كرونيك : 💕بنت الحي💕

3⃣5⃣

الحلقة 35
تنهدت و كملت كلامها...
-وسيم تعرف الي انت وليت خاءن بالنسبة ليهم ...و تعرف الي هوما يستناو فيا نتلقى بيك باش يصلولك....
هز صبعو حطو على فمها..
-ششش ماني خايف من حد ...و الشخص الي كنت خايف عليه هو تو بين ايديا و في حمايتي...(تبسملها) انت معايا متخمم في شي ...نعرفك قوية ...و قوتك هي الي تزيد تقويني...
نحاتلو صبعو بالشوية..
-وسيم ...هذاي امريكا...و تعرف الي ما يصعب عليها شي...
ضحك باستهزاز...هز و جهو لصقر...
-هذاكا صقر...(رجع صبعو لشيرتو هو) و هذا انا...لا امريكا و لا غيرها يقدرو ياقف في وجه انتقامنا...(تلفت لخوه) شقااال عشيري...؟؟
هز ايدو الفوق بكل فخر و قوة...
-خويا الغول...عندك شك انت
تبسملو و رجع بغزرلها...هز روحو شوية و جبدها من رقبتها ليه...حطلها جبينها على جبينو و تكلم و هو يغزر في عينيها...
-اوثق فيا صغرونتي...
ذابت من نفسو الي دغدغها وجهها و من ريحتو الي عباتلها خشمها...حركت فمها بالسيف باش نجمت تنطق و تخرج من البير الي غرقت فيه...
-واثقة فيك وسيم...
حمحم صقر و تكلم بتزعبين..
-شعملنا تو في تدريب رسيل...انا راني لاهي و ما نرتاح كان ما نجيب الكلب الروسي الي خطفلي مرتي...لازم نطلعو من تحت الارض...
هزت راسها فرحانة بكلمة مرتي..زاد كبس عليها حملها...تلفتت تغزرلها من الفوق اللوطة ...بعدت على وسيم و تكلمت بصوت راكز و واثق...
-خليوها عليا...
ضحك وسيم بالقوي ...تلفتلو الكل..تكلم و هو اكح من وجيعة الضحكة في صدرو...
-و الله و حصلت يا رسيل...
راقدة في الفرش ...تململت و مدت ايدها تلوج عليه...جبدت مخدتو عنقتها و غطست راسها تشم في ريحتو فيها....الدنيا برد و المطر تصب...استحلات النومة في الفرش...زادت جبدت الكوات و تكلفصت على روحها تلوج على الدفى....واقفة فوق راسها في البيت...تغزر لمنڨالتها تستنى في ال8h ...مزالو دقايق و اصير الوقت ...هزت ايدها تعد بصوابعها...1 ..2..3 ....طبست هزت سطل الماء ووواب صبتو عليها....تلسعت بالماء البارد حلت عينيها على وسعهم...صااحت على طول صوتها....نڨزت جات واقفة فوق الفرش...ترعش بكلها كالفلوس...لابسة شرط روز قصير...و خلعة بلون شفافة مظهرتلها صدرها الي من غير سوتيان...ظمت ايدها على روحها بردانة....الماء اقطر فوقها ....سنانها اطربق على بعضهم...و فمها فيسع ما زراق..
-مييييررااا
صااحت منرفزة....دارت و عطاتها بظهرها و هي تحكي بدم بارد...
-في ايدك درج و تكون حاضرة و واقفة قدامي ...تعلم الانظباط و القومان بكري ....تحررررك كلامي منحبش نعودو مرتين
هزت حاجبها و عضت شفتها...نسخة مصغرة من وسيم..نفس الغرور و نفس طريقة الكلام...نڨزت هبطت من فوق الفرش...زربت خطواتها و سبقتها خارجة من البيت...القاعة نقبتها بقوة خطواتها....تكلمت بصوت كلو تهديد من غير ما تاقف و تغزرلها...
-مانيش باش نتصرف معاك خاطرك ضيفة صقر...اما و الله ما نقول لوسيم ااا تو تشوف...
لحقت عليها و خطفتها من ايدها دورتها ليها....نزلت على زندها و تكلمت...
-ايجا هنا ماشيتلو هكا سيادتك...
هبطت راسها تغزر لدبشها...كل شي فيها ظاهر...رجعت غزرت لعينيها ....ضحكت على جنب و هي ترى في نظرات الغيرة الي تتناطر منها....حبت تشيخ عليها و تخليها تغزل منها...عالاقل اترجع فازتها منها....هزت حاجبها و عوجت فمها....
-عادش بي شبيهم دبشي ..الساعة الماء زادني اغراء على اغراء....
هبلت و تجننت...غمضت عينيها تهدي في روحها و تلعن في الشيطان..سيبتلها ايدها ...هزت الروب متاعها و جبدت فرد من زوز فرودة معلقين في فخوظها ...حلت عينيها مفجوعة منها...لعبتو بين صوابعها و تكلمت بصوت هادي عكس البركان الي في داخلها....
-خمم قبل ما انك تحاول تخطي خطوة...خاطر نوعدك انك تولي تتحرك كان في كروسة.....و صدقني حد ما ينجم يمنعني لا وسيم و لا صقر..انت تو تحت مسؤليتي...و انا الوحيدة الي عندي حق نقرر انت شتعمل و ما تعملش ...و تو هي تحرك في ايدك دقيقتن موش درج و تكون قدامي ...si non ..
هزت ايدها...دورت الفرد في الفضاء ...و رجعت خطفتو في ايدها و قابلتو بيها ...
-booooom (صااحت عليها بالقوي)
تهزت و تنفضت في بقعتها...قلبها تقبض و هي تغزر لملامح وجهها...الطفلة هاذي بالحق كيما قال عليها وسيم...قوية ..و ما عندها وين ادور الريح...نفخت فادة من سيطرتها عليها...
-باهي دقيقتين و نكون بحذاااك(قربت منها و تكلمت بتمنيك) شريرة...
ضحكت و تكلمت بثقة..
-مزالت ما ريت شي....يلا فيسع تحرك...
حلت الدرسينغ متاعها.جبدت دبشها ...و مشات داخلة لبيت البانو......حلت الباب...دخلت و علقت دبشها..جات تدخل تحت الدوش ...لمحت حاجة مكتوبة عالمراية ..