بسم الله الرحمٰن الرحيم ✨.
بوي : القصة ومافيها منكذبش عليك ونقولك انها بسيطة ، لا بالعكس ، بس مر عليها هلبا وقت ! المهم ؛ عمك سمير دار إثم كبير ف حياته وهذا اللي خلاه يرجع لدينه ؛ زمان كان يحب اخت سالم الصغيرة ، وصار بيناتهم احتكاك فالجامعة ! اكثر من مرة يشدوا فيها خوتها وتقوله فوتني وكذا ، بس سمير كان مسكر رأسه ؛ وصلت بيه لحد ما بوي حبسه وضربه حتى الضرب وهي نفس الشي ، ع المهم تعذبوا هلبا ، وهو الأساس كان خو سالم رضا صاحب سمير هلبا ، وتعاركوا هلبا ع الموضوع هذا ، يوم من الأيام بعد ممكن شهور وهما ميكلموش ف بعض سمعنا انها انخطبت ، قعدنا نسألوا عرفنا انه اكبر منها بِـ٢٠ سنة ومطلق ومغصوبة طبعاً عليه ؛ عمك لصغر عقاه وقلة رشده ، مشا وكلم رضا وقاله تعالالي ، سالم شكله قعد مخنس مالموضوع قعد يمشي ورا رضا ، ع المهم تلاقوا وكذا وخوي طلع الموس وضرب رضا ف كلاويه الزوز ، وهكي سالم هجم ع عمك وقعد يضرب فيه وبعدها هرب وفتحوا فيه محضر ومش عارفة كيف صار جدك طلعه براءة ومن وقتها العيلتين حاقدين ع بعض !! لالا شن حاقدين تي يكلموا واحد يهودي ولا يكلمونا ؛ مع اني وعمك بشير وعمامك مليناش علاقة ولا سالم وجمعة وخوته لينا علاقة ف الموضوع ، بس اللي عفنها جدك وخلاهم يكرهوا اي طرف قريب لينا ، واحنى نفس الشي مع اننا من طرف العيلة الظالمة بس حاقدين عليهم والله اعلم السبب .
انا "بصدمة" : ححححيييييي ععععلللللممممههههه ! حسيت روحي نتفرج ف فيلم .
بوي : خلي اسلوبك الشوارعي مع صحابك يا محمود ، واحترمني !
انا "نزلت رأسي ": حاضر يا بوي .
بوي : اييي وشن تبي ف قصة عمك مع سالم ؟
انا "بخيبة أمل" : والله انا الحق نبي نخطب وقالولي ع بنته ، ووقت مشيتله وحكيت معاه ف الأول كلمني عادي بعدين وقت قلتله ولد ناصر ****** فصل عليا وقريب لزني .
بوي : لا حول ولا قوة إلا بالله ؛ يعني انتَ ملقيتش إلا بنته !
انا : نصيب .
بوي : شوفلك غيرها يا محمود وفكني من المشاكل .
انا "بصوت عالي" : تي كيف يا بوي ، ف سوق احنى باش تقولي شوفلك غيرها ؟
بوي : كبرت والله ، وتعلي فصوتك عليا ؟ "اشر ع الباب" اعرف حدودك بعدين تعالالي يا فرخ.
انا "وقفت" : انا مش فرخ يا بوي ، راجل !
بوي "بصوت عالي" : كان راجل ره متجيش وتقولي على بنت سالم .
انا "بصوت اعلى" : تي شني بنت سالم مسيحية هي ولا ملحدة ؟ تي ماهو الغلط منكم وصدقتوا الكذبة .
بوي "بصوت عالي" : الغلط منا لاكن متعرفش اللي صار بعدها ؛ سالم هوا كان يبي يقتلني بدال رقبة خوه .
انا "بنفس الصوت العالي" : حقه يا بوي ، حقه ! حرام ره عمي سمير طالع واموره تمام وهو جزائه يكون في السجن .
بوي : يلا يا محمود ، اقلب وجهك عليا ومعاش توريهولي والنبي !
انا "قربت من الباب" : اصلاً طالع منه الحوش معاش بنقعد ف الخمر "وفتحت الباب ".
بوي : هالخمر يا مش متربي هو اللي كبرك ، تتتففففيييييهههه ع رباية زيك .
هذا اخر شي سمعته من بوي بعدها قربعت الباب ؛ نزلت وف الدروج تلاقيت مع امي ومصطفى .
