30 Hari(Bahasa Iban)

Tusun 22

~~~~~~~~~~~~~~~~~~~~~~~
"The happiness you feel is in direct proportion with the love you give."-Oprah Winfrey
~~~~~~~~~~~~~~~~~~~~~~~

Hari-21

Jane ngetu napau bubur manuk ke dempa Jack  ba siti kedai enda jauh ari sepital. Sepengudah iya ngabas butik iya tadi, Jane alu berumban deka ngabas Jack ba sepital. Seraya ke nganti cina nya tembu nyedia ke bubur manuk, Jane duduk sambil ngudar ai lemon suam. Laban nyawa iya minta utai ke masam aja. Jane nilik jam ba jari, mimit agi deka manggai pukul 12 ngalih hari. Jam 12 ngalih hari sigi jam urang luar ngabas bala ba sepital.

Jane ngirup belubah tedai ai lemon suam iya. Berasai nyamai asai dilah iya ngirup ai nya. Memasam sepi iya.

"Sudah siap amoi. Rm5." ko apek cina nya seraya nyua ke bungkus tapau bubur manuk ngagai Jane. Jane nyua ke Rm5 ngagai apek nya. Pengudah bebayar, Jane alu angkat deka tama ke kereta. Enda sabar ati iya deka betemu enggay Jack. Nya meh sempama ko urang, idup melaki bini enda salah baka dilah enggau ngeli. Meruan begulai taja ngeli suah teketup ke dilah.

Dalam pedis ati ke pangan diri, seagi penyayau sereta pengasih agi besarang dalam ati, kitai semampai ngampun ke penyalah pangan diri. Bakanya meh Jane. Taja ati iya pedis, taja tubuh iya dipenyati, tang ati Jane enda ulih ngemula kediri empu ke agi sayau enggau Jack.

Sepengudah Jane nyangkai ke kereta iya ba endur parking sepital, Jane berumban pansut. Jari iya mincing kambut plastik. Macam utai dempa di beli Jane ke Jack. Ni ke buah, ni ke kue enggau tapau bubur manuk tadi. Jane besemaya deka makai segulai enggau Jack.

Jane udah datai ba wad urang laki, ari jauh iya meda Jack udah ngepai2 iya. Wad udah penuh enggau bala urang ke ngabas bala sida. Capuh diri ga wad maya nya. Jane alu narit kerusi, iya duduk ngimbai katil Jack. Kambut plastik ke di bai iya di engkah ke iya ba atas mija. Jane tuchum ngagai Jack. Bakanya mega Jack.

"Terima kasih sulu. Laban nuan agi nerima aku. Aku bejanji ngagai nuan Jane, aku deka nyaga kaul tua enggau manah. Sama2 meh tua ngibun serta ngemesai ke anak tua di deka ada nya ila." pia ko Jack. Jari iya murus2 kanda Jane. Jane semina tuchum aja. Jane angkat ngemansut ke bubur manuk tadi, agi meruan angat.

"Tok empa nuan Jack. Kemaya nuan tau pansut deh?" ko Jane ngauk bubur ngena sudu. Sepu2 Jane laban agi angat sebedau di sapi iya ngagai Jack. Mentas udu meh indu baka Jane nya. Jack alu nyuap bubur disapi Jane nya.

"Dutur madah tadi, enti semua manah, pagila engka aku pansut." ko Jack nyaut. Mulut engkuam ngunyah bubur manuk. Jack alu ngambi sudu ari jari Jane. Kauk iya ga bubur ba jari Jane. Sepu2 Jack sebedau nyapi ke mulut Jane. Seduai iya pan ketawa rindang besapi2 makai dia.

Jane enggau Jack enda perasan, bisi Jessy ke merati ke seduai iya ari jauh. Jessy sanggup pansut enda lama ari sekula, ketegal deka ngabas Jack. Ai mata Jessy pan labuh naya nerutu kuyu iya. Ati iya cukup pedis. Pedis ketegal pengerindu iya ngagai Jack.Jessy ngasai ke ati iya digaga Jack semina penyangkai aja. Jessy enda sanggup meda Jane enggau Jack idup senang lantang tang iya empu idup merinsa. Jessy pan mai singkang kaki iya pansut ari wad nya. Mai ati iya ke pedis mega.

🌸🌸🌸🌸🌸🌸🌸🌸🌸🌸🌸🌸🌸

"Indai jang, enda ke sepital tua ngabas jang din?" ko apai Jack nanya bini iya ke benung beluit kaki meda tv. Mulut kunyap2 makai kuaci.

"Eh kapa aku tok ngabas iya? Enda pia aku tok meh danuk iya. Ketegal Jane ke dadak nya, iya berani nganu aku. Indai iya aku tok. Darah isi ba iya semua ari aku tok. Besai penukah iya ila." ko indai Jack bejaku alu nempap dada iya. Nyawa iya naka penyarih bejaku. Alah nyawa ari tv nya. Alu kempik meh mua apai Jack ninga saut bini iya nya.

"Nuan tok indai Jang. Anang bangat nitih ke ati nya. Ya lapa ga nuan bangat ta begedi endar meda endu Jane nya ar? Tua tok udah tuai indai Jang. Pagila lusa engka Petara ngambi nyawa tua. Maya tuai bakatok meh tua ngambi ati bala anak menantu. Engka nuan enggai di anjung ngagai pengandai tuai ila. Aku tok sigi minta ibun bala anak menantu." ko apai Jack. Iran endar ga ati iya meda indai Jack bangat bakanya ulah. Baka ke enda tuai.

Sekali enda memukai meh apai Jack kena tikau indai Jack ngena umbang kuaci. Enda iya ngira penulah iya ke enda bebasa ke laki iya empu. Penulah urang dipeda iya. Sempama baka meda tai ugi. Tai ugi urang dipeda, tai ugi diri empu dilalai. Kira bakanga meh indai Jack nya tadi

"Nuan apai jang, ta anang maioh jaku dia. Enti nuan enggai engkuam dipapa ke aku ngena umbang kuaci tok." pia ko indai Jack. Mangah udu meh iya. Indai Jack alu angkat. Redup2 kaki iya tama ke bilik pangking. Empas ke iya meh pintu. Nyau bedegum pintu empas ke iya. Ancik pemangah indai nya.

Kutap2 meh indai Jack nganu laki iya. Sekali dinga telipun bincing iya belagu nandaka bisi urang call. Peda iya kangau telipun ari Jessy.

📲"Hello! Nama utai?" ko indai Jack enda berasai merak Jessy. Laban ke benung pedis ati ke apai Jack.

📲"Ilal nuan tok ibo. Nama nuan merak aku?" ko Jessy nanya ba ujung din.

📲"Upah nuan call  maya aku benung pedis ati tok. Ilal ko nuan nyebut aku neh. Lapa nuan call tok?" ko indai Jack nimbal Jessy. Udah ga pedis ati laban apai Jack, disebut Jessy ilal ga iya.

📲"Sorry ibo. Enda sengaja nyebut nuan ilal. Ibo, tua mesti ngiga cara tok ibo. Enda ulih aku meda Jack pulai ngagai Jane. Abis nya, bakani enggau aku deh? Nuan ingat tubuh aku tok free ka endur Jack mayar bil ai iya?" ko Jessy sesabak din.

📲"Padah aja nuan empu sigi kanji endu. Nundi aja. Badu nyabak. Enti nuan bisi cara, nuan gaga aja meh. Aku tok mati idup enggai bemenantuka indu sitan Jane nya." ko Indai Jack.

Sekali ditutup ke Jessy telipun din. Engka Jessy pedis ati dikumbai iya kanji.

🌸🌸🌸🌸🌸🌸🌸🌸🌸🌸🌸🌸🌸

Lemai nya, Jessy tama ke kedai Jane. Nasib iya manah, laban bisi Jane ba dia. Mua Jill enggau Jwen emperengut meda iya. Ketegal iya kala nyerang Jane kia.

"Jane, ulih aku berandau enggau nuan enda lama?" ko Jessy ngaga mua sinu iya. Tiun nyawa iya diberi iya ayun lundai bejaku.

Jane tekenyit meda Jessy ke ngenyit nyeruga ba depan iya. Jane malik ngagai Jill enggau Jwen. Ngasuh seduai iya pansut enda lama.

"Padah ke aja  nama utai deka dikerandau ke nuan enggau aku. Enti penatai nuan semina deka mai aku belaya, aku enda minat Jessy." ko Jane bejaku. Jari iya udah ngenggam kayu bulu manuk. Nyema Jessy datai jari ba iya, sigi kayu bulu manuk nya dikena Jane maluk Jessy. 

"Jane, aku minta kasih enggau nuan. Lepas ke Jack. Laban aku enda ulih idup nadai iya. Bakani enggau anak aku Joyce? Iya udah nganggap ke Jack nya apai iya. Kasih ke aku meh Jane." ko Jessy nyau sesabak. Baka anak mit ke nyabak deka minta dibeli ke gula batu nya meh Jessy.

"Nama nuan ingat Jack nya barang ayam? Ulih dipinta bakanya aja? Jessy, nuan ari pun udah nemu Jack nya laki urang. Maioh agi laki bujang ba luar din. Nama mesti nuan deka ngulih ke Jack ngemendar nya. Anak nuan ga dikira nuan, bakani enggau anak aku ke alu empai ada tok ila?" ko Jane bejaku nyaut Jessy. Geram ati Jane. Kumbai iya baka minta utai kayam ko iya. Laki urang dipinta iya.

"Nuan anang enda ingat Jane. Sebedau Jack jadi enggau nuan, Jack nya tunang aku! Aku dulu mungkal ati iya. Ukai nuan. Nuan dikira ngerampas iya ari aku. Aku minta manah Jane, enti nuan tetap degil, nuan anang nesal au. Ingat jaku aku. Nuan anang nesal!" ko Jessy merak Jane. Iya pan alu pansut ari butik Jane.

Jane tebelenga aja ninga utai ko Jessy nya.

Bakani meh iya deka ngasuh Jessy badu ngacau rumah tangga seduai iya Jack?

~~~~~~~~~~~~~~~~~~~~~~~
"Happiness isn't what you find at the end of the road. It's right here. Right now."
~~~~~~~~~~~~~~~~~~~~~~~

Betampung...🌸