بسم الله الرحمٰن الرحيم ✨.
انا "بعدت عليه شوية " : عمر ، كيف هكي .
عمر "بصوت هادي" : خلينا يا فرح عايشين .
انا "كنت نبي نكمل معاه ، بس كان عندي احساس ان غازي قريب يجي " : ابعد يا عمر غازي قريب يوصل .
وخرنا من بعض شوية ، ونضت وقفت .
عمر " شد ايديا " : انا منقدرش نتحمل ره .
انا "قلبي يا ناس بيطلع" : باهي غر يمروا كم يوم ونفكروا ف حل .
عمر : تي اما كم يوم يا فرح ؛ انا نبيك توا .
انا "خديت ايديا وبعدت عليه شوية " : عمر انا مش جاهزة ؛ حتى لو اني درت هلبا حاجات قبل ميديروهاش البشر ، الا اني مزال منقدرش .
عمر "وقف " : به انا قاعد لحد ما تحسي روحك جاهزة .
انا : تمام .
خشيت للحمام ، وحسيت روحي بنطربق من الحرارة ، قعدت نغسل ف وجهي ، ونعاود ؛ حطيت ايديا ع فمي ، يا ربي كان هنا ، وشفت لخصري من المراية ، وكان حاط ايديه هنا ؛ زعما انا ف حلم ؟ عمر اللي طول الوقت عاجبني ، يعترفلي بحبه ويبوسني ؟ لالا مستحيل ، فيه شي غلط اكيد .
طلعت من الحمام بعد محاولات هلبا مني لتهدئة كل شي فيا ، وبالفعل كيف ما احساسي قالي ، لقيت غازي جا ؛ مقعدتش معاهم وخشيت للدار ، درت ماسك العسل ، ودرت دورة ع روحي ، اممممم اتكيت ع السرير وحسيت بشعور غريب لحظتها ، جت صورة فهد خوي قدامي ؛ زعما كيف حالك يا ولد قلبي ؟ الوحيد اللي من يوم ما طلعت من الحوش ميغيبش ع ذهني ، الوحيد اللي حتى لو بكيت نبكي ع خاطره ، الوحيد اللي حنقعد طول عمري نذكر فيه بقهرة ؛ الوحيد اللي مخشش ف اللعبة الوسخة اللي دخلوني فيها عيلتي ؛ فهد كان انظف انسان قدرت نشوفه ف حياتي ؛ وكل ما نزيد نتعرف ع ناس ، نقتنع اكثر انه حيكون اكثر انسان مش خبيث ف الدنيا .
وبعدها اذكرت صقر ؛ من يوم جا عندي ف الاردن ، معاش قرب مني بكل ؛ الغريب ف صقر شي واحد ، انه بالرغم من ان بوي دخله ف هالوساخة الا ان مداير روحه عادي ونظيف ، توا انتوا اللي تقروا لو ترجع ذاكرتكم شوية التالي ، وتذكروا اني حكيتلكم ع حبيبته اللي توفت وهو قعد فترة مضايق عليها ، وبعدها بيومين وقت بنهرب قالي نحبك ، توا هذا ميحتاجش انكم تشكوا فيه ؟ ومع هذا مافيش حد دقق ف هالنقطة ومشيتوها كلكم ، بس حنقوللكم شن غرضه القدام .
ومن ذاكرتي الصقرية توجهت للأبوية والعائلية ، بجد كل يوم ع يوم نكون فيه برا الحوش نحس بالراحة ؛ صح صعبة انك تقعدي ف بلاد غريبة عليك بروحك ومن غير والي ، بس لما تذكري اللي داروه اماليك تحمدي ربي .
وانا خلال سرحاني ، مسمعتش طقة الباب ، بس انتهبت ان فيه شخص خش .
انا : شن تبي ؟
غازي : بنقولك تعالي نطلعوا ونغيروا جو شوية .
انا : الهالي بخدمتك بس ، مدخلكش بيا .
غازي "جا قربت وقعمز ع السرير" .
انا "لميت روحي " : ها ؟
غازي : نوضي قعمزي نبي ندير معاك حل .
انا "قعمزت " : غازي ، فوتني والنبي ، مريضة وخلوقي ف حكة .
غازي : باهي مش حنأخذ من وقتك هلبا .
انا : هي اتحفني !
غازي : نبيك تقعمزي بينك وبين نفسك وتحددي روحك شنو ، لو تبي تقعدي معاي انا هالحال ميساعدنيش ، خلاص سادنا ثمانية سنين نبي نعيش زي الناس العادية المتزوجة ؛ ولو تبي تنفصلي وتعيشي حياتك ليك كامل الحرية ، يعني بشهادتك وماسترك ع ما اظن مافيش مكان ميخدمكش ، هنا حتلقي صعوبة وحدة ف الاقامة واللغة وهالشي لو تبي تختاري الخيار الثاني اقعدي عندي لحد ما تاخذي اللغة ونديرلك اقامتك وبعدين ننفصلوا .
انا "يعني يا غازي ملقيتش تقولي ع هالكلام الا اليوم ؟ الصبر يارب" : غازي ، انا توا منفكرش ف شي ؛ ومنعرفش حياتي كيف ماشية اصلاً ، خلينا نستقروا هنا ونتناقش فيه الموضوع معاك .
غازي : باهي تمام ، خوذي وقتك "ووقف" .
