صباح الخميس
الساعة 7:30
صحو أهل البيت حسن وحيدر ونسوانهم وكانو معاهم نسمة ومحمد وفهد وعمر.
يلا نتعرف على عائلة حسن عبدالعزيز :
حسن عبد العزيز رجل اعمال ماهر زوجتو اسمها بدور دكتورة علم نفس 🙏 ... عندهم اربعة بنات وولدين
اكبرهم نسمة عمرها 23 سنة دكتورة في احدى المستشفيات المشهورة مختلفة تماما عن اخوانها ممكن نقول انها البنت المثالية في كل عائلتها جميلة جدا ، هادئة ورزينة ، محجبة ، عاقلة وحازمة ، بارا بوالديها وعندها وطنية كدا مفقودة في معظم الشباب .
بعديها محمد 22 سنة بيقرا هندسة في الخرطوم (جميلة ومستحيلة❤️) مربوع لكن مايل شوية للطول ... معضل 💪 سموري ووشو ملامحو جميلة نوع الناس البيعجبوك من اول نظرة .
بعديهو بنت اسمها مرام 20 سنة بتقرا ادراة اعمال في الاحفااد (الحب😍) حلوة شديد وانيقة ودلوعة بالاضافة لي شخصيتها القوية.
بعديها #نوران في 3 ثانوي عمرها 18 عيونها واسعة ورموشها طويلة لونها ابيض على برونزي شعرها طويل بس دايما بكون كيرلي وبتسرحو ضفيرة لي ورا جمالها صارخ .... مجنونة ومشاغبة لي درجة لايمكن وصفها وتصرفاتها زي الاولاد في كل حاجة مشيتها كلامها هدومها الرقة والدلع فيها منعدمات البت والولد الاخيرين توأم عمرهم 10 سنوات في 5 اساس حلوين ومستهبليييين .
كانو بيتونسو كلهم وبيضحكو وقطع كلامهم صوت البوري بتاع ترحيل نوران ..
محمد وهو بعاين لي ساعتو : نوران ماشه الليلة ؟
بدور : طبعا .... انا صحيتها من قبيل .
نسمه: 😲 كيف صحيتيها وانا لمن دخلت قبل شوية غرفتها كانت نايمة ؟؟؟؟
بدور: غايتو البت دي حتجنني في يوم 😔
حسن : دي المرة الثالثة في الشهر دا تعملها .
نسمة : خلوها علي -_-
طلعت فوق وشوية كدا جات نازله: محمد وصلها معاك المدرسة في طريقك.
محمد وهو مادي خشمو : خلاص انا اصلا اتعودت .
عمر: ههههههه 😂 الترحيل بفوتها مرات ولا شنو ؟
محمد : لا ما مرات دايما فايتها ، وانا السواق بتاعها .
نسمة : يلا مع السلامة انا ماشه المستشفى .
عمر متابع نسمة بعيونه لحد ماطلعت .
محمد: عمر
عمر لسا بعاين في الباب الطلعت منو نسمة .
محمد : عمرابي
عمر: ............
محمد بي صوت عالي : عمر مشيت وين ؟
عمر بي خلعة : ها لا لا معاك .
فهد وهو مبتسم ابتسامة جانبية وبي صوت مليان سخرية وهو لسا بعاين في التلفون : 😏 اي باين .
محمد : تجي معاي الجامعة ؟؟؟؟
عمر : طوالي ما عندي مشكلة .
محمد: فهد تجي معانا ؟
فهد : لا شكرا .... انا راجع اكمل نومتي لسا تعبان .
وهنا جا صوت دكتور حيدر وهو بقول : اوووو نوران شرفت كل العيون انتقلت لي فوق السلم .... كانت لابسة فستان المدرسة ( فستان ازرق ومعاهو قميص ابيض ) ومكفكفة يدين القميص ولابسة شنطة ضهر اديداس سوداء وجزمة سبورت اديداس سوداء (ما قلت ليكم ولد) جات نازلة وفي وشها ابتسامة مشاكسة والمشية ولا محمد اخوها ما بيعرف يمشي زيها 😂😂😂😂.
عمها وهو ببوس راسها : ماشاء الله ماشاء الله كبرتي والله .
نوران : احم 😌.... لكن والله يا عمو انت مز ما زي لمن اشوفك في الاسكايب ولا الواتسب .
حيدر: 😂😂😂😂 هههههههه
سلمت على عمر وبرضو شاغلتو بالكلام خلت الناس كلها تضحك .... ولمن جا دور فهد قالت بصوت عالي : الحلبي ود امو ( لقب فهد في الطفولة لانو كان اي حاجة يقولوها لي بكلم امو )
فهد رفع راسو : نوران كيفك تمام ؟
نوران : الحمد لله .... نورتو السودان .
فهد: منور بي اهله .
شوية كدا وطلعو ( محمد وعمر ونوران)
في العربية نوران راكبة ورا .... محمد شال كتابها اداهو لي عمر عشان تسمع القصيدة .
نوران وهي بتسمع فجأة من دون مقدمات : محمد الريال غلبو امبارح ؟؟؟
محمد وهو ضاغط فرامل وبكح بعد ماشرق بالشاي ... ختا الكباية ورفع النضارة في راسو : انا اسوي ليك شنو انا بس وريني اعمل شنو ..... يا بت الناس خليك مع قصيدتك وامتحان الشهادة الفاضل ليهو اقل من شهر ...مالك عايزة تجننيني .
نوران : امبارح دي وانا بسمع مش سالتني من الكورة
محمد : احم بتكون جات عفويا .
وبدت المناقرة بين محمد ونوران وعمر ميت من الضحك منهم لحدي ما وصلو نوران المدرسة ....... اول ما دخلت جاتها صحبتها اسمها جود جارية .( جود دبدوبة شوية كدا سمورية وبتلبس نضارات بتحب الكوريين مسكينة وظريفة )
جود : نورااااان الحقيني
نوران : مالك في شنو ؟
جود: فراسوه عمل شكلة وودوه الادارة .
نوران وهي بتربط في حزام جزمتها : اها وشنو يعني ما من زمن كنا في الروضة هو كل يوم عند الادارة .
جود وهي بتاخد في نفسها : لاااا المرة دي الشكلة الكبيرة وفراس كسر لي ولد من علمي سنو القداميه وام الولد قالت الا تبلغ الشرطة .... وفراس يعجبك في البرود وتقالة الدم .
نوران وهي داخلة على الفصل : سبب المشكلة شنو ؟؟؟
جود : ولد من علمي قال لي فراس امشي يالهجين وفراس طوالي نزل بنية في وش الولد اصحاب الولد خمسة لمو في فراس واولادنا بتاعين ادبي هاجو ونزلو في الشكلة .
فراس سوداني من ام شامية عمرو 18 سنة حلبي مززز بكل ما تحمله معاني الكلمة مجنن الاساتذة ورافع ضغطهم وكل يوم عند المديرة 😂 عندو عصابة في المدرسة مسيطرين على كل الطلبة ومعظمهم بيخافو منو بيلعب كورة سلة عشان طولو ماشاء الله .... عندو القاب في المدرسة منها زعيم المافيا والدوتشي .... والطلاب البيكرهو بقولو ليهو الهجين لكن ما بتجرأو يقولوها قدامو عشان ما يتكفتو 👋..... بعد ما دخلو الحصة شوية كدا فراس جا داخل .
نوران : اها كسرت سن الولد .
فراس وهو بكفكف في يد القميص : المرة الجاية راسو ان شاء الله .
الاستاذة : فراس و نوران اسكتو ولا بطلعكم بره .
وفجأة الاستاذة طلعت اوراق : يلا اي زول يطلع قلمو اختبار رياضيات مفاجئ .
علت اصوات الطلاب وهم بيعترضو .
الاستاذة:الماعاجبو يمشي للمديرة طوالي .... وكلهم قطعو الحركة عشان بخافو منها .
طبعا جود اولة ادبي طوالي نزلت في ورقتها ونوران برضو بدت تشتغل .... ناس بدو يكتبو وناس شغالين بسبس ويتهامسو والسؤال التاني اجابتو كيف 😂😂😂 ( اصيلين)
اما فراس كتب اسمو ودخل الورقة في الدرج ونااااام ما صحا الا بالاستاذة وهي بتقول اجمعو .
بعد ما الاستاذة طلعت فراس فتح موسيقى من تلفونو وقامو هو ونوران لبسو نضارات وعاملين فيها خلاص كدا جادين .
نوران: اخواني الطلاب الاعزاء لكم تحية طيبة بما انو ماف استاذ معانا انا ودكتور فراس حابين نديكم محاضرة علشان كدا الرجاء الانتباه ......
فراس وهو مشبك يدينو بي ورا وبي استهبال يموت ضحك : شكرا الاخت نوران .... الليلة محاضرتنا حتكون عن كيف تصطادين عريسا (التعليم انتهى 😂) فجأة الطلاب كلهم وشوشهم حمرت وبقو منطرين عيونهم وشغالين يكحو عشان فراس يسكت ... لكن فراس لسا مستمر في الكلام .... وفجأة صوت المديرة وهي بتصفق ياسلام جميل جدا البيحصل دا ... طبعا نوران وفراس بقو مجمدين .
المديرة : انتو الاتنين قدامي على المكتب وسيد التلفون دا يقنع منو .
نوران: جانا العيد .
وفي مكتب المديرة : كل يوم انت يا فراس جايبنك لي في بلوة كل يووووووم من زمن كنت في الاساس الليلة ضارب ولد وكاسر سنو .... وفي اختبار الرياضيات الناس كلها شغالة الا انت والاستاذة قالت كنت نايم .... جايب تلفونك المدرسة وانت عارف انو ممنوع ... لا وكمان بتحاكي الاساتذة وبتلعب في اوقات الفراغ المفروض تستسمرها وانتي كمان معاهو نسيتو انكم ممتحنين الشهادة ؟؟؟؟..... انا اعمل ليكم شنو كرهتوني المدارس والتدريس بقري بعمركم مرتين وماف مرة جوني طلاب زيكم .... استقيل ؟ عادي والله لو عايزني بستقيل .
فراس : استاذة ممكن بس التلفون عشان المنبه حيضرب بعد شوية .
المديرة وهي بتقعد بي انهيار في الكرسي : ياربي دا شنو المصيبة الوقعت فيني دي بس .... قامت على حيلها وجرت فراس من كرفتتو👔: فرااااس عبد الله عقابك كالاتي شفت شعرك الحلو دا وقسما عظما لو ماجاني بكرة محلوق الا احلقو ليك بيدي في ساحة المدرسة والطلاب والعمال كلهم يحضرو .... وتلفونك دا كان مت ما بديك ليهو ولو جاتني قبيلتك كلها .
فراس : لااا عليك الله دا زي ولدي ما بقدر اعيش من دونو.😢
المديرة بصريخ : انا حاخليك تعيش من دونو 😤😠.... انتي يا نوران ارجعي الفصل وتكتبي لي القصائد بتاعت الحفظ كل واحدة 10 مرات .
نوران: لااااا عليك الله كدا كتير .
المديرة : ايواااا كدا يعني طيب .... امشي شيلي سلة الوساخ وعايزاك تلفي المدرسة دي كلها ما الاقي قشة في الارض ...اما انت تمشي تجري لي في ساحة المدرسة لحدي ما اقول ليك بس .
طبعا نوران مشت المقصف شالت كراتين وعلب رمتها وخلوها ترجع الفصل ... اما فراس 😂😂 لفا المدرسة قرابة السسبع مرات والمديرة اصلو ابت تحن عليهو (يستاهل) وبعد مسااااافة حتن خلتو يرجع الفصل وبعد ما كملو يومهم الدراسي اي واحد رجع البيت .... نوران اول ما دخلت لقت.....
■يتبع
