بسم الله الرحمٰن الرحيم ✨.
غازي "ضحك ع جنب" : بالك تحسابيني ميت عليك ؟ ره أنا منبيش منك شي ، ولا نفكر فيك بالشكل هذا ، بيني وبينك يا فرح ١٢ سنة ومستحيل وخليها ف بالك مستحيل ، ف حياتي حنفكر اني نقرب منك !
انا "قرنت حواجبي" : ميهمنيش كلامك ره ؛ اهم شي انا قلتلك اللي عندي .
غازي "وقف" : هههههههههههههههههـ ؛ مش طامع ف مراهقة زيك ره ؛ انا لو نبي اللي ف دماغك ره توا متزوج وعندي صغار ؛ بس انا انسان عملي ومنشوفش للحياة بالشكل هوا !!
مشى غازي ونضت وراه ؛ روحنا للحوش ، ومن غير اي حد منا يكلم الثاني ركبنا فوق وكل حد خش لداره ورقد .
وانا كيف بنبدل بيدجامتي ، اذكرت اني من عشا امس مش واكلة شي ؛ زعما ننزل نلقى حاجة تتأكل ؟ لالا عيب شن من اول يوم بنخش للكوجينة ؟ ديري كرامة يا فرح ، ومش حيصيرلك شي لو مكليتيش اليوم ، غدوة كولي .
رقدت وكان هذا اخر شي فكرت فيه .
ثاني يوم نضت ع صوت غازي من ورا الباب .
غازي : فرح ، يا فرح ؛ نوضي هيا وقت .
انا : حاضر .
ومعاش سمعت صوته ؛ خشيت للحمام ، بدلت ولبست حوايجي اللي طلعت بيهم لقيتهم معلقات ف الدولاب ، سرحت شعري شوية ونزلت لوطا ، لقيته يفطر .
غازي "تلفتلي" : قعمزي افطري .
انا "قعمزت ع كرسي مقابله ، وقعدت نتفرج ".
غازي : منحبش الحشومة هلبا ره ، بطنك وكان متأكليش بتأكليها ع رأسك انتِ ، وتوا ينفعك الحشم .
انا "خديت خبزة وقعدت نأكل فيها فاضية" : والله محوتك جيعانة .
غازي "باستغراب" : محوتك ؟
انا "ضحكت" : اييي .
غازي : شرقاوية انتِ ؟
انا : لا بس ام امي من بنغازي وزمان ديما تقول فيها .
غازي : فعلقت فيك !
انا "هزيت رأسي ".
غازي "وقف" : تمام كملي فطورك وانا نستنى فيك ف السيارة ، عندنا هلبا اعمال "وطلع".
قعدت نأكل وبعدين طلعت معاه ؛ مشينا لمركز الشرطة ، وحسيت برهبة اني خاشة ع مكان مش ليا بكككل .
خشينا وحقق معاي ضابط وحكيت كل شي زي ما صار وهكي بعد قريب ساعة من الأسئلة والضغط وحرق الدم من اني نقول علاش انتحر ، وصعوبة تحديد الكلمات المناسبة ، طلعوني وقعد غازي يحكي مع رئيس الضباط ، لوهلة الجملة الوحيدة اللي سمعتها هي "بس هي محظورة من السفر لمدة سنة !" استغربت وانصدمت وكذبت وذاني واني مش انا محور الحديث ، وبالفعل بعد وقت اكتشفت اني مكنتش محور حديثهم .
طلعت وقعدت نستنى ف غازي ، بعدها طلع وقالي ان بنمشوا للمحكمة باش نكمل اجراءات الطلاق ، اي مه محمود طلقني قبل ما يموت ، وكانت الاجراءات هنا صعبة شوية بخصوص ان احنى اجانب مش منهم !
وهكي مر الوقت لحد الساعة ٣ الظهر وكيف كملنا شبه نص الاجراءات ، ومزال لازم يبعتوهم لليبيا ؛ بس اللي صاير ان ليبيا خايضة توا وصايرة فيها ثورة ، وهذا طبعاً سهل عليا الموضوع وحيتم موضوع اجراءات الطلاق و الفصل في وقت اقل من قبل .
لما سمعت بالثورة اللي صايرة وان الوضع ف بلادي مينفعش خفت ع عيلتي ، خفت ع فهد المتهور يدير شي ينهينــا !!
هههاااه ينهينا ؟ فيقي يا فرح انتِ مش منهم ره ؛ وكان فهد متهور معناها انتِ ملكة التهور .
استطردت كل هالأفكار من دماغي وقت فقت من سرحاني ع صوت غازي .
