بيت بيوت

ليش

صدفه لو شنو ....
يمكن متعمد يجي ويمكن لا بعد هذا الغياب واللي استمر بعد سبع سنوات وهسه
ليش هذا التوقيت بالذات جنت كلش مرتاحه بذاك اليوم الى ان دخل لمكان عملي وكانت صدمتي ورد الفعل بين دمعه وبين كره وبين سؤال ليش هسه وشجابه وشعنده جاي
مااعرف حسيت الوقت توقف والدنيا تغيرت
ظليت اباوع عليه على عيونه وعلى الشيب اللي صاير بشعره حيل اشكد متغيرر
لا اني سلمت ولا هو سلم
هي لحظات بس مرت كانما سنين
شنو اسوي ووين اروح اختل منه
زملائي بالعمل رحبوا بي واستقبلوا
بس اني كل اللي اعرفه فتحت الباب الخاص بغرفه الصوتيات واللي نسمي استوديو وغلقتها
اباوع على نفسي بالمرايه
ليش كل هاي الدموع شجاج روشنك طبعا روشنك هو اسمي
مو هذا اللي اذاج مو هذا اللي خلاج متنامين واخذ روحج منج معقوله
بعدج تحبي لو ماعرفتي تكرهي لو كرهتي ومن شفتي حنيتي اله
مااكدر اطلع عيوني حمر ماريد يشوفني انسانه ضعفت لان شافته ظليت فتره باستوديو الصوتيات الى ان هدأت وقررت اطلع
اكثر من مره حاولت ارتب الكلام شنو اكول
اشلون اسلم عليه
اثكل وجهي من اسلم عليه اخاف زملائنا ينتبهون لو عادي احجي وياه
ويه ماريد اطلع ....صار ترحيب بي وسمعت اللي ماحبيت اسمعه واللي جنت خايفه منه صار 
واللي جنت افكر بي وعندي قلق منه بعد ماتركنا بعض او بالاحرى من عافني
معقوله يصير هسه وليش بهذا التوقيت بالذات
لا يربي اتمنى اللي سمعته مو صحيح لان مااتحمل نهائيا ....اذا صار االي جنت خايفه منه