كرونيك : 💕بنت الحي💕

2⃣4⃣

لحلقة 24:
طاح عليها الليل و هي شادة الفرش...تبكي و تشهق..عينيها تفحصو البيت بكلها..حستها باردة و موحشة من غير والديها...مالي روحت من دارهم دموعها مكفتش من على خدها..موش ساهل عليها تفارق امها و بوها...لكن الي تعمل فيه مصلحتهم هوما...هي موش مستعدى تضحي بيهم على خاطر صقر....سمعت صوت الباب ادق...منجمتش تقوم تحلو...عود دق عليها بالقوي..سندت روحها و قامت بخطوات رزينة..حلت الباب..عينيه تحلت.. داهش في حالتها..وجهها اصفر مغصور..عينيها حمر جمر...شفايفها بيض شايحين...قلبو تعصر و تقبض...هز ايديه مفجوع حطهم فوق خدودها يتحسس في سخانتها...تكلم بصوت يرعش ميت بالخوف..
-رسيل..شبيك؟؟..مريضة؟؟ فاش تحس قلي؟؟..عندك السخانة تكلم؟؟
دزتلو ايدو بالقوي ...رمقتو بنظرة كلها كره و حقد...
-اخر مرة تحط ايديك عليا..
-ر..سيل
-انا تو مانيش في نطاق الخدمة ما عندك علاش جايني..
-عرفت الي انت جيت وحدك..شبيك مجبتش عم علي و خالتي سالمة معاك...
-اسمهم ما تنطقوش على لسانك...
فد من معاملتها ليه..قدم خطوة داخل..وقفتو بايدها..
-فم تاقف..معندك لواه داخل..
هبل و تجنن لتو متعود على شخصيتها الجديدة ...دزها بايدو و دخل...لطخ الباب وراه..حلت فمها باش تعيط عليه...خطفها من ايدها جبدها ليه...نزل على سنيه و تكلم بغش...
-رسيل ..شوف انبه عليك موش معنى انك خارج الخدمة باش تقلل من احترامي...واضح..
-واضح ....واضح ..واضح ...فددتني بيها هالكلمة بالك تخساب الدنيا واقفة على ڨرنك...انساها رسيل الي تعرفها قبل..(قربتلو و حطت عينيها في عينيه) انا تو وحدة اخرى غير الي في مخك...و انت معندك حتى حق باش تتحكم فيا شنو نقول و شنو نعمل..احنا ما تجمعنا كان ساعات الخدمة الي بيناتنا و كيف نكملهم ..نكون حرة في اي حاجة نعملها..و تو واضح بالنسبة ليك..
شاددها من ايدها و واقف مصدوم ..بالرسمي بدلت برشا عليه...كلامها و نظراتها كل حاجة فيها تبدلت...نطرت ايدها منو ...قدمت حلت باب البيت
-كان كملت تنجم تتفضل..
حس بسطل ماء تصب عليه..دار يثبت في عينيها...نزل على بونيتو كبسها..قدم بخطوات راكزة خارج ..وقف قدامها و قالها..
-غدوة الصباح عندنا اجتماع مع الجماعة الروسين في مطعم الوتيل متاعي...نحب كل شي اكون حاضر و مريڨل..اوكا خليتلك الدوسيات عالبيرو راجعهم و اعمل عليهم copie ليهم....
كمل كلامو و خرج ..لطخت الباب وراه ...و رجعت تجري ترمات في فرشها منهارة...كارهة روحها و كارهة المشاعر الي تتملكها كل وين تراه...
نهار جديد..شمس جديدة..الطقس صبح احسن من نهار امس...السماء صافية و النسمة موش باردة برشا...نوقزت فياقتها...حلت ايديها تتكسل...تحس في روحها قول واكلة طريحة...كريامها مدڨدڨة و اعصابها متوترة ...مرقدتش بالڨدا من كثر ما شبعت بكى..هزت ايدها تحك في عينيها تحب تصحصح...وقفت نحات روبتها متاع النوم.. و مشات بخطوات ثقيلة لبيت لبانو...متنجم تفيق كان متعمل دوش افرهدلها بدنها....عبات البانو بالماء السخون..دخلت فيه و نسات الدنيا و ما فيها....يمشي في الكلوار كالعادة دايرين بيه رجالو...ليلة كاملة مرقدش....بايت اخمم و يراجع في حساباتو...كل شي جاه مع بعضو...امو و بوه ...رسيل و خالو...حتى انو اخمم في خوه الي ضيع حياتو في جرت حب الانتقام...وقف قدام باب بيتها...قدّم واحد من رجالو حلو الباب و مدلو المفتاح في ايدو..وخرو لتالي و تفرعو في وسط كلوار الوتيل و قدام الباب...دخل و سكر الباب...دور عينيه عالبيت ملقاهاش...قدم شيرة بيت البانو..حط وذنو عالباب يتصدد في حسها ...سمع حس تڨربيع صغير ...عرفها ادوش...حط ايدو عالباب ..غمض عينيه اكلّمي في روحو..عض شفتو و بعد فيسع هارب من الافكار الي تملكتو لحظتها.....قدم شيرة الفرش...قعد عليه...هز مخدتها اشم في ريحتها...الريحة الي كان و مزال يعشقها...رجعها لبلاصتها..و رجع يغزر للبيت..شاف روبة النوم متاعها طايحة في القاعة...لمعت عينيه و تفكر هو علاش جاء...مالي هو احضر في روحو الصباح و هو اخطط باش يختارلها هو دبشها ...لانو عارف عينين ساجد الزايغة و موش مستعد باش يعمل عركة معاه قدام الجماعة الروسيين ...قام يجري حللّها الدريسنغ متاعها...كلهم روب قصار و محزوقين (وقت الي مشات مع هزار للصونتار عطاتها برشا دبش 😋😋) نفخ فادد..كان متأكد من كسوحية راسها و عارف الستيل الي هي تلبسو...لوج ما بين الروب على حاجة مستورة...شاف taielleur (كوستيم متاع نساء) معلق في الوسط ...ضحك على جنب و جبدو..حطو فوق الفرش و قعد بجنبو مرافقو على ساقيه و ايديه مشبكة في بعضهم..ستنى فيها تكمل و تخرج...