نور العين

٩

#نور_العين
-٩-

بعد ما خلصو اكلهم .....
كرم : انا عايز اسبح 🌊
فراس : قصدك عايز تغرق .... انت يادوب خلصت اكل... امشي اسبح عشان يجيك شد عضلي في الموية وما يطلعوك الا وقاريين عليك الفاتحة .
كرم : بعد الشر علي .... وبعدين انا اصلا عايز اتمشى... يعني نص ساعة كدا وامشي اسبح .... حتسبحو معاي ما حتخلوني براي صح ؟
احمد : حنسبح معاك طبعا
بعديها قامو واتمشو طويل .... وكانو مجموعات اي شلة براها ... فهد وفي كانو اخر ناس ماشين ورا واي واحد فيهم بالو مشغول .
جاهم محمد ورا : هوي انتو مالكم الليلةمن ما طلعنا سرحانين؟.... ما اكلتو ولا شربتو اي شي وساكتين ؟؟؟
فهد وهو بعاين لي في : صحي ؟؟؟
في : لا .... انا ما بحب اكل المطاعم ... وبعدين بحب اتأمل في الناس والشوارع .
محمد وهو بيمسكهم من يدينهم : طيب تعالو معانا قدام ما تمشو ورا براكم بيخطفوكم انا امكم موصياني عليكم 😂.
بعد لفة طويلة مشو البحر .... البنات قعدو في الرملة والاولاد طلعو هدومهم كانو لابسين شورتات سباحة ودخلو في الموية .... مرام شايلة كاميرة كرم وبتصور في الناس ( مدورة ياسر حمدي 😂)... في قامت تتمشى وتجمع في الصدف الفي الرملة..... الاولاد يطلعو ويدخلو يغطسو ويمرقو.... ومحمد عمل فيهم عمايل ...مرة يخلعهم يعمل نفسو غرقان ... ومرة ينزل ويجر رجلينهم من تحت ... مرة يجي طاير من تحت ويقلبهم في الموية 😂.
ترتيل قامت عشان ترد على صحبتها مي في التلفون :ميمي مشتاقين 😍
مي : عليك الله لو مشتاقة لي كنتي حتضربي لي .
ترتيل :انتي هبلة ؟ انا يادوب جيت امبارح
مي : ما علينا ... المهم ان شاء الله تكوني مظبطا امورك مع فهود .
نرتيل : 😠 ما تقولي فهود ..... قولي فهد وبس .
مي : 😂😂😂 اخ من الغيرة ... اها فهد .
ترتيل : بيتكلم معاي كتير (قصدك بتتكلمي معاو كتير ؟)
مي : هو سمح ؟
ترتيل : ما بيتوصف يا مي .... ما بيتوصف .... دا فارس احلامي الكنت بفتش عليهو بالسنين .... قاري في ماليزيا 💔.... دكتور اسنان💔 .... بيتكلم 3 لغات💔 .... واثق في نفسو💔..... عندو غرور كدا حلو شديد 💔..... لمن حاجة تستفزو بيرفع حاجبو💔 .... وبرضو بيتلفت وهو رافع حاجبو💔..... لونو مبالغة 💔عندو غمازات 💔.... عيونو خرافية 💔....وكحيلة كمان ورموشو ماشاء الله طويييييلة💔 .... ونخرتو شفتي شيخ فزاع(ولد حاكم دبي) بس نفس النخرة💔 ..... فيهو شعر بس اسكتي ساي💔.....وعندو سكسوكة مدوخاني ومجنناني 💔 طويل وعندو عضلات في بطنو 💔... وبيلبس لبس بس عارض ازياء💔 .... واكتشفت قبل شوية انو عندو وشم في بطنو 💔.... فيهو رجولة غريبة بتلفت نظرنا كبنات (ببو يشقك ان شاء الله )
مي : واي يا ترتيل خليتيني اتكسر معاك 💔.... حظك ياخ مهما كان في النهاية ولد عمك وهسه قاعد قدامك ... انحنا اشكال زي دي في عائلتنا ماف 😂... لكن دقيقة كيف يعمل وشم الوشم حرام ؟
ترتيل : ماعارفة قصة الوشم دي شنو الا اسألو منها.
مي : خلاص ابقي فالحة وارميهو فيك .
ترتيل: اقول ليك حاجة ؟
مي : قولي
ترتيل : انا ملاحظة ليهو مرات بيكون منتبه مع نوران شديد .... بغير عليهو ششدييييد وبقيت بكره الزفتة الاسمها نوران دي .
مي : ياخ نوران دي زي الرجال ..... واحد زي فهد محتاج واحدة فيها انوثة زيك تحسسو بي رجولتو ... لكن بنت عمك دي هدومها ولبسها وتصرفاتها ما فيها اي انوثة ما اظن تنفع معاهو ....بس النصيحة لي الله هي جميلة وظريفة خاربا على نفسها بي استرجالة دا .
ترتيل بي غضب : هه نوران منو الجميلة ..... والله ما فيها اي ذرة جمال .... عبيطة وخفيفة ومعقدة ومسترجلة وزيادة عدد بس ما اكتر .
مي : المهم انتي خليك شاطرة واقدري لميهو عليك .
ترتيل : ان شاء الله .
مي : باي
ترتيل : باي
ترتيل وهي بتعاين لي نوران البتضحك على محمد اخوها : هه قال جميلة قال ..... جميلة انا والله .
الاولاد طلعو من الموية فهد قعد جمب في اختو بعد ما رجعت .... وبي طرف طرحتها نشف وشو ( شرير😂)
في : فهد ... علي مالو صاري وشو كدا ؟
فهد وهو بعاين لي علي برااااحة (يسترق النظر 😂) : انتي عارفة شكلو في شي مزعلو .
في : مالو يا ربي ؟
عمر جا داخل فيهم غلط : مالكم ؟
فهد : عاين لي وش علي براحة ما يحس بيك يقوم يردح فينا ويقول لينا بتعاينو لي مالكم اصلو هو قليل ادب.
عمر : بسم الله مقطع وشو كدا لي ؟
فهد : كدي اسألو .
عمر : لاااا علي دا لمن يكون زهجان ما بفتح خشمي معاهو .... اسألو انت .
فهد : اسأليهو انتي يافي . (اخ يا علي مخوفهم كلهم 😂)
في : طيب حأسلو لكن ما هسه .... لمن نكون برانا .
نوران : علي مالك لاوي بوزك ؟
في اللحظة ديك قربو كلهم يقومو يبوسو نوران لانها جات في الوقت المناسب ... وبقو بعاينو لي علي عايزين يشوفوهو مالو .
علي : ماف حاجة 😔
فهد : sure ? (متأكد؟)
علي :sure 😔
نوران فجأة قفلت التلفون و وقفت على حيلها
محمد : مالك ضربتك عقرب ؟
نوران : بلا نرجع البيت .
فهد : انتي كويسة ؟
نوران : اي كويسة ... بس عايزة ارجع .
تهليل : طيب يلا .
و قامو كلهم ...
فهد كان ماشي ورا القطيع ( التشبيه عجبني )
نوران جاتو جارية : فهد فهد عايزة اقول ليك شي
فهد : قولي
ترتيل قبلت وراها لقت نوران بتتكلم وبتأشر بيدينها وفهد كان مهتم بالكلام الهي بتقول فيهو .
فهد : اهااااا عشان كدا يعني .... اخ فاتت علي .
نوران وهي بترفع يدو وبتعاين للوقت من ساعتو : ما مشكلة لسا عندنا زمن كافي الساعة يادوب 12:00
ترتيل جاتهم ورا : فهود مالكم واقفين ورا براكم ؟؟؟
فهد : حتفهمي بعد شوية .
ترتيل فجأة على اساس عطست شديد وهي اصلا ماسكة قزازة موية في يدها ....طرش (مؤثر صوتي )طيرت الموية في وش نوران وهي قااااصدة (هسه لو علي كان في كان طلع زيتها )
ترتيل : اووووبس انا اسفة يا نورة ماكان قصدي حبيبتي سوري شديد .
فهد جرا نور في ترتيل لانو حركتها كانت ظاهر وواضحة لمن ما قدرت تتكلم وبقت بتعاين ليهو مخلوعة نظرتو كانت مخيفة ( لعبتي مع واحدة فهد مهتم بيها يا ترتيل ).... فهد مسح لي نوران الموية من وشها ومسك يدها ومشى .... خلا ترتيل خشمها ملح ملح ...... بقت واقفة لي مسافة والخوف ملا قلبها انو يزعل منها وصورتو وهو بيمسح في الموية من وش نوران ومسكتو ليها من يدها خلت قلبها يتقطع من الغيرة وهنا دموعها نزلت .... اتفاجأت بصوت كرم : ترتيلو انتي كويسة ؟؟؟؟؟
ترتيل ما ردت عليهو
كرم بي خلعة : مالك بتبكي ؟؟؟
ترتيل : ............
كرم : ترتيل لا ياخ ما تبكي .... وشال منديل ومسح ليها دموعها ( كرم حنييييين شديد اكتر واحد في اولاد العائلة حنين زي اسم امو).
كرم : في حاجة عايزة تحكيها ؟
ترتيل والعبرة خانقاها : لا
كرم : طيب يلا عشان ما يفوتونا .
ومشو وراهم ..... لمن وصلو الششاليه والاولاد الصغار خشو .... نوران وقفت الكبار الباقيين : يا جماعة استنو .
كلهم اتلمو فيها وقالت ليهم كلام وكلهم اتخلعو .
في : اخ نسيت .
عمر : عشان كدا .
نسمة : يا حليلو يا ناس
تهليل : انا عندي ليكم خطة .... لكن حنبدا التنفيذ من هسه ... الجو حلو وبارد ومغيم يعني ما حنتعب .... يلا حاوري اي مجموعة منكم عليها شنو ..... وقفت وبدت توريهم انتو عليكم كدا وانتو عليكم كدا ... وانتو امشو المحل الفلاني وانتو امشو جيبو كدا .
بعد ما اي مجموعة مشت فهد وقف تهليل .
فهد : عندي حاجة عايزك تساعديني فيها .
تهليل : اخترت الزول المناسب 😌
فهد : (...........................) (كلام سر لكن حنعرفو بعدين )
تهليل : جبت الفكرة دي من وين ؟
فهد : حتساعديني ؟
تهليل : انا من زمان نفسي في كدا والله ... لكن حتجيب الحاجات من وين؟
فهد : هسه حأطلبهم اون لاين واقل من 4 ساعات حيوصلو ان شاء الله .
تهليل : يلا توكلنا على الله .
♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡
علي كان قاعد مع شلتو الصغيرة
باسل : علي انت زعلان مني لي؟
علي : منو القال ليك ان زعلان منك يا بسبس (كديسة هو ؟)
بسمة : طيب زعلان مني انا ؟
علي : ولا انتي يا بسوم .
رنا : بس خلاص معاناها زعلان مني انا .
علي : كيف يا نوني ازعل منك .... انا ما زعلان انا حزنان ياخ انتو صغار ما بتفهموني .... مع السلامة انا طالع انوم .
نسمة جات للاولاد الصغار وقالت ليهم الكلام القالتو ليهم نوران .
باسل : عشان كدا يعني .
بسمة : واحنا حنعمل شنو .
رنا : اي حنعمل شنو انا عايز اساعد
نسمة : طيب حاوريكم
بعد ما قالت ليهم كلهم قامو جاريين بحماس اي واحد على وظيفتو الادوها ليهو .
نوران كانت نازلة من السلم لاقاها فهد .
فهد : نوران ممكن دقيقة من وقتك .
نوران : اوكي اتفضل
فهد قال ليها كلام .
نوران اتخلعت : شنو ... لا طبعا
فهد : انتي بت عادي يعني .
نوران : بس انا ماعايزة
فهد : عشاني ..... دي اول مرة اطلب منك طلب.
نوران : لكن انا ما عندي وما بعرف الحاجات دي .
فهد : ما تخافي .... انا عامل حسابي وماف زول حيعرف ....... خلاص ؟ اتفقنا ؟
نوران شالت نفس : اتفقنا .
♡♡♡♡♡♡♡♡♡♡♡♡♡♡♡♡♡♡♡♡♡♡♡♡
علي كان قاعد في الاوضة رقد في السرير وبدا يقلب في الرسائل ابتسم بي حزن وبعديها رمى التلفون .... كان بيفكر لي دقايق وبعديها ناااام 😪........
صحا بصوت المنبه الساعة 7 مساء .... الواطة مغرب.....والاوضة ضلام ....فتح نور التلفون لقا ماف واحد من الاولاد راقد جمبو ..... اتخلع ومشا براحة فتح النور .... فتح باب الاوضة الممر ضلام ماف اي حركة ...نادى بصوت خايف .... يا جماعة انتو وين .... نوران ؟ ماف رد ..... ماما ..... ماف رد ..... بلع ريقو بخوف .... ضرب في تلفون عمر ..... التلفون مغلق ..... فتح الواتساب بتاع فهد اخر ظهور قبل 4 ساعات ..... علي خاف ..... في شنو .... مشو وين ..... طلع في الممر المضلم وماف صوت غير صوت الهواء بتاع المكيف .... مشا بخطوات خايفة وفتح نور الممر ..... ماف اي زول فتح اوضة في .... مافيشة والبنات مافيشات ......خلااااص عيونو عايزة تدمع الخوف ملا قلبو .... الصالة تحت ضلااااام دامس .... قال بسم الله وبخطوات بطيئة وهو منور بي تلفونو نزل من المدرجاااات .... واحد واحد براحة براحلة ...... فجأة سمع صوت رجلين ضوا التلفون بس ماف زول ماف اي زول قدامو
علي : منو ؟؟؟؟ منو في البيت ؟؟؟؟ ماف رد
نزل في الصالة ومشا بي سرعة على جهة الانوار
وفجأة الانوار ولعت 🎆🎇🎆 وصوت كل اهلو وهم بقولو : كل سنة وانت طيييييييب يا علي 🎉🎊🎉🎊🎉🎊🎉.
علي من شدة الخلعة وقع في الارض غطا وشو بيدينو وبكا 😭 (ليك حق والله غياظين )...عرفتو لي كان زعلان ...الليلة عيد ميلادو وكلهم كانو ناسينو ونوران عرفت من صفحتو في الفيس بوك وكلمت الباقين ... وخبو يفاجؤوهو
فهد وهو بقعد جمبو وبيضحك : اي الحركة مخيفة بس دي مفاجأة يلا قوم بطل بكا عمرك بقا 15 سنة
علي وهو لسا مغطي وشو وبيبكي : في داعي لي فيلم الرعب دا من البداية .
حيدر : خلاص ما تبكي قوم كل سنة وانت طيب .
وباس ليهو راسو .
جا صوت نوران من فوق : لااااا فاتني منظرو وهو مخلوع .
كل العيون اترفعت فوق السلم .... وفجأة الناس دي كلها سكتت .... كلهم بقو مبحلقين في نوران .
الليلة يسجل التاريخ نوران ماكانت نوران الهم بيعرفوها كانت واحدة تانية ملااااك ونزل من السما ..... لاول مرة من 4 سنوات نوران لابسو فستان اااي فستان كان لونو اسود يدينو كم هندي ( ثلاثة ارباع)
لامع من فوق ومن تحت شفون اسود .... ومعاهو جزمة كعب عالي حمراء .... واخيرا غيرت تسريحة شعرها الواحدة .... شعرها المرا دي كان استريت ما كيرلي زي كل مرة ..... مفكوك نازل علي طول ضهرها وشعرها اسود شديد وغزير وعاملة قصة بالجنبة ..... عاملة ايلاينر وايشدو هادئ بأسود في لمعة خفيفة كدا وطبعا دا مع عيونها الواسعة العسلية كان خراااااافي ..... عاملة روج احمر مات ..... ولابسة حلق رينق اسود ..... نوران وهي لابسة هدوم الاولاد بتكون مزة فما بالكم بي شكلها كدا .... واكيد انتو عارفين انو الفضل يعود لي فهد وتهليل .... فهد لمن وقفها قبيل كان طلبو منها : نوران البسي فستان الليلة .... وتهليل اختارت الفستان ومكيجتها ...... الناس كلها ساكتة ومبهورة فيها.
نوران وهي بتتلفت وراها : بسم الله في شيطان وراي ولا شنو .... يا جماعة مالكم بتعاينو كدا ..... ياخ ما تخوفوني .
محمد : لو سمحتي ... ن نادي نو نوران اختي .
نوران وهي نازلة في السلم : انت مجنون انا نوران
فراس بي صفارة اعجاب : اخطبوها لي .
في اللحظة دي فهد غمض عيونو من شدة الغضب وشال نفس طويل ..... وحاول يهدي نفسو عشان فراس ما يضيع فطيس في يدو .
علي وهو بيمسح دموعو : انا ما قادر اصدق انك نوران .
بدور وصوتها فيهو هزة كأنها حتبكي : ماشاء الله .. بتي ماف اجمل منها والله.
ترتيل قربت تمووووت نوران الليلة احلى منها الف مرة
قالت بصوت عالي : يلا يا جماعة نطلع حنقعد هنا كتير .
بعد ما فكو من الصدمة طلعو وراها لي برا .
فهد وهو بعاين لي نوران بي اعجاب : عجبتك الهدية .
نوران وهي بتجدع شعرها لي ورا : اي
الهدية كانت عبارة جزمة كعبها عالي حمراء .... والفستان الاسود ..... وباقة ورود جوري (💔)
فهد : طيب يلا نطلع .
وهم ماشين على المخرج .
نوران : فهد .
فهد : اي
نوران سكتت شوية وبعديها قالت : شكرا
فهد وقف يعاين ليها في عيونها مسافة مسكها من كتافينها وقرب منها وطبع قبلة عمييييييقة في جبهتها 💋 ( قليل ادب 🙈)
قال ليها وهو مبتسم : شكرا ليك انتي ... لانك رضيتي تلبسي الفستان .

نوران خجلت شديد وطلعت بي سرعة .... فهد ضحك على شكلها وطلع بي وراها .....بره كانو مجهزين الكيك والعصاير والفواكه والمشاوي ... والتورتة كانت حللللوة فيها صورة علي ومرسوم فيها الرقم 15 ..... فراس من ما نوران طلعت استلمها هو يتصور ويضحك معاها.... فهد واقف مع امو وابو ما فهم ليهم اي شي .... يتكلم شوية مع امو ويعاين لي نوران .... بعد ما خلصو كلامهم ... فهد كان ماشي لي نوران ..... لكن ترتيل وقفت قدامو .
ترتيل : فهد انت على فكرة قبيل فهمتني غلط
فهد بي ابتسامة فيها سخرية : على فكرة يا ترتيل حركتك كانت واضحة .
ترتيل نظام مخلوعة : حركة شنو ؟ انا .... انا وطوالي دموعها نزلت طبعا دموع تماسيح والتمثيل يخلوهو ليها : كيف بس فهمني كيف انا اكون قاصدة اعمل كدة
.... نوران دي اختي انا وهي اتربينا في بيت واحد .... يعني انا عشان عملت حاجة من دون قصد بتعمل لي كدة ... دايما انا مظلومة ودايما انا مطلعني غلط .... ياخ حرام عليكم .... انا بالجد ( بتشبيع الجيم ) كرهت حياتي .
فهد اكتر شي بيضعفو انو يشوف زول بيبكي قدامو ... وخصوصا لو بت فما بالكم بي ترتيل بي دلعها وانوثتها الجذابة .
فهد بي صرة وش فيها حنية : طيب انتي هسه بتبكي لي .... ما تبكي .
ترتيل وهي بتمسح دموعها : على كل حال حصل خير
وعايزة تمشي .
فهد مسكها من يدها : ترتيل انا اسف ...
ترتيل قلبها بقا بيعمل دمبلق دمبلق دمبلق 💔....
ترتيل : حصل خير
ومشت .... ظهرت لمعت شر في وشها وهي بتقول : ما حاخليك ليها يا فهد انت لي وبس .
بدور : يلا يا شباب نطفي الشمع🎂 ..... وقفو كلهم وغنو لي علي ..... ولمن كان عايز يطفي الشمع .... نوران ملت خشمها هوا وطفتو هي .... وقالت بصوتها العالي وهي بتضحك : هع هع هع هع هع اطفيهو انت السنة الجاية .
بعديها شغلو الاغاني .... كانو بيرقصو كلهم ومحمد بيعمل في حركات ما بتاعت نصاح موت الناس من الضحك 😂💔..... فهد مدي نوران ضهرو وهي نفس الشي ........ والاتنين قبلو على بعض في نفس الوقت ... وهنا اشتغلت غنية ( ما مصدق اني قدام حبيبي ماسك ايدي وعيني في عينيه ) ...... فهد مبتسم الابتسامة البدوخ 💔.... اما نوران فخجلانة من بوسة قبيل .... لكن عاينت في عيونو طويل ..... النظرة في العيون بتحرك الاحاسيس وبتخلي القلب يدق .
نوران : فهد ... انت مكحل ؟
فهد : يا دووووبك انتبهتي ليهم 😉؟ ... دا طبيعي 😌
نوران بعفوية : حلوات
فهد : انتي الاحلى ❤️ " انتي الاحلى والاجمل يا حبيبي "
نهاية الجزء التاسع .