بسم الله الرحمٰن الرحيم ✨.
عمر : اممممم صاير موضوع والله .
انا "باستغراب" : شن فيه ؟
عمر : امي بدير عملية وصممت اني نجي ونكون معاها .
انا : اي وبه ؟
عمر : شن به متاعك ؟ كيف بنمشي وبنولي ؟
انا : عادي برا ، واقعد معاها وبعدها قدم ع تأشيرة وتعالى ، شن الصعب يعني ؟
عمر : تي عندي ستين موضوع نبي نحلهم قبل ما نروح .
انا : وشن هما هالستين ؟
عمر "اتكى ع السرير" : ارقدي توا ، وغدوة نحكيلك ونحلوهم مع بعض .
انا "خشيت ف حضنه" : تمام ؛ مضايقش روحك كل شي ليه حل .
عمر : اكيد .
ورقدنا .
ثاني يوم فقت وكان الوقت بكري هلبا ، مشفتش الساعة بس هكي كنت نقول انه الساعة ٦ ؛ نضت خشيت للمطبخ ولقيت روحي فاتحة النت تلقائياً ونحاول ندير اي اكلة للفطور ، ع امل تطلع مني حاجة ، قعد ف بالي اني نجرب البان كيك ، او هالشي صعب عليا من اول مرة ، باهي شنو ندير ؟ كان امس درتله توست محروق ، اليوم برضو بنخليه من غير فطور ؟ لالا لازم نخليه يحس بوجودي ؛ طلعولي ١٧٤٩٦٣٩ طريقة للبان كيك ، درت ع اول وحدة وقعدت نتبع ف الخطوات ، وهكي درته وحسيته نوعاً ما كويس ، مقارنة بوحدة زيني لحد توا تعتبر مطيبتش ، حطيت عليه الشكلاتة ، وقصيت موز ، وحطيت حاجات القهوة ف الماكينة وهكي وتيت الطاولة .
~~~~~~~~~~~~~
ياااااربي عاد مش معقولة كل يوم تنوضني ع صوت دوشة ، اووووف منك يا فرح اووووف ؛ شن هالفوضى اللي عايشة فيها .
نضت خشيت للحمام دوشت بسرعة وبدلت حوايجي ، ومشيتلها ف المطبخ ، لقيتها مقعمزة تتفرج ع الصونية ؛ شن هذا اللي حاطاته ؟ ، هذا لبان كيك ولا كيكة و لا كريب ؟ بس حاطة عليه صوص ومدايرة روحها مزينة الوضع .
انا "قارن حواجبي" : صباح الخير .
فرح "انتهبت ليا ، وتلفتتلي" : صباح الورد "وابتسمت".
انا : فرح بجد انا عندي قانونين منقدرش نتخلى عليهم ، منحبش ، ومنحبش ، ومنحبش حد يكون نايض قبلي ويدير دوشة ، لأن يومي كله حيمشي زفت ، ومنحبش الفوضى "واشرت ع المطبخ بالكامل" ره انا معنديش خدم وحشم يلموه ، يا بنديره انا يا انتِ وف الحالتين بنتعبوا لأن هذا مش حاجة طبيعية .
فرح "وقفت" : اوكِ تمام ، جندني ف معسكر انتَ وخلاص "وكيف جت بتطلع" .
انا "شديتها من ايدها" : قاعد مكملتش كلامي .
فرح "حولت ايدي بالشوية" : وانا مخاطريش نسمعه "وطلعت ".
ييييييهههههههه ع هالورطة توا ، وقته انتَ يا نم تجرحها هكي ؟ نايضة من امتا وامتا باش اديرلك هذا وتجي تهزبها ؟ غبي والله غبي ! هي خلي نضم هالحوسة وبعدين نمشي نراضيها .
قعدت نضم ف المطبخ ونغسل ونرد ، ونشوف ف هلبا حاجات مكنتش نحساب اني عندي منهم ، المهم بعد ما يعادل ساعة الا ربع باش كملته كيف ما نبي .
طلعت للبلاكونة وقعدت نشرب ف القهوة ، ونفكر شن الخطوة اللي بنديرها اليوم ؟ نطلق سراح هبة اليوم ؟ ولا نستنى غازي لين يوقع ؟ بس اكيد حيوقع هاليومين ! لالا يا عمر هي هبة امورها كويسة ومافيش حد قرب منها ، وقت توصلك ورقتك طلعها ؛ اي اي هكي احسن حل .
وباهي وشن الحل مع قيس توا ؟ منقدرش نخليه مع ملك أكثر !
وامي اللي نحلتي السماح لو منحضرش عمليتها !
والاهم من هذا كله فرح ، وشن بيصير فيها ؟ شن بيصير فيها لما تعرف انا من الاساس ؟ وشن بيصير فيها لو روحت لليبيا وهي قعدت ؟ وشن بيصير فيها لما تعرف باللي درته ؟
ووااااك هلبا مشاكل ، كيف بنحلهم ترا ؟ قولولي !
خشيت من البلاكونة ، وخديت مفاتيح الشقة ، وطلعت .
مكانش عندي وجهة قدامي الا وحدة ؛ مكان واحد بس يحللي جميع مشاكلي .
