كرونيك : 💕بنت الحي💕

7⃣

لحلقة 7:
قاعدة في بيروها تستنى فيه يوصل على نار...مالي قالها بوها الي هو حي و عطاه لشوفارهم القديم..و هي قالبة البر عليه...عيّنت رجال بوها الكل الوج عليه...
و في ظرف نهارين جابولها العنوان و اخبارو الكل..و الفضل الكل يرجع لرشيد الحوانتي..بقي اشوف بالعشرة و سهّل عليهم الطريق باش لقاوه..وقفت تمشي و تجي في البيرو ...موش مصدقة الي هي لقاتو..تحرمت منو 26 سنة..تعذبت و مرضت في فراقو...انعزلت على روحها..و نقمت على بوها الي كان سبب في فراقهم. ...قلبها تحس فيه باش يسكت بالفرحة..بكلها ترعش ..حبت تهدي روحها ..مشات صبت قهوتها ..متريضلها مخها كان هي ...هكا و الباب دق..دخل رشيد و دخل معاه صقر...لحمها قشعر و نفسها تقطع ..الدموع فيسع متجمعت في عينيها..ساقيها لحظة لا رخو بيها..الدنيا مشات و جات بيها..تحس في سككان تقطعلها في قلبها...ولدها قدام عينيها...طولو طولين و عرضو عرضين..راجل و عليه لكلام..غمضت عينيها ترد في النفس الي تقطع عليها...كل حاجة فيه ذكرتها ببوه..بوه الي تحرمت منو هو زادا...بوها كان ياسر ظالم معاها..قتللها حب حياتها و فرقها على القطعة الوحيدة الي بقاتلها من ريحتو... حلت عينيها قدمتلو و الضحكة مالية فمها...وقفت قدامو قدقد ..هزت ايديها الي ترعش..و شدتلو وجهو ...تغزرلو في عينيه ..تحب تتاكد من وجودو قدامها..هبطت دمعة على خدها و من دمعة ولاو دموع ..استغرب من تصروفاتها الموش عادية ...غزر لرشيد يسأل فيه بعينيه...حمحم رشيد و تكلم...
-مدام لباس
دورت راسها تغزر لرشيد...غمزها بعينو باش تفيق على روحها...وخرت فيسع عليه ..مسحت دموعها و تكلمت و هي تخبي في شهقتها..
-لباس ..لباس ..just فكري في انسان عزيز عليا...تفضلو
.تفضلو اقعدو..
شدو بلايصهم و دارت هي قعدت في كرسيها..هزت تليفون و كلمت السكريتار وصاتها على jus بارد ..اطفيلها النار الي شاعلة فيها...قعدو يحكيو في امور الخدمة فهمتو على كل شي ..الوقت و الشهرية...و..و...حلت قجر البيرو و مدت مفتاح و رزمة فلوس..
-صقر هذا مفتاح الكرهبة حطها على ذمتك ..انت الي باش تشوفر بيا..و هاذوما تسبقة على شهريتك..تستحقشي لبسة و لا حاجة...و اسمعني ماكش ملزوم باش تلبس كوستيم كحلة كيف رجالي لخرين..البس الي اريحك ..انت موش الحارس الشخصي متاعي ..انت باش تكون ايدي لايمن..سي رشيد يشكر فيك و اعود و انا عندي الثقة في اختيارو...موش هكا سي رشيد ؟؟
-اكيد مدام موكش باش تندم ..
-نعرف ..ملا تفاهمنا ..نهار الاثنين تبدا انشاء الله..
-لا متفاهمناش...
غزرتلو مصومة من كلمتو..قلبها تقبض و تفجعت لا اعود يبعد عليها ..و هي مصدقت لقاتو..كانت تجم تقلو راني امك..لكنها فضلت انها تقربلو و تتعرف عليه قبل ..تخليه يتعود عليها..تمسب ثيقتو و صحبتو ..و احسن طريقة باش توصول لبي تحب عليه انو اكون مساعدها و موجود في حياتها 24/24 ..
-سامحني!! ..علاه ولدي ؟؟
حطلها الفلوس و مفتاح الكرهبة فوق للطاولة ...
-الفلوس ياسر و موش متع تسبقة...و الكرهبة تنجم تبقى عندك و كيف نشد خدمتي ناخوه المفتاح من عندك و نرجعهولك كيف نكمل نهاري...
تبسمت تبسيمة خفيفة..."بخشمو كيف بوه" ..هكا قالت بينها و بين روحها..تنهدت و هزت الفلوس نقصت منهم تفتوفة و رجعت عطاتهملو..
-وهكا انجمو اكونو تسبقة ولا؟؟ اقبلهم عيشك ..و الكرهبة ميسالش تنجم تبقى عندي موش لازم تاخو المفتاح..
خذا الفلوس منها ..وقف باش اسلم عليها..مدت ايدها و حطتها في ايدو ..كبست عليها مليح و الضحكة قريب تخرج من عينيها..تبسمها و قالها..
-هكا نكونو متفاهمين...
خارج من الشركة شايخ ..عينيه تلمع بالفرحة اخيرا لقى خدمة باهية تعاونو..وقف و تلفت يغزر للشركة ..كبيرة و عالية ...شكون كان اقول الي هو باش يحرس بنت اكبر و اشهر رجال الاعمال في البلاد و خارجها..."جلال المعالج " ...تنفس براحة كبيرة..توا في مقدورو المّد فلوس العملية متاع بوه..و امو مبقاش تزيد تضرب ضربة في الخياطة ..وقف يتأمل في البلاصة و اخطط لبرشا حوايج باش يعملهم ...سمع حس فران قوي متاع كرهبة وقفت..تلفت يغزر ..راجل مضخم و موهر ..هابط من كرهبة classic بيضاء ..شعرو ابيض و عندو لحية غزيرة بيضاء زادة ..لابس لينات كونتر سولي و كسوة ظاهرة من أغلى الماركات..سمع صوت رشيد اكلم فيه..تلفتلو..
-هذا بالذات حاول تتفاده عيش ولدي..
-شكونو عم رشيد ؟؟
-بدر خو مدام نورهان (امو الحقانية)..
-اي و شريكها في الشركة ؟؟
-لا سي جلال يرحمو كتب كل شي باسم نورهان..الزوز وتلة الي عندو و الشركة هاذي متاع تصنيع السيارات.
رجع راسو يغزر لبدر..تبعو بعينيه لين دخل ..الظاهر من مشيتو و وجهو المقلوب انو مغشش...و كيفاه ما يتغشش وقت الي اختو فكتلو البلاصة الي كان طامع فيها...داخل للشركة يرفس في القاعة رفسان ...الناس الكل حسها بات..
الكل مرعوبين منو ..الي هذا طبس راسو الهي في روحو بحاجة...خايفين لا يحصلو بين ايديه و هو مغشش ...يمشي و يتحلف فيها..وصل لبيروها دز الباب و دخل طول اصيح عليها..
-نورهاان..شكون شاورت باش تلغي الصفقة الي عملتها مع ساجد ..
هزت راسها تغزرلو ..وخرت اتكات لتالي عالكرسي..جاوبتو بدم بارد و هي تلعب بالستيلو في ايديها..
-خويا العزيز ناسي الي انا مولات الشركة ...
قربلها فيسع و ضرب ايديه عالبيرو..
- و من وقتاش انت تفهم في الخدمة متاعنا...
-لا بدر برسمي لازمك تشوف طبيب ..الزهايمر عامل فيك انت ..نسيت زادة الي انا قارية دراسة اعمال...و فوق هذا سي ساجد متاعك ميعجبنيش و سمعتو تبارك الله سابقتو مانيش مستعدة باش نتعامل مع امثالو ..وااضح ..و تو تعمل مزية اخرج عندي خدمة في جرتي..