كرونيك : 💕بنت الحي💕

8⃣

لحلقة 8:
وصل للحومة هو رشيد ...
-عم رشيد وقفني في راس الزنقة .. ماشي لدار وليد قبل..
-ايا وليدي تفضل..
حل باب الكرهبة هابط..
-صقر ..
-نعم..
-ما نغير ما نوصيك ..حياة و مصطفى ملازمهمش يعرفو شتخدم و عند شكون..
-تهنى عم رشيد قلتلهم ...باش نعس في الصبيتار ..هوكا في بالك انت زادا باش كان سألوك و لا حاجة..
-باهي صحيت برا ربي معاك..
-عيشك رشيد يا غالي (قالها بتمقصيص)
-رجعنا شقتلك انا..
سكر باب الكرهبة ..طبس و حط ايديه الزوز عالشباك..
-انت قول الي تحب ..و انا عمل الي نحب ...(وقف على طولو و ضرب الكرهبة بايدو و هو يضحك )...ايا انست بزوبة اللهلوبة ههه...
دار ماشي لدار وليد ..يسمع في رشيد كيف الحقلو في الكلام..
-زوبة اللهلوبة هي الي وصلتك للشركة اا ط....
شاخ عليه ضحك كيفاه اسب و يلعن فيه ..دق باب دار وليد..خرجتلو امو...
-مرحبا بولدي
حلت ايديها باش تحملو.
طبس اعنق فيها..
-وردة يا تحفة ..توحشتك راني ..
-اي لا واضح اكا علاه قلت نمشي نطل على امي وردة..(جبدتو من وذنو) ..متوحشتش ماكلتي اا طفل ...
دخل لداخل..يمشي و هو مدور ايدو محملها..
-تعرف امي وردة شاهي سيفة عجة بالكروفات متكون كان من ادياتك انت ..ههه
-اكا الي بيك برا اطلع لوليد اوكا في السطح ربيع ساعة و تكون لعجة عندك..
باسها من راسها..
-وحدك حصيلو ...
طلع يجري في الدروج..لقى وليد محضر القعدة ..قعد ديراكت ..صنعو جوهم..شرب (حشاكم ) و غناء ..صقر شايخ بخدمتو الجديدة و وليد فرحان لفرحة صاحبو ...طاح عليهم الليل و مشلقوش بالوقت على قد معملو جو ما بعضهم...
داخلة للحومة هي و صاحبتها ..يزربو في خطواتهم خايفين من الاولاد الي شادين جرتهم..مالي شافوهم داخلين و هوما اتبعو فيهم..
-امشي ميساء ..متلفتش وراك..
-رسيل خايفة راني و الله باش نعملها فوقي...
شق عليهم واحد من الاولاد..وقف قدامهم يتبولد ..وخرو مفجوعين...لقو الزوز الاخرين وراهم ..شدو ايدين بعضهم و لصقو في بعضهم يرعشو بالخوف..الدنيا ظلام و مافما حد في الحومة..
-ووا عرايس شبيكم خايفين....
قرب منهم اكثر...هو قرب و هوما عيطو الزوز على طول صوتهم...قاعد يسقسي في وليد على رسيل ..جابلو بحثها كامل ..في اما فاك تقرى و شكون اعز صاحبة عندها..حكالو على بوها كيف فلس و البانكة فكتلو الشركة و الفيلات متاعو...عرف عليها كل كبيرة و صغيرة ..كان مركز مع كل كلمة اقول فيها وليد لين سمع صوت عياط جاي من الدورة متاع الزنقة..تهز و تنفظ..وقف يجري اطل من فوق السطح ..شافها كيفاه محملة صاحبتها و ولاد دارين بيهم و ارميو في اديهم عليهم...حس الدم طلعلو ..هبط طاير ..اصف في الدروج صفان و في جرتو وليد لاحق معاه...
ترعش بكلها..مكبشة في ايد صاحبتها ...قلبها اخض خضان...كل ما واحد فيهم اشدها تقوي في بكيتها..و مع بكيتها يقوى صوت صياح ميساء ...حست بايد جبدتها و جبدت هي صاحبتها معاها من قوة الجبدة..هزت عينيها تغزر ..واقفة ورى نفس الكتاف العراض الي دوخها امس الصباح ..
-ص..قر
من فرحتها دورت ايديها على كرشو حملتو..
جبدها من ايديها و عنقها ..غزر للاولاد و العصب ماكنو من ساسو لراسو..وخرو لتالي خايفين منو ..لا نجمو يهربو و لا يتكلمو..هبطو راسهم و يستناو في عقابهم منو..
-الحاضر يعلم الغايب ..الطفلة هاذي تابعتني ..و مزال واحد يقربلها ..ليها ...لبوها و الا امها..
جبدتو من مريولو قصت عليه..هبط راسو يغزرلها..كلمتو و هي شادة دموعها و شفتها ترعش ..
- و صا..حبتي
نزل على شفتو ..و رجع يغزر للاولاد
- والا يتعرض لصاحبتها...نحسب ربي خلقو و انا نفصلو...واااضح
-واضح (تكلمو لكل فرد وقت)
-رسيل روح للدار ..
بعدت عليه شدت ايد صاحبتها و كركرتها و راها..وقفها صوتو
-رسيييل..حط الشباك محلول و البس حاجة مستورة ..حسابي معاك لتو مكمل..
-با..هي
قالتها و درات تجري هي و ميساء للدار