كرونيك : 💕بنت الحي💕

1⃣7⃣

الحلقة 17
قاعدة في القاعة ..ساندة ظهرها للفرش..ظامة ايديها على روحها..عينيها متنحاتش من على المنڨالة الي في الحيط..تستنى في النهار يطلع بالدقيقة و الدرج...ليلة كاملة ما رقدتش...خايفة و مرعوبة..عدات ليلتها تتخيل كيفاش باش تتلاقى بيه..زعمة اواجهها و لا يعمل روحو معرفهاش..في داخلها شعور مفهمتوش..من جيهة تحس في قلبها مقبوض و مفجوع ..و من جهة تحس في رعشة في بدنها ..دغديغة صغيرة كانت تحسها قبل كيف تكون باش تراه....جهرها ضو الشمس في عينها..تنطرت وقفت..دخلت عملت دوشها ..كملت و خرجت لبست سروال دجين و مريول بالايدن في النوار و فوقو جكات كوير في النوار..لبست الكونفارس متاعها ..و خرجت طول لا عملت مكياج و لا برفنت..مخها موش في الحوايج هاذم..فادة و معينيها في شي...حتى انها خرجت من الدار ما غير لا تاكل و لا تسلم على امها و بوها....
تمشي و تزرب في خطواتها لازمها تتعدى للاقليم قبل..باش افهموها اشتعمل بالضبط...قربت لراس النهج شافت كرهبة ميني كوبر في الروج مراكية قدام الزقة بالضبط..زادت قدمت و هي داهشة ....موش عوايدها تشوف كراهب كيما هكا مراكين في الحي..هزت راسها تثبت بعينيها ..تلوج على مولا الكرهبة...جبدت انتباهها طفلة قاعدة فوق سطحة بعيدة شوية عالكرهبة...طفلة مزيانة برشا...شعرها مصبوغ و طويل..عينيها عسلين..فمها صغرون و مرسوم...لابسة و مزينة ...عقدت حواجبها مستغربة من وجودها ...هزت راسها تغزرلها...قامت نفظت دبشها...هزت ساكها في ايدها و مشاتلها خطوات ..وقفت قدامها قدقد ...تبسمت و كلمتها ...
-عسلامة رسيل..
زادت دهشت اكثر ..غزرتلها كيفاه لابسة و ريحت برفانتها البنينة عبات البلاصة...حشمت على روحها و هي تعمل في مقارنة بيناتهم ...سألتها بصوت واطي ..
-سامحني تعرفني ياخي؟؟
-بون ..انا منعرفكش..اما اعطاوني معلومات عليك..
-!!!!
-ههه منضيعكش..(مدت ايدها تسلم عليها) انا هزار خبيرة تجميل..عيني سي منذر *** (وكيل الجمهرية ) باش نتلهى بمكايجك و لبستك زادة ...و في نفس الوقت باش نكون انا الخيط الرابط بيناتكم ..يعني اي معلومة تعرفها تقولها ليا و انا نوصلها ليهم..باش نضمنو السرية و الحماية ليك انت....
-و شبيهم لبستي و مكياجي؟؟ (سألتها و هي تتذمر)
- اسمعني رسيل ..ياش تقدر تخلي صقر احولك تخدم عندو هو لازمك تتلهى بمظهرك..و حسب ما شفت في تصاورك القدم انت كنت ولاعة و لاهية بروحك ..شنو الي خلاك تتبدل و تولي ..(يكتت شوية و كملت )...سامحني في الكلمة ..انت presque مسترجلة راك...
هبطت راسها فادة ..
-الحومة تعمل عزيزتي ..تأقلمت معاها و خذيت من طبياع ناسها
-موش مشكل معايا انا كل شي يتبدل ههه...(دارت حلت باب كرهبتها )هيا اطلع نمشيو للصونتر متاعي ..
- و الخدمة كيفاه..مفهمونيش عليها راهم..
-صقر ليوم اروح من الملديف ..كان عندو اجتماعات غادي لمدة 3 ايام ..و الاكيد انو ساجد باش يمشي يستقبلو في الشركة ..و بالطبيعة انت باش تكون معاه..بما انك انت وليت السكريتار الجديدة متاعو ...الجماعة شافو حل للسكريتار القديمة و بطلوها من خدمتها باش انت تشد بلاصتها....
حلت باب الكرهبة و ركبت..و ركبت معاها رسيل..
-هزار احكيلي على هذا ساجد كان عندك معلومات عليه...
-بون الي نعرفو ..انو هو شريك صقر ..عمرو 36 سنة ..انسان عينو زايغة ..و ما يعرف في حياتو كان النساء ..كل يوم مع وحدة ...
-وه يا هزار خوفتني و انا هذا كيفاه باش نخدم عندو..راني ما عندي وين ادور الريح...راهو كان احاول يقربلي و الله نصفرلو بروحو ..
-هه لا كهو فسدلنا المهمة من النهار لاول...و اسمعني هالالفاظ السوقية نحيها عليا...
-ههه باهي نحاول...
خدمت الكرهبة و طارت بيها للصونتر متاعها..ثنية كاملة و هي تنسي فيها في الخوف بالحديث..حستها على عصابها و متقلقة...و هي عندها فكرة على علاقتها القديمة بصقر..حنت عليها و حبت ادخلها في جوها و تصوحبها ...عالاقل تخفف عليها شوية من حملها...