كرونيك : 💕بنت الحي💕

2⃣0⃣

-لباس ؟؟(سألها بصوت واطي و هو يذبللها في عينيه)
-لبا..س (قالتها و هي ادور في عينيها لبعيد)
حط ايدو على كوبة الباب ..و ايدو لخرى حطها على كتفها اقدم فيها باش تدخل قبلو..حل الباب و قالها...
-تفضل...
غزرتلو و تبسمت...
-عيشك
تحل الباب و تحلت معاه عينين صقر الي تڨدح بالنار...عض على شفتو اغزل..منظرها و هي تغرلو في عينيه و تتبسم..و منظرو و هو حطط ايدو على كتفها و اذبللها في عينيه خلى بركان يتفجر فيه...
-سااجد(صاح بالقوي)
تهزو و تنفضو الزوز..دارو يغزرولو...رسمت تبسيمة من الطرف للطرف على فمها..نظرة الي الغيرة الي ياما شافتها في عينيه..مزالت هي هي...و حتى يمكن اكون غاير اكثر ..
-باش تبقى واقف برشا في الباب..؟؟(تكلم بصوت هادي اضيع في الجرة)
تبسم ساجد و دخل حالل ايديه باش يحضنو...وقف و هو فادد ستوا كوستيمو...و حل ايديه يستقبل في حضن اكبر عدو ليه....
- شريكي يا غول....
-لباس صاحبي ..
بعد عليه يغزرلو...
-اا الملديف واتتك خويا....
-تقول هكا انت...
يحكي معاه و يغزر لرسيل الي متكونسية في فم الباب...انتبهلو ساجد كيفاه لاهي بيها.. دار اناديبها ...
-رسيل ..ادخل شبيك واقفة فم..؟؟
خذات نفس طويل..حطت ساقها و خطات اول خطوة داخلة لعرين الاسد بيدو....قرب ساجد منو و تكلم بالشوية ..
-اا شقولك شريكي ...سلعة ممو موش هكا؟؟
دارلو رابط..ڨحرلو ڨحرة خلاتو اوخر بعيد عليه..هز حاجبو مستغرب...
-شبيك صقر!! (قالها و هو يرعش)
تبسم على جنب و هو من داخل يغلي عليه كان يلقى ياكلو بسنيه...
-عجبتني..(قالها بصوت راكز و واثق)
ضحك ساجد ضحكة خبيثة..دور راسو يغزرلها و هي جايتهم...كلاها ماكلة ..عينيه تعدات على بدنها الكل..حس بايد كبست على كتفو و نفس ضربو بحذا وذنو...
-عجبتني ..و برشا زادا..لدرجة انك باش تروح و تخليها...
طرشق ساجد بالضحك و دار يغزرلو بتبهليل...وقفت في نص البيرو ضحكة ساجد و التشويش الي صار بيناتهم دخلها بعضها ...حستهم يحكيو عليها و غزراتهم ليها اكبر دليل لاحساسها....غمزو بشطر عينو ..وطى في صوتو و تكلم..
-شنو شريكي باش تجرب قبلي..بون المرة هاذي سامحني انا عاجبتني اكثر منك..و منجمش نروح و نخليهالك..هههه و فوق هاذا خوك قاعد بلا سيكريتار...
نزل على ايديه و لزز على سنيه...عروق جبينو قريب انطّو ...طبس عليه و تكلم بكل ثقة في النفس...
-روح و خليها ..كلمتين برك منحبش نزيد الثالة...انت تعرفني كيف نحط حاجة في مخي نعملها و كلامي انا برك هو الي يتنفذ...
-ههه صقر ...تهدد فيا ياخي ..ناسي الي بدر ساندني في ضهري...
حك لحيتو ببرودية دم ....و جاوبو
-امم مانسيتش ...اما على قريب باش نقسمهولك ظهرك...
-ياخي ماكش خايف على امك و بوك..؟؟
-صدقني قربت نهايتكم...
ضحك ببلادة...
-كيما نجحنا باش نتحكمو فيك 8سنين احنا قادرين نتحكمو فيك لاخر يوم في عمرك...
هبل و تجنن من كلامو ...خطفو من كول الفاست متاعو...جبدو ليه وجهو في وجهو و هو عاضض على شفتو منرفز ..تهزت و تنفظت عرفتها باش تشعل..قصت فيسع عليهم...
-مسيو ساجد..عندك رونديفو نصف ساعة اخرى لازمنا نمشيو...
تلفتولها الزوز فرد وقت ..ساجد يغزرلها داهش من حكاية الرونديفو الي مفماش منها...و صقر اغزل عليها احب اشد يعطيها طريحة...سيب ايديه منو ..وخر خطوة بعيدة عليه ..ريڨل الفاست متاعو و دار خارج...
-رسيل هيا نمشيو....
-سااااجد ....هز السكريتار متاعي معاك ...(تبسم على جنب يتمنيك) باش نديشو شريكي ...
تلفتلو اغزل جاء اجاوبو... قصت عليه رسيل كيف تكلمت و هي تقدم لشيرة صقر بكل ثقة في روحها....
-سامحني مسيو صقر..اما انا نخدم عند مسيو ساجد موش عندك...
طرشق بالضحك عليها..قدملها بخطوات مزروبة ...وقف قدامها و حط ايدو تحت دقنتها..
-و مسيو ساجد يخدم عندي انا..يا (سكت شوية ..طبس عليها اوشوش ) قزمة..
شهقت بالشوية..رعشة خفيفة سرات في بدنها كامل..وذانها سخنو و وجهها فيسع حمار...
هز راسو يغزر لساجد..
-شريكي يظهرلي كلامي واضح..تنجم تتفضل و متنساش غدوة عندنا اجتماع مع الشاري الروسي باش نتممو بيعة الكراهب الجدد..