30 Hari(Bahasa Iban)

Tusun 1

Dalam rumah tangga, enda sah enti nyema nadai penguji serta penanggul. Enti ati enda kering, dia mahligai pengerindu deka runtuh pia aja baka pasir dipangka ombak.

Baka jaku sempama, anang nguji berumah ba tebing pantai enti nyema enggai kena pangka ombak. Dalam idup berumah tangga enda selalu manis belama. Enti ati nyau nadai pengerindu serta penyayau ke pangan diri agi, dia pemutus deka sarak di ambi.
Kala enda kitai berunding deka nguji nyelamatka rumahtangga? Kala enda kitai berunding deka mulai ke pemanis dalam rumah tangga baka keterubah mula jadi suba?

Bakanya meh kisah Jack seduai iya Jane. Jack enggau Jane udah 10 taun niri ke rumah tangga seduai iya. Tang sayau seduai iya alu empai bisi anak. Amai munyi ko urang sekeda, anak penyeri dalam idup berumah tangga.

Jack enggau Jane sama bela bisi pengawa ke mujur. Jack gawa nyadi menijar ba siti kompeni swasta. Jane bisi bisnes kediri ianya butik baju. Kira seduai iya nadai penanggul dari segi duit.

Jack enggau Jane kelalu mentingka pengawa seduai iya nyentuk ka seduai iya jarang begulai enggau pangan diri. Jane kelalu kiruh laban bisnes iya nya. Nyentuk ka iya nyau enda ingat ke tanggung jawab iya nyadi bini Jack. Jane jarang ba rumah. Laban masa iya maioh dibuai iya ba butik iya. Pemakai laki iya,

Jack enda kala di intu iya. Jack kira ngintu diri empu meh. Bisi bini asai ke nadai bini tudah Jack. Pulai ke rumah ari gawa, bini alu empai ba rumah. Urang laki bukai enti nyema pulai gawa ngiga anak belanja alu meda bisi bini kisuk2 bebela ba dapur. Laki semina ngetat ke pengelelak diri aja. Nganti ke dikangau bini makai.

Gari gawa pan Jack kediri empu ngintu. Nganti Jane ke ngintu nyerika ke Jack baju, empai semaya. Enti nyema Jack ngasuh Jane nyerika ke iya baju, madah ke diri lelak belama iya. Tang Jack nemu bini iya Jane sibuk enggau butik Jane. Jack enda kelalu mansal Jane ngintu iya.

Enda ngawa enti Jane enda ngintu pemakai enggau ngintu gari Jack, tang tanggung jawab bini ngelayan laki ba tempat tinduk anang enda ingat. Setiap kali Jack minta, Jane suah meri maioh macham alasan. Madah ke diri lelak meh. Nadai mood meh. Nyentuk ka Jane udu ngasuh Jack tinduk ba luar. Alasan iya laban enda jenak  tinduk ninga kuruh Jack. Jack tetap sabar

Tang ati laki enda tau di uji. Iya nemu leju. Enti iya ngasai bini diri empu enda entu kiruh ke iya, dia iya ka nguji minta pengerindu ba indu bukai. Indu suah nyalah ke urang laki enti urang laki ngayah ke sida. Uji tanya diri empu, nama penyalah aku?
Bakanya meh tudah Jack. Nyau betaun idup bakanya, dia Jack betemu enggau bekas tunang iya suba ianya Jessy. Sebedau Jack jadi enggau Jane, Jack bisi tunang. Laban suba Jessy sanggup putus tunang enggau Jack ketegal juluk ati iya ti deka nyambung belajar ba tikas ke tinggi agi.

Diatu Jessy datai baru dalam idup Jack. Jessy udah janda anak siko. Laki Jessy udah parai laban bebadi ba jalai alun. Jack enda sengaja tau betemu baru enggau rumbau iya suba. Jack enggau Jessy pan alu ngenang ke pengingat seduai iya bepangan suba. Nyentuk ke seduai iya labuh pengerindu kali kedua. Tambah mega Jack nadai anak enggau Jane. Jadi anak Jessy di gaga iya baka anak iya empu.

Jane enda nemu kaul antara laki iya Jack enggau Jane laban iya kelalu kiruh ke butik iya. Jane enda sedar bisi indu bukai magi pengerindu ngagai laki iya Jack. Jack berasai bahagia laban benung madu pengerindu enggau Jessy. Nya meh kitai, enti kitai enda tejaga ke laki diri, anang heran nyema bisi penyangkai bukai endur laki kitai ngenduh. Bisi urang bukai sanggup meri pengerindu ngagai iya.

Jack enda sedar ke diri empu bisi bini iya Jane. Tang kati ka ngeletak ke semua salah ngagai Jane? Jack ke laki Jane nya meh mesti ngingat ke Jane tanggung jawab Jane nyadi ke bini iya. Nya meh kebuah kitai jadi melaki bini. Ukai semina tinduk sebantal, makai sepinggai tang mesti saling ngingat ke pangan diri nyema bisi salah singkang. Ukai alu ngiga penyangkai bukai alai endur ngenduh minta pengerindu ba urang bukai.

Jack ngambi pemutus deka sarak enggau Jane. Iya pan mai Jane berunding malam nya.

"Jane, nuan nemu bakani kaul antara tua? Tua nyau enda baka keterubah jadi suba. Udu mai pengawa diri empu." ko Jack ngepun ke leka jaku iya. Seduai iya Jane duduk ba bilik besai. Tv dipasang ngapa tang enda dipeda.

"Nama maksud nuan? Enti nuan bisi utai ka dipadahka, nuan ulih madah terus terang aja, Jack." ko Jane nyaut.
"Jane, manah tua sarak aja enti terus idup bakatok. Nuan pan enda baka keterubah jadi suba. Jauh bida nuan ari ke suba. Nuan nyau enda ingat ke tanggung jawab nuan nyadi bini aku. Nuan suah ngelak ke aku ngintu diri empu. Nuan sedar semua nya Jane?" ko Jack ngerintai ke penyalah Jane. Tang, endang sigi amat utai ko Jack nya.

"Jack, nama baru diatu nuan nyebut utai bakatok? Ukai aku enda nemu, nuan bisi pulai baru ngagai bekas tunang nuan suba, Jessy." ko Jane. Enda berasai ai mata Jane labuh. Jane nemu bisi urang ketiga dalam rumah tangga seduai iya Jack. Jane sedar ke diri empu enda kala ngintu laki iya Jack. Sangka iya Jack enda kisah tang lain ga nyadi. Jack makai luar.

"Jadi nuan udah nemu pia Jane?" ko Jack nanya. Iya enda kesal. Sigi mungkal dasuh iya nemu Jane. Jack enda nyalah kediri iya empu tang semua nya salah Jane. Salah Jane ke enda nemu ngintu iya. Kuyu Jane basah terutu ai mata iya.

Jane enda nyangka lalu. Jack mai iya sarak malam nya. Tang Jane enda nyalah ke Jack laban Jane nemu iya enda nyadi bini ke manah ba Jack.
Jack enggau Jane sunyi enda lama. Seduai iya bela berunding. Berunding ke pemutus seduai iya ti deka sarak nya.

'Betul ke enda pemutus aku tok.' ko telai ati Jack. Jauh ba dalam ati Jack, Jack agi sayau ke Jane. Tang ngenang ke seduai iya Jane nyau enda baka suba. Penyayau enggau pengerindu seduai iya nyau pudar. Nadai agi warna warni dalam rumah tangga seduai iya. Semina pemutus deka sarak enggau pangan diri aja meh jalai iya.

"Nuan anang nyalah ke aku aja Jack. Nuan pan sama. Nuan enda baka keterubah tua jadi suba. Nuan selalu pulai laun. Nuan udu bepegai ke telipun bincing nuan. Kini2 nuan, telipun bincing nuan enda tau leka lalu."ko Jane enggai alah.

"Enti nya pemutus nuan Jack, aku nerima aja. " ko Jane bejaku baru. Jane alu angkat bediri. Jane enda ulih ngetat ke ati iya sinu.
Meda Jane angkat, Jaxk berumban megai lengan Jane.

"Jane, ulih ka tua nguji nyelamatka rumah tangga tua?" ko Jack bejaku.
Jane enda nyaut.

"Aku meri peluang 30 hari endur tua nyelamat ka rumah tangga tua. Aku minta nuan bejalaika ke tanggung jawab nuan nyadi bini aku. Enti nyema dalam tempoh 30 hari tua enda ulih mulai ke pengerindu tua baka suba, tua ti deka sarak tetap nyadi." ko Jack bejaku.

"Au meh Jack. Aku nerima utai ko nuan. Aku nguji nyadi bini ke manah ba nuan dalam tempoh 30 hari. Enti nyema aku gagal, nuan tau nyarak aku. Baka nya meh nuan ga Jack. Nuan deka nyadi laki ke manah ba aku. Baka nuan keterubah tua jadi suba." ko Jane bejaku.

Jadi, peluang 30 hari pan berengkah....

Betampung...🍃