كرونيك : 💕بنت الحي💕

4⃣1⃣

الحلقة 41
خارج من الرستو..العصب اهز فيه و ينفض...الفاست متاعو في ايدو و شوميزتو مطروشة بالدم ....مخنوق ...فااد و باش يطرشق ..يستنى فيها تقول كلمة برك...و ينقض عليها اوريها عالفازة الي عملتها...تمشي وراه من سكات ...تحاول قد ما تقدر باش تتفاداه....منظرو و هدوءو ما يبشرش بالخير..اما في نفس الوقت فرحانة و شايخة بغيرتو و حزارتو عليها....و اخيرا تحركت فيه حاجة...لاول مرة تشوف ردت فعل كيف الي عملها في ال resto...عمرها ما شفتو افشخ في واحد على خاطر قربلها...كلاه و دمدمو ..مخلى فيه حتى عرق صحيح ....قريب يوصل لكرهبتو و هي لتو لا نطقت ...ستنى ستنى و دارلها رابط....
-عجبك الي عملتو..طرطور انا معاك...مخرجك تتفرهد تقوم تشطحلي مع واحد ط... لا تعرفو لا يعرفك....(اصيح في وصت الشارع و كشاشو طالعة)
-شبيك وسيم ....الي عملتو ما يستاهلش هذا الكل ..اشفيها ..طلب مني رقصة و طاوعتو..عالفازة تبديل جو اكهو...
قربلها و خطفها من زندها ارج فيها....
-د....واليدك ...اطهطل فيا ..موش عاجبك وجودي معاك...اه ..تحب نفسدلك خليقت تو باش حد ما اعود يغزرلك ...اه ...شتحب نعملك تو..؟؟
-وسيم سيبني لعابد تغزر...
-يمشيو ....(هزها و حطها) و هاذي لبسة لابستها...كان موش من هالربع ميترو راهو ما يتلفتلك حد ...
تفارع فيه تحب تملص ايدها..
-شبيها لبستي..شفتني بيها قبل ما نخرجو ..فاش قام هالكلام تو..سيبني ..وسيم قتلك سيبني
زاد كبس عليها...تنرفزت من صياحو عليها في الشارع ..الناس الكل انتبهتلهم..و كثر التوشيش عليهم...قربتلو تحكي في وجهو...
-وسيم ...متخلينش نتصرف بالخايب معاك ...نحي ايديك من فوقي....
قربها ليه و زاد كبس عليها...نزل على سنيه اغزل عليها...
-وريني شباش تعمل تراه...
عضت شفتها ...هزت ساقها و دورتها على ساقيه و بحركة سريعة جبدتو و طيحتو في القاعة...قام باش اربيها عالفازة الي عملتها....نوقز تالفون ..نفض دبشو و خرجو..شاف نيمرو صقر...
-الو....
-....
-شنو ...باهي باهي ...اتو نخدم جهاز المراقبة...اسبقني و حظر الرجال اني جاي انا و ميرا...
علق و تلفت لميرا...
-اطلع فيسع...خطفو رسيل .
-اه شكوون. .
-اكييد ساجد ...الساقط كان يستنى فبها تظهر...
طلعو في الكرهبة...
-شنية حكايات جهاز المراقبة...
-سلسلة صقر ..ركبتلها البارح جهاز مراقبة...كنت عارف الي باش تصير الحكاية هاذي....
خدم الكرهبة و طار راجع للفيلا متاع الجبل..باش احظرو رواحهم للهجوم...
تحس في راسها رزين...بدنها الكل اسطر...الدنيا برد و حاسة بحاجة مكتفتها....مقدرتش تحل عينيها....مزالت مروهجة و تشم في ريحة قوية داخلة في خشاشها مدوختها
....فمها شايح و ريقها ناشف ...حبت تتكلم ما نجمتش...راسها غالبها و الوجيعة مسيطرة عليها...قاعد قدامها قالب الكرسي و حاطط ايديه على ظهرو...يستنى فيها تصحصح شوية من المخدر..شافها كبدات تتململ...هز راسو و غزر لواحد من رجالو ....غمزو و عطاه اشارة باش اكب عليها سطل الماء...شهقت فرد شهقة و حلت عينيها على وسعهم .....
________________
اسوق في الكرهبة طاير....خايف و مرعوب عليها...حتى و هو متاكد من انها قادرة تحمي روحها... عينيه متنحاتش من جهاز المراقبة الي باش اوصلهم لرسيل...اتبع فيها و ينعت في صقر عالبلاصة...قاعدة لتالي تعمر في الفرودة...متحزمة و متحلفة في ساجد ...متشوقة باش تتعرف عليه و تنسيه في حليب امو...علاقتها برسيل اطورت ياسر..و ولاو ما يحملوش في بعضهم دڨت الشوكة...صااح بالقوي ..
-نعععععن.....
تلفتلو مستغرب ..
-شصار شبيك...احكي...
-الجهاز سكت ...فمة حاجة عطلتو....
-دين....(ضرب ايدو عالفولون)
-وسعو بالكم ما يهمش المفيد عرفنا الطريق...نوصلو و بعد نتصرفو..
-اي اما هكا باش نتطعتلو...(جاوبها وسيم)
حطت ايدها على كتف صقر ..تهدي فيه...
-متخافش رسيل قوية و تڨد روحها....
_______________
حلت عينيها على وسعهم...دورت راسها تكتشف في البيت الي هي فيها...قابلتها نظرت عينيه الثاقبة...هبطت راسها تغزر للشيرة الي يغزرلها...لقات روحها عريانة لابسة كان 2piéce...عينيه مرشوقة على صدرها....يبلع في ريقو و اغص...الرغبة تشعل شعلان من عينيه...في مخو موال احب اغنيه...هز ايدو و عمل لرجالو باش يخرجو...قام من فوق الكرسي و قدملها....يلعب بالفرد بين صوابعو...وصل قدامها..قعد على ركبة و نصف...غزرلها من الفوق اللوطة...عض شفتو ...و تكلم
-حياتك بين ايديك...انت تقرر تحييها و الا تنهيها...
هزت حاجب و هبطت لاخر...عوجت فمها و قربتلو لوجهو...
-كيفاش ...نورني تراه!!
حط الفرد في جنبو...هز ايدو و عداها على بدنها من ساقيها لين وصل لاكتافها...تقززت و عافت لمساتو...نزلت على سنيها تغزل عليه ...يحرزلو ايديها مربوطة...قربلها اكثر ..و خرت راسها لتالي....غمزها و تكلم..
-نعرفك ذكية و تفهمها عالطاير...
-تحلم انت...