كرونيك : 💕بنت الحي💕

2⃣3⃣

الحلقة 23:
-انت تنفذ و من فم ساكت..و كلامي منحبوش يتعاود مرتين..
خلاها واقفة مصدومة و خرج....تلمدو رجالو الكل..نڨز واحد فيهم حلو كرهبتو..وقفو بايدو..
-جيبلي الكرهبة الكحلة ماشي وحدي ...
هزلو براسو و مشى يجري باش اخرجها من ڨراج الشركة...حط ايديه في جيابو ...تلفت لواحد اخر من رجالو
-امشي للوتيل *** حظرلي اكبر سويت فيه....و بعد هز الرجال و وصل السيكرتار الجديدة لدارهم و من بعد رجعها للوتيل ..و من غير ما نوصي تستحق اي حاجة اعملهالها.. راني نسمع اي حاجة قللقتها منكم تعرفني شنو نجم نعمل..
هبط راسو خايف منو
-حاضر مسيو صقر...
جات الكرهبة ..هبط الراجل و حلو الباب باش يركب..وخرو الكل لتالي مكتفين ايديهم و راسهم في القاعة...نزل عالفتاس و طار بالكرهبة ....
خارجة من الشركة تهز و تنفض..فادة من الرجال الي اتبعو فيها عالتحريكة...حللولها باب الكرهبة و طارو بيها للحي...اول ما وصلت الناس الكل فزعت و خرجت ترى فيها...التوتويت كثر ..مظهرها الجديد و الكرهبة الي جات فيها خلاتهم يحكيو و اجيبوها صحري بحري...هبطت راسها و قدمت لشيرة داراهم ما عينهاش باش تتعارك معهام ...خاصة و انو معاها الرجال متعاو..تعرف انو لو كان واحد من الحي يغلط فيها حتى بكلمة....يحرقو الحومة بالي فيها...دقت باب دارهم و هي محاوطة براجل عالمين و راجل عالايسار..حلتلها امها..تفجعت و وخرت خطوة لتالي..
-ووه بنيتي شبيك و شكونهم هاذم..؟؟
-شي امي شي ما تتفجعش..هاكوما رجال عرفي..
دخلت للدار ..جاو يدخلو وراها ...عملتلهم بايدها باش ياقفو تكلم واحد فيهم...
-مدام عندنا اوامر باش نلازموك كيف ظلك..
-شنو ..لا وهرة ملا قولي حتى في بيت البانو باش تدخلو معاها ؟؟
تكلمت امها و هي حاطة ايدها في حزامها شاريتلهم عركة...هبطو راسهم في القاعة ...ضحكت رسيل عليهم و تلفتت لامها...
-امي شعليك فيهم هوما اقولو الي احبو و انا نعمل الي نحب..بابا وين الساعة ؟؟
-انت قولي الساعة شبيهم جايين معاك.. و شكون هذا عرفك باش يعمل رجال كيفهم اعسو عليك..اه؟؟؟
-امي ماهمش اعسو عليا ..هاذم جايين باش اعوانونا نقلو دبشنا
-نقلو دبشنا ؟؟
تكلم بوها و هو هابط من الدروج..تلفتلو تضحك..قدمتلو فيسع..شدتلو ايدو
-بابا ...باش نحولو من الحي..
-شنو ..لواش باش نحولو ..؟؟
-بابا عرفي عطاني بيت باهية في الوتيل متاعو..لازمنا نحولوها خاطر احبني قريبة للخدمة ...و زيد يمكن يستحقني في اي وقت...
قص عليها منرفز...
-رسيل معندنا لواش محولين..و عرفك هاذا يحكم على روحو موش علينا..
-يا بابا افهمني ...الخدمة باهية و الشهرية طايرة..خلينا نحولو عيشك..
-رسيل تحب تحول حول وحدك..انا و امك من الحي منخرجوش..
-با..
-كلمة برك...
-لكن انا منجمش منوافقش..مصدقة ربي لقيتها الخدمة ...و موش انت قتلي صلح من روحك.. بابا عيشك اقبل.. انت زادا عاوني باش نكمل في الطريق الصحيح..
تنهد و هز ايده شدلها وجهها..
-رسيل..تنجم انت تحول ..انا نعرف بنتي شنو و مطمان بيك...
-بابا تحكي بالحق؟؟
-شوف بنتي انا و امك منجموش نتخلاو عالحومة ..و انت عندك الحق...الخدمة هاذي فرصة متتعودش انا نعطيك موافقتي باش تحول اما على شرط...اخر كل جمعة تعديها في دارنا ..متفاهمين...
ترمات في حضنو.. عنقتو تبكي
-لا.. ماناش متفاهمين..انا منجمش نمشي بلا بيكم..كيفاه تحبوني نبعد عليكم (تبكي و تشهق)
قدمتلها امها طبطبلها على ظهرها..
-رسيل..موش طول عمرك تحب تستقل وحدك..هاذي فرصتك بنتي..اخدم على روحك و حقق الي كنت تحب تعملو الكل..
دارت طول حملت امها و كملت بكيتها في حضنها....
_____
وصل للبحر ....ركى كرهبتو و هبط...وقف يستنى فيهم ايجو ....كان متأكد انو خالو باش اقابلو ليوم قبل غدوة...وجود رسيل في حياتو اكبر خطر على روحو قبل ما اكون خطر عليها...لكن المرة هاذي موش باش اسلم فيها...
هو مصدق ربي المكتوب عود جابها لثنيتو...وعد روحو باش يحميها لاخر نفس فيه...حتى و هو متغشش عليها...لانو ببساطة هي الوحيدة الي ساكنة قلبو...هز راسو لقدام .ركز عينيه عالبحر...الموجة قوية تضرب عالحجر...صوتها اززع السكون الي داير بيه...الطقس مغيم ...خرج تنهيدة من عروش قلبو...دخل ايدو لجيبو باش امد دخانو....حس بحاجة تحطت على راسو....تبسم على جنب عرفهم هوما..
-ايديك الفوق
هز ايديه ...دار بالشوية قابلهم..لوج بعينيه عليه ملقاهوش...قدم واحد فيهم افركس فيه....
-نضيف ..معندو شي..
-شنو عرفكم للدرجة هاذي خايف مني.. باعثكم انتم(تكلم باستهزاء)
ضربو واحد اخر ببونية على كرشو...طرشق بالضحك
-كهو اكا الي قدرت عليه..
نڨز باش يخنقو... وقفو واحد من صاحبو ...
-موش وقتو المعلم يستنى...
وخر للتالي و هو اغزل على صقر..تكلم الي حاطو الفرد في راسو..
-تحرك لقدام..