كرونيك : 💕بنت الحي💕

2⃣5⃣

لحلقة 25
حلت عينيها مفجوعة سرقها الوقت و مفاقتش بروحها...شللت لحمها بالماء..وقفت و جبدت المنشفة لفت بيها روحها...رمات بشكير فوق شعرها تشيح فيه ..حلت الباب خرجت و هي مطبسة راسها باقي تشيح في شعرها...هز راسو يغزرلها...لابسة فوطة قصيرة برشا...قطرات ماء هابطة عالقاعة من بدنها...ساقيها مفورمين اهبلو...انوثتها طغات عليه..و ريحة الجال دوش chocolat متاعها سكرتو و هو فايق...خذا نفس طويل يتبنن فيها...حمحم ..هزت راسها مفجوعة ...طيحت البشكير من ايديها...حطت ايدها الزوز عالفوطة كابسة عليها خايفتها لا اطيح ..و وخرت خطوة و دارت راجعة لبيت البانو..وقف و في رمشة عين كان وراها و خاطفها ما بين ايديه...دورها وجهها لوجهو ..
-ش..تعمل هوني ...كيفاه دخلت(تحكي و ترعش )
ساكت ضايع فيها....عينيه دارت على كل تفصيل في وجهها...عينيها الي تلمع من الخوف...خدودها الحمر بالحشمة..وصولا لشفيافها الي يرعشو و مع رعشتهم رعش قلبو و كرون سرى في كامل بدنو...حس الدم جمد في عروقو...يتأمل فيها و احس في روحو قاعد يغرق في قاع مليهش نهاية...
-صقر سيبني...
مسمعهاش..قدم خطوة و هو شاددها..وخرت ساقها التالي...زاد خطوة اخرى..وخرت و هي ترعش خايفة من مشاعر الرغبة الي في داخلها...وجودها قدامو و هي بين ايديه..حير فيها نار الاشتياق...و خطوة ورى خطوة..لقات روحها لاصقة في باب بيت البانو ...
تقطع عليها النفس...صدرها ضاق عليها...كل حاجة في بدنها تفبري وحدها....هبط ايديه من ايديها ..حطهم في جنابها نزل عليها و قربلها اكثر....طبس عليها ..حط جبينو على جبينها و خشمو فوق خشمها...غمض عينيه ...بلعت ريقها...
-ص..
-شششش متخافش...منعمل شي..
-سي.ني عيشك...
-رسيل..اسكت..(صاح بالشوية)
-ما نس
قص عليها ..حط صبعو فوق فمها...تكلم بصوت كلو رغبة و حنين...
-قتلك ما نعملك شي ...نحب كون قريب منك ...نوعدك شوية و نخرج على روحي....
ذابت من كلامو...هي موش خايفة منو هي خايفة من الضعف الي تحس فيه ...نفسها قوى ..و قلبها تسارعت دقاتو...غمضت عينيها و حاولت انها تعيش اللحظة و تنسى كل حاجة اخرى ...
-علاش...علاش كنت تستاعر بيا قدام صحابك لبنات؟؟
سؤال جاها على غفلة بصوت ضعيف و حنين...كلو عتاب و لوم..حلت عينيها على وسعهم ..موش فاهمة شي...حل عينيه يغزرلها...ضايعة و حايرة ...
-سمعتك رسيل ..سمعتك بوذاني ...تتفكر نهارت الي وصلت للفاك و انت نسيت تلفونك عندي ؟؟
شهقت بالشوية كيف مخها عمل فلاش باك للنهار هذاكا...
ضحك على جنب..
-شكلك تفكرت...نهارتها رجعت نجيبلك في تلفونك و سمعت كل كلمة حكيتوها انت و صحباتك...،(تنهد )خسارتك و خسارة الحب الي حبتهولك...
-ص..
-كلمة لا.....
دزها عالباب و دار..تنرفزت و تفكرت خيانتو ليها...خطفتو من ايدو رجعتو ليها وووواب هزت ايدها تعطيه كف على قوة جهدها..
- هاذي خاطرك خنتني..
قالتها بكل غل..و قبل ما تلحق تاخو النفس ..انقض عليها شدلها وجها كبس عليه..طبس عليها و عضلها شفتها اللوطانية.... هزت ايدها نزلت على جنابو..باسها بوسة طويلة بكلها غل و قوة ...بعد عليها يلهث من قوة الي احس فيه...تكلم و هو حاطط فمو على فمها...
- هاذي باش تتربى و متعودش تهز ايدك عليا
عود دزها عالباب ودار خارج ...وقف قدام الباب هز صبعو لشيرة الفرش و تكلم من غير ما يتلفت...
-نلقاك لابسة حاجة بخلاف هاكا نقصلك ساقيك ...
تفكر الي هي قاتلو فددتني بكلمة واضح ...دار غزرلها ضحك على جنب و صاح بالقوي
-وااااضح
كانت دايخة من مفعول البوسة و مع صوت عياطو تقامت و تحطت...ضحك عليها ..حك خشمو بصبعو و خرج من البيت...