....)
-باهي ربي يستر..
-(...)
-تهنى ..اول ما نعرف و لا نشك في حاجة نقلك...
علقت عليها و مشات طلعت في الاسونسار ...وصلت لبيروها....ترمات عالكرسي ...جبدت الدوسيات تكتشف فيهم...موش عارفة شنو باش تخدم بالضبط...قاعد في بيروه...التلفون في وذنو يطلب....اخض في ساقو متوتر...
-وسيم..صار وقت ترجعلي مزيتي...
-(......)
-رسيل رجعت دخلت لحياتي...و اكيد بدر موش باش يتغاضى عالحكاية...
نحب احسن رجال عندك يحرسوها من بعيد لبعيد...باش نسكنها في الوتيل متاعي الي قريب للشركة...نحبهم اتبعوها لحظة بلحظة...
-(..........)
-وسيم!!!
-(....)
-متاكد انو ليوم باش نتقابل معاه ...و تعرف الي انا ما عندي الثقة كان فيك...نحبك تكون في ظهري وسيم...
-(.....)
-عيشو عشيري...
علق التلفون ...وقف عدل الكوستيم متاعو ...نحى منڨالتو و حطها فوق البيرو..و حط معاها السلسلة الي كانت عند رسيل ..جبد فردو من ورى حزامو رماهم معاهم....خذا نفس طويل عبى بيه صدرو...خرج من بيروه افركس عليها بعينيه في مكتبها...تلفت من و من ملقاهش في البيرو...كمل طريقو خارج من الشركة...لمحها واقفة مع الموظفين متاعو ...تتضيحك و تفدلك معاهم...و فيهم واحد كل شوية اطبطبلها على كتفها قال شنو افدلك معاها..غزل عليها..نزل على شفتو بغل...قدملهم و وقف وراهم ...حمحم و تكلم بغش...
-كملتو الضحك ماهو...تجمو تشدو خدمتكم تو موش هكا ؟؟
تلفتولو الكل مفجوعين....هبطو ريسوهم و الي هذا رجع شد بيروه...تعدات بجنبو راجعة لخدمتها...شدها من ايديها وقفها...جبدها ليه الجنب للجنب...طبس شوية و تكلم بحذا وذنها...
-اخر مرة تخرج من البيرو متاعك ...حاجتك بحاجة كلمهم هوما اجيبولك..وااضح ؟؟
تلفتت غزرتلو في عينيه..تبسمت شوية و تكلمت بدم بارد..
-واضح مسيو...
سيبلها ايدها و جاء ماشي..
-خارج ؟؟ استنى نجيب ساكي و نمشي معاك...
جاوبها من غير ما يتلفتلها ..
-لا موش لازم مانيش راجع للشركة ليوم..و انت تو نكلم رجالي اروحو بيك جيب امك و بوك باش تسكنو في الوتيل متاعي ...متعرش وقتاش نستحققك و نحب ديما تكون قريبة لخدمتك...
-اا...شنوة.. لا مانيش موافقة ..منحولش من الحي..(كتفت ايدها و كملت كلامها).. اسمعني مسيو صقر ما ينكر في اصل كان...
سكتت و منجمتش تقولها...تلفتلها منرفز رجعلها خطوة ..خطفها من زندها..نزل عليها ....تكلم و العصب اهز فيه و ينفض...
-كملها شبيك سكت..
تغزرلو في عينيه من غير ما تنطق حرف..قاعدة تكتشف في صقر جديد ...زاد نزل على زندها لين صوابعو تغللت فيه...
-صقر.. سيبني
-اخر مرة تحكي معايا بالطريقة هاذي...و اخر مرة تتناقش معايا في قرار انا خذيتو...
نطرلها ايدها...