بسم الله الرحمٰن الرحيم ✨.
نتلفت نلقى أخت محمود "ندى" مقعمزة ؛ استغربت جيتها الحق ، طبعاً هكي تكون البيست فريند لمروة بنت عمي أخت رنا (مش لازم نقعد نشرح ف عيلة عمامي لأن عارفتكم تملوا منهم ، حنتكلم ع اللي بينذكروا وخلاص ) ؛ مليت من الداخل طلعت البرا قعمزت جنب الولاد ، وتحديداً فكرسي جنب خوي فهد .
مراد : خيرك يا فرح مش مقعمزة مع البنات ؟
انا "بملل" : معجبنيش جوهم .
فهد : جُوا جدد ولا كيف ؟
انا : معاهم صاحبة مروة ويتعاملوا برسمية وانا منحباش هالجو .
صقر : باهي احنى بنتعاملوا بحقارة وميمشيش معاك هالجو ، طيري هي .
انا "شقلبتله عيوني" : لما تكون مزرعة بوك بعدها ادوي واعطي أوامر وين كل فرد فينا يمشي .
مراد : شكله فيه شي صاير هنا ولا كيف ؟
انا "اشرت ع صقر" : نكرهه المخلوق هوا .
فهد : علاش شن دايرلك ؟
انا "وقفت" : خلوه بروحه يحكيلكم .
مشيت من جنبهم وانا حاسة روحي مخنوقة وخاطري نبكي ، مش عارفة علاش تكلمت مع صقر هكي مع انه كان صديقي ! تكرهيه بجد يا فرح ؟ "حطيت ايدي ع قلبي" انا منكرهش حد ، بس مافيش حد ف قلبي غيره .
"مروة .. بنت عمي فيصل عمرها ٢٠ تقرا حاسوب تقريباً ".
"مراد .. ولد عمي طارق عمره ١٨ يعني أكبر مني بسنة ويقرا قانون ".
"صقر .. ولد عمي هشام وعمره ١٧ نديدي يعني ، ومش عارفة شن بيقرا ف الجامعة".
~~~~~~~~~~~~~
مقعمز مع بدر صاحبي ونفختله رأسه بقصصي اللي متمش ؛ بعد كلام هلبا وبعد كشف القناع القوي لإظهار الضعيف لصاحبي ، استطردت كل أفكاري وقعدنا ساكتين انا وياه ، هو يفكر ف كيف يقنع أمه انه يحب أردنية وانا نفكر ف ردة فعل بوي بعد هروبي من الحوش .
بعد شوية من التفكير بروحي في عقلي ، فاق قلبي وعطا إشارة لعقلي بالتوقف على اللي يدير فيه ، وإنه جا الوقت اللي استاحشت فيه فرح بجد ، مستاحشها لنم ، الحق الأيام اللي فاتوا قعدت غايب ع الحوش وعليها ، قعدت ندور بين إجراءات السفر والخدمة اللي لسوء حظي طلعتلنا مهمة وضروري نديرها قبل ما نحول وهكي ، قعدت مشغول ومنبيش نشغلها معاي ؛ وهي الفرخة مكلمتنيش بكككككل .
~~~~~~~~~~~
قعدت ندور ف المزرعة بين الشجر وانا عقلي مش معاي بكككل ؛ حطيت ايدي ع جيبي واذكرت ان موبايلي قعد ع الطاولة جنب الولاد ، حححححيييييي عليا !!!!
شوية وانا راجعة بخطوات سريعة لقيت صقر جايني ومبتسم .
صقر "مدلي موبايلي وابتسم " : محمود يتصل بيك يا بنت العم .
انا "ارتبكت" : من محمود ؟
صقر : وين نندري عليك مسجلتيه هكي !
انا "خديت منه الموبايل" : هدا رقم خو صاحبتي وهي لأن موبايلها فاسد تكلم فيا مرات منه .
صقر "حط ايده ع كتفي" : اهاا ؛ وخو صاحبتك يقولك حبيبتي ؟
انا "حسيت قلبي طاح " .
صقر : متخافيش مش حنحكي لفهد وعبدو .
انا "والدموع ف عيوني" .
صقر "بضعف" : متبكيش ، خليه راجل ويي يخطبك بس !
انا "انهرت بكا" : ميقدرش .
صقر "باستغراب" : علاش ؟
انا "قعدت نبكي وخلاص ".
صقر "قرب وحضني ، وحط رأسي ع صدره" : اششششش علاش كل هالبكا !؟
انا "استاقضت اني ف حضنه ، بعدت من عليه" : لو سمحت خلي بيننا مسافات .
صقر "حط ايديه ف جيوبه" : لهدرجة تحبيه وصايناته ؟
انا "نمسح ف دموعي" : وأكثر .
صقر : سامحيني بس مقدرتش نسكتك لأن هكي .
انا : عادي ، مش مشكلة ؛ بس بالله عليك يا صقر متحكيش لفهد وعبدو ، ورحمة غيداء .
صقر "لما قلت غيداء ، بان عليه الضيق وعطاني بظهره" : تمام مش حنحكي بس خليه يثبت انه راجل وبس "ومشى ".
