بسم الله الرحمٰن الرحيم ✨.
وصلت للحوش وكالعادة لقيت امي مقعمزة هي وعماد ف الجنان ويهدرزوا ؛ قربت منهم ، سلمت عليهم وقعدت واقف .
عماد : وين كنت ؟
انا "شفتله" : كنت طالع !
عماد "بغل" : نسألك سؤال تجاوب زي الناس .
انا "قرنت حواجبي" : بيني وبينك ره ميجوش ١٠ سنين ، فلذلك مديرليش جو الأخ الكبير الحنون الخايف ع خوته .
امي "بلطف وتغيير موضوع" : اييي يا محمود شن جو خدمتك ؟
عماد "يشوفلي والشر بيطلع من عيونه".
انا "تلفتت لأمي" : ماشية الحمد لله .
امي : مافيش مشاكل !؟
انا : لالا .
عماد : قاعد متعارك انتَ وبوك ؟ "بهزوة" ع خاطر بنت !
انا "بغل" : نتعارك مع الكل ع خاطر البنت هي ؛ عماد الزم حدودك ومتوصلش فيها !!
عماد"ضحك ع جنب" : اووووو لهدرجة واخدة عقلك ؟
انا : متسكتش يا عماد والله تشوف شي ميعجبكش .
عماد : وشن بنشوف يا كتكوت ؟
امي "بصوت عالي" : خلاص عاد !!! ياسركم لعب صغار ؛ تقول مفرخ مش واحد متزوج والثاني قريب يتزوج .
انا : مدرتش شي ، هو يناشب .
عماد : والله كلام الحق قلته ؛ حتى بنحكيها لحد بنقوله خوي متعارك مع بوي ع خاطر بنت يضحك .
انا : البنت هي نتعارك مع العالم كله ع خاطرها ؛ تي لو كلفني كل طاقتي مافيش حد يبعدني عليها .
عماد "شاف لأمي" : يحس بروحه قاعد ف مسلسل تركي !
مشيت من بحداهم ومزدتش ولا كلمة ؛ خشيت لداري اتكيت ع السرير وانا هكي هموم وتعب نفسي .
~~~~~~~~~~~~~~
نتصل اليوم بمحمود وميردش ، خفت عليه تكون صايرة معاه حاجة ؛ بس قلت مرات هو هكي يحب يقعد بروحه ، وفته واستسلمت للنوم .
~~~~~~~~~~~~~~
"مروا شهرين ، وخلونا نعرفوا ملخص هالشهرين..."
رجعت مشيت لبو فرح ٤ مرات ، ثلاثة مرات لزني قبل ما يهدرز معاي حتى كلمة ؛ مشيت لجدي مرتين وكان رافض هالموضوع ؛ حكيت مع عمامي واللي عينه ف الاول قالي انتَ ولدنا ونديرولك اللي تبيه ، ووقت عرفوا بنت منو هربوا كلهم وداروا ظهرهم ليا ؛ بوي ممكن بمعدل يومياً نكلم فيه وهو قاعد نفس الشي ، امي زادت سكرت دماغها وبدت زيهم ، كلمت خوالي ومافيش حد قدر يتحرك معاي خوفاً من عمامي ! مشيت كلمت عم فرح ووقت عرف اني ولد ناصر قريب ضربني وتعارك معاي .
الملخص كانوا هالشهرين عبارة عن تعب في تعب في تعب ؛ وكان الموضوع متسكر ع وجهي ! علاقتي بفرح قاعدة زي ما هي واقوى .
في يوم كنت نهدرز انا وندى أختي .
ندى : وشن بدير توا ؟
انا "حطيت ايديا ع رأسي" : معاش عرفت شن ندير ، ليا ثلاثة شهور نجري ورا الموضوع ومافيش حد حن عليا .
ندى : ربي يصبرك يا خوي .
انا : ندى !
ندى : نعم .
انا : لو نحكيلك فكرة ف دماغي متحكيش لحد وتوقفي معاي ؟
ندى : أكيـد .
انا : حنهرب انا وهي .
ندى "حطت ايديا ع فمها بصدمة" : ههههيييي هكي هلبا يا محمود .
انا : ملقيتش حل إلا هكي يا ندى .
ندى : متأكد ؟
انا : اييي ، بنأخذ جواز سفرها وبنسافروا .
ندى : لوين ؟
انا : الأردن حالياً .
ندى : بس كيف بدير مع الفلوس .
انا : عندي انا مبلغ قوي وبشهادتي وربطت مع نفس المنظمة اللي نخدم فيها ، بس بفرعها غادي ونقعد جو شهر ونتعين .
ندى : باهي وبعدين ؟
انا : نتزوجوا اول شي هنا ونديروا وراقينا وبعدين نقعدوا غادي فترة وبعدها نمشوا لهولندا نقعدوا فالحوش اللي عندنا غادي .
ندى : صعبة يا محمود ره .
انا : معنديش حل .
ندى : ربي يقدم اللي فيه الخير "وناضت".
انا : ندى بيناتنا !
ندى : اكيد .
