30 Hari(Bahasa Iban)

Tusun 7

~~~~~~~~~~~~~~~~~~~~~~~
"True love stands by each others side on good days and stands even closer on bad days."
~~~~~~~~~~~~~~~~~~~~~~~

Hari ke-6
Jack pansut enda lama ari opis endur iya gawa laban iya besemaya deka ngambi apai enggau indai iya ke bisi datai nemuai ari menua ba stesen bas.

Sepengudah parking kereta, Jack ngenuduk kediri ba bangku ke bisi dia. Demalam Jack bisi nerima call ari apai enggau indai iya ba menua madah ke seduai iya deka datai nemuai kitu.
Seraya ke nganti penatai bas ke ditepan apai enggau indai iya ari menua, Jack bayam telipun bincing iya.

'Call Jane dulu.' Ko Jack alu nekan numur telipun Jane. Bisi 3 kali dering, Jane alu nyaut.

📲"Hello Jane, nuan ulih pansut makai ngalih hari legi? Aku ditu ba stesen bas nganti penatai bas ke ditepan apai enggau indai." ko Jack bejaku

📲" Hello Jack. Empai datai seduai iya pia? Meda gaya dulu Jack. Agi maioh pengawa aku ditu." ko saut Jane ba ujung din.

📲"Au meh. Bye." ko Jack alu madam ke telipun.

Jack ukai enda nemu kaul antara Jane enggau indai iya enda entu manah. Ketegal indai iya udu nyindir Jane ke empai ulih meri indai iya ucu. Jane dipadah ke indai Jack punas enda ulih ngandung. Enda ulih meri purih ngagai Jack.

'10 taun seduai Jane udah jadi, Jane alu empai ngandung2. Urang bukai baru jadi sebulan udah ngandung bini. Kada enda punas Jane nya.' ko indai Jack kala bejaku enggau Jack. Tudah Jack enda memunyi tiap kali indai iya besebut pasal anak. Ka iya ngelaban jaku indai iya, nangi dikumbai indai iya anak derhaka ga laban ngetan ke bini iya Jane.

Ka iya nyalah ke Jane enda ulih ngandung, enggai ga nyai laban seduai iya Jane kala betemu enggau lutur pakar. Lutur pakar madah Jane nadai nama2 masalah.  Masalah empai bisi anak nya meh salah siti kebuah rumah tangga seduai iya Jane enda entu berapa manah. Jane suah makai ati berulam jantung lebuh ninga jaku sindir Indai Jack. Nyentuk ke Jack enggau Jane suah belaya besengki jaku ketegal jaku Indai Jack nya.

Indu ni ka ninga diri dikumbai punas? Sapa meh enggai bisi purih dalam rumah tanaga? Sigi di sampi meh bisi purih betelesak. Tang semua nya Petara ke ngatur. Bakani ko enggau enti Petara empai ka meri, anggap aja meh nya penguji ari Iya ke dalam rumah tangga. Petara ka meda bakani kitai nempuh penguji ari iya.

Benung Jack duduk tegenung ngenang seduai iya Jane, dia telipun bincing Jack belagu nandaka bisi urang Call.Peda iya nama ba skrin telipun, nama Jessy.

📲"Hello, Jack. Dini nuan diatu? Chukup jam legi, makai ngalih hari sama au. Ba tempat biasa." pia ko Jessy ari ujung talian. Empai bejaku Jack, udah dulu Jessy mai Jack makai ngalih hari baka selama.

📲"Hello, Jessy. Ditu aku agi nganti penatai bas apai enggau indai aku ari menua. Au meh. Legi aku ngambi nuan ke sekula kia. Alu mai apai enggau indai aku makai ga legi." ko saut Jack.

  Enda iya teringat ke semaya iya enggau Jane, badu ngelayan Jessy. Ni alah dikemadu ke iya, pengerindu ga udah ngerembai bebungai ba ati Jack. Jessy ga bekas tunang Jack kelia. Ni alah dibuai pengerindu urang keterubah. Biar Jessy udah janda.

'Belalai betemu enggau Jessy, ukai Jane nemu.' ko Jack bejaku kediri. Urang laki sigi 'Champion' enti pasal makai belalai.

Tilik Jack ga jam ba jari iya, baru manggai pukul 11.
Empai lama udah nya, peda datai bas ke ditepan apai enggau indai iya ari menua.

'Betul meh numur flat bas ke diberi indai demalam.' ko Jack bejaku sambil merati ke numur flat bas ke baru sangkai nya. Angakt Jack mansang semak ngagai bas nya, nganti apai enggau indai iya nurun ari bas.

"Kitu apai, aku megai beg nuan nya." ko Jack alu napat ke apai enggau indai iya. Ambi iya ga beg bahai ke di bai apai iya. Udah sida sebuat ngulih ke beg gari apai enggau indai Jack ari bas, sida iya alu tama ke dalam kereta Jack.