بسم الله الرحمٰن الرحيم ✨.
عمر "جا خش بطاسة حليب" : فرح نوضي اشربيه ، يدفيك وكويس لصحتك .
انا "قاعدة نتفرج ف التلفزيون" : منشربش فيه .
عمر "قعمز جنبي" : باهي خيرها حبيبتي متكنطية !
انا : شي ، فيه موضوع شاغل بالي بس "بعدين تلفتتله" انتَ مش مفروض عندك خدمة ؟
عمر : لا مزال ، توا غازي ينظم الجو وبعدين نبدأ انا .
انا : اممممم به كويس ؛ توكل توا لأن نبي نكمل المسلسل .
عمر : خيرك تدوي هكي ؟
انا : هذا كلامي وهذا طبعي ، كان مش عاجبك يعني !
عمر "وقف وطلع بدون ما يرد ".
كملت المسلسل ونضت دوشت وبدلت ورقدت .
ثالث يوم وهذا اهم يوم ف عمري .
نضت من الصبح وانا حاسة جوي احسن من الايام اللي فاتوا ؛ ونعتبر رايقة نوعاً ما ؛ بدلت حوايجي ولبست سروال ابيض وفانيليا صوف واسعة بس قصيرة خضرا ؛ استشورت شعري ودرت مكياج خفيف .
مشيت للمطبخ ودرت قهوة وقعمزت نشرب فيها .
شوية خش عمر .
~~~~~~~~~~~~~~
زعما اللي صاير معاي حق ، وبديت نحبها ؟
ياربي لا ؛ انا لتوا قاعد مش متأكد !
نضت خشيت للحمام ودوشت وبدلت وطلعت .
لقيتها ف المطبخ مقعمزة تشرب ف قهوة .
انا "خشيت بكل هدوء ومكلمتهاش ولا شفتلها" .
فرح "باستغراب" : الناس يقولوا ف صباح الخير !
انا : وانا معنديش صباح الخير ف قاموسي .
فرح "وقفت" : ان شاء الله تنحرق انتَ وقاموسك وكل حاجاتك ! "وطلعت ".
انا "قعدت نضحك عليها ؛ بجد تأخذ العقل هالمخلوقة ".
درت قهوة وشربتها ، وبعدها مشيت ف اتجاه دارها .
انا "طقطقت ع الباب" : نقدر نخش ؟
فرح : ..........
انا "فتحت الباب بالشوية ".
فرح " متكية ع السرير وعاطية بظهرها" : عمر اطلع مش طايقة حوايجي .
انا "قربت منها وقعمزت جنبها" : خيره الحلو زعلان ؟ شكلك تزعلي بسرعة يا بنت ، منحسابكش هكي ، نحسابك قوية ومافيش شي يأثر فيك !
فرح : به خليك مع حساباتك واطلع .
انا "مشيت ايدي ع ايدها" : توا معقولة وحدة تقول لحبيبها اطلع وتكلمه بهالأسلوب ؛ ره كل البنات ديما يدلعوا قدام اللي يحبوهم مش هكي ، تقوله انحرق واطلع وفوتني وتوكل ومدخلكش بيا .
فرح : ميهمونيش كيف يتعاملوا معاك كمشة المراهقات اللي كنت معاهم ، انا هكي .
انا "قربت منها وبست خدها " : به يا اللي هكي ، انا راضي بيك .
فرح "قاعدة ع وضعيتها ".
انا "حسيت بضعفها ، بخوفها ، برجفتها ؛ ولذلك قعدت نعاود نبوس فيها ف خدها وكامل وجهها ورقبتها ".
فرح "معاش قدرت تتحمل ؛ ناضت قعمزت ودفتني" : انا ره منتحملش نسامح من غير ما نتناقش معاه ف الموضوع اللي ضايقني ، وحتقعد غصة ف قلبي وتتراكم !
انا "ربعت ايديا" : به شن تبي قوليلي ؟
فرح "في لحظة انهارت بكا ، قعدت تبكي وبصوت قوي".
انا "خفت ومعرفتش شن ندير او شن نتصرف ؛ قربت منها وحضنتها ، حضن الاخ لأخته وحضن الأب لبنته " : اسسسسسس علاش هذا كله ؟ انا بجد آسف لو انك تحسستي من كلامي ، غر متبكيش بس !
فرح "شدت فيا اكثر وقاعدة ع نفس الوضعية ، تبكي وبصوت" : انا تعبت والله تعبت .
انا "قعدت نمسح ع شعرها" : باهي تمام ، ابكي هي وفرغي كل اللي فقلبك .
