كرونيك : 💕بنت الحي💕

3⃣

الحلقة 3:
-بابا اش مخرجك من الدار ...(شدو من ايدو يسند فيه)
- ربي يهديك يا وليدي ..مخليني في جرتك من بلاصة لبلاصة...راك 26 سنة موكش صغير ..و قتاش تنحي عليا هالصنايع و تشد ثنيتك..
تنهد و هبط راسو ..يمشي داخل بيه للدار من سكات ..معندو ما يجاوب كلام بوه كلو صحيح..الي كيفو راهو يخدم و اقوم بدارهم ...بوه مريض بالقلب و موش حمل شقى و امو عينيها تنقبت و ظهرها تقوس من الخياطة...وصل بوه لبيتو ..ركحلو فرشو ..تكاه و قعد بجنبو ..تكلم بصوت هادي و واثق..
- بابا صدقني عامل مجهودي ...قاعد نلوج على خدمة نعاون بيها روحي..نوعد الامور الكل تمشي كيما تحب..انت برك ريح روحك ..موش باهلك الغش و التخمام..(هزلو ايدو باسها)..باهي يا غالي ..
- وليدي نعرف و الله نعرف..اما هكا مالي محس عليك نتكلم هكا..نحب نطمان عليك و على امك..نحب نموت متهني..
- شش لطف يا بابا ..ربي اطوللنا في عمرك..و ادومك فوق راسنا..تو انشاء الله تعمل العملية و ترجع لباس ..
- انشاء الله وليدي انشاء الله..
-ارتاح تو..خليني انا نمشي نڨجم حذا حيوتة ....
خرج ..ماشي لامو ...قد ما يقرب الكوجينة ....قد ما الريحة البنينة تدخل لخشمو ..حب يتبولد عليها..دخل من سكات..بالشوية باش متفيقش بيه ..قرب وراها بالضبط و حملها بايديه الزوز...
-حبي انا ..شتيبطلنا ليوم...
شهقت فرد شهقة مفجوعة..
-ووه..صقر ..يا وليدي ..فجعتني علاه هكا..
دورهت ليه و باسها من جبينها..
-لطف على حبي من الفجعة
-اي اي حبك..كان جات الدنيا دنيا راك تقول في هالكلام لمرتك موش ليلي..
-ههه حيوتة عرس ديراكت ماقلتش حتى خطبة..و زيد من اكا لعام قتلك ما عنديش مع هالحكايات..
دزتو متغششة
-كهو شدلي وجهي و قعد مالا
-شنو حيوتة قلقلت مني ..!!
-ايا اسطت عليا قالو فديت مني ..و اسمعني وليدي عمك رشيد الحوانتي قلك تعدالي...
- و علاه شفمة..؟؟
- يضهرلي لقالك خديمة سمحة ..
-باهي امي تو نمشيلو ...نخليك تو عندي ما نعمل ..
- وين ماشي وليدي
- متفاهم مع الاولاد..
قصت عليه منرفزة
- كالعادة ماشي للضرب و الهم ...يا كبدي فك علينا من هالحكيات ..تعرف الي المصارعة متاعكم موش قانونية ..عيش وليدي اخطانا المشاكل ...
طبس عود حملها اطمن فيها..
-تهنى امي تعرف عندك الرجال ..و تعرفني ما نحصلش ..
باسها من ايدها..
-ايا حيوتة اعطيني دعوية خير عاد..
-هه برا وليدي يسترك يجبرك ..اعليك على مين اعاديك...
- نعبو كمونك اا حيوتة..(شادلها خدودها بايديه الزوز)
- احشم اا طفل ..سيبني هه
سيبها بعد مشبعها بوس ..جاء خارج تلفتلها يتزعبن..
- حيوتة ااكا المغبون وحدو في البيت متنساهوش عاد (غمزها بطرف عينو)
هزت الكاس باش اطيشو عليه ...
- اخرج عليا ..و الله تحشم...
خرج يجري و هو يضحك شايخ عليها...تعدا لبيتو هز ساك الenrtainement ..و خرج ماشي للخربة الي يتصارعو فيها...
العشوية جات و الناس خرجت تتبرد قدام ديارها ..الحومة تغلي بحس الصغار...نساء ملمومين اقهوجو مع بعضهم..رجال تلعب في الشكبّة ..صوت حديثهم مسموع لاخر الحي لكن اول ما شافوه خارج من دارهم ..كلهم بكمو و سكتو ..و الي هذا هبط راسو قدر فيه..اما هو تعدى من قدامهم و راسو الفوق ..عينيه الي كيف الصقر ..دارت عالموجودين الكل..نڨزو عليه الصغار ابوسو فيه..الي احب اوريه الدبش الي باش يلبسو في رجوع القراية ..و الي احبو يعلمو كيفاه يكوّر..و الي ..و الي..ما سلك روحو منهم كان بالسيف..زرب في خطواتو خارج من الحومة هارب منهم ..و هارب من عينين النساء الي باش تاكلو من تحت حس مس ..صباية و معرسين لكلهم مضروبين فيه..كل وحدة ترمي في روحها عليه..لكن هو عمرو ما عطاهم وجه..الامور هاذي موش جوو جملة
__________
مالي خرج و هي تدعيلو بالهداية..مكسبها هو و تحب تتهنى عليه..تفكرت كلامو كيف قالها "المغبون وحدو متخليهوش"..ضحكت على هبالو..مدت اطيب في قهوية ليها و لراجلها..حبت تعدي لعشوية معاه فوق السطح..الطقس تحسن و النسمة تحيرت...نزلت عالرديون خدمتو ..ما تنجم ادور في الكوجينة كان بيه ..سلطنت مع صوت العندليب ... " كنا سوى قلبين..الحب جمع شملنا..و العين تقول للعين احنا تخلقنا لبعضنا..و ابقى جنبك و لانيش عارف ايه مخبى..و تروح الفكرة و تجي فكرة..صافيني مرة......"
ادندن في الغناية ..عايشتها بكل ما فيها من احساس..مشلقتش بيها حتى كيف وفات..كملت حضرت القهوة و صبتها في الكيسان ..هزت البلاتو و جات خارجة من لكوجينة..لكن سقيها تفكسات في القاعة ..دوب ما وذنها سمعت اسمو..ركزت مع كل كلمة اقول فيها مذيع الاخبار..."وفاة رجل الاعمال الشهير جلال المعالج بعد صراع طويل مع المرض...رحمه الله و جعل مثواه الجنة" ..شهقت بالقوي و سيبت الي في ايدها طاحو..كلها ترعش ..وجهها فيسع صفار و فمها فيسع شاح ..لعبت عليها الدوخة..ركزت بايدها على الطاولة ..جبدت كرسي و قعدت ترجع في النفس ....