30 Hari(Bahasa Iban)

Tusun 23

~~~~~~~~~~~~~~~~~~~~~~~
"I love her, and that’s the beginning and end of everything."
~~~~~~~~~~~~~~~~~~~~~~~

Hari-22

Saritu, Jane deka ngambi Jack laban Jack pansut ari wad. Jane enda diau ba rumah seduai iya tang iya ngambi pemutus diau ba hotel aja. Laban enggai medis ke ati diri ninga jaku sindir indai Jack nya. Jane enggai belaya. Laban iya nangi enggai ke iya enda tan ati deka ngelaban bai emosi iya ke enda stabil. Emosi urang benung ngandung ukai sebaka enggau urang ke enda ngandung. Nemu ka mangah.

Sepengudah semua utai udah di adu ke seduai iya ba sepital, Jack enggau Jane pan pansut ari sepital. Jack pan udah regas. Jane ngiring Jack sambil megai lengan Jack.

"Ulih aku bejalai kediri, sulu. Nibuh ngiring aku. Peda kaki nuan nya, enggai ke nyangkut utai. Enggai ke teterap." pia ko Jack. Jari iya pulai megai jari Jane. Jane semina tuchum aja ninga utai ko Jack nya.

"Au meh. Pulai ke rumah terus nuan tok ka?" ko Jane nanya.

"Au. Kini agi aku deh? Nuan pan anang diau ba hotel lama2. Bahaya amai nuan kediri. Bisi rumah tua nya." ko Jack bejaku. Susah ato iya ngenang ka Jane ngambi pemutus deka diau ba hotel kediri2. Jane emda nyaut.

"Anang irau nuan enggau indai nya. Legi meh aku bejaku enggau iya, ngasuh iya pulai ke rumah panjai kin." ko Jack murus2 belakang Jane. Ninga utai ko Jack nya, Jane alu tuchum. Diatu Jack enggai alah agi laban indai iya nya. Jack enggai indai iya leluba masuk campur dalam rumah tangga iya.

Jane enggau Jack pan alu tama ke dalam kereta Jane. Jack ngambi kunci ari Jane. Iya enda ngasuh Jane deriba kereta.

"Jack, nuan badu agi ngaga pengawa gila bakanya agi. Anang pandak runding. Nama untung nuan deka munuh diri?" ko Jane nganu Jack. Jack ngangguk ke pala aja. Enggai iya nyaut jaku Jane. Laban iya malu ngenang ke ulah iya nyau pandak runding nya.

"Au meh. Minta ampun sulu. Nuan ka kini tok Jane? Enggau aku pulaai ke rumah ka?" ko Jack nanya.

"Enda aku Jack. Aku ka ke kedai aku. Udah nya aku terus ke hotel legi. Ngambi keresa aku din." ko Jane.

"Au meh."  ko Jack nyaut pandak.

Bisi ka berapa minit pejalai seduai iya ari sepital, seduai iya pan datai ba rumah. Jack tama ke dalam rumah. Jane alu mai kereta iya deka pulai ke kedai.

🌸🌸🌸🌸🌸🌸🌸🌸🌸🌸🌸🌸🌸

Jessy kekasak dalam kereta iya nengkila ke Jane. Iya bisi utai deka dipejalaika iya. Ketegal ati iya pedis meda kaul Jack enggau Jane nyau udah manah. Dia iya alu ngerunding ke siti rancangan. Rancangan jai iya. Rancangan ngasuh Jack alu benci meda Jane.

Ari jauh iya meda Jane tama ke dalam kereta. Jessy pan alu berumban entudi kereta Jane ari belakang.

Sepengudah Jane datai ba hotel endur iya diau, Jane alu tama ke dalam hotel. Jessy nganti aja ba dalam kereta iya. Jessy ngeluar ke siti kambut plastik mit.

'Ubat tinduk.' ko Jessy ketawa.
 
Jessy pan alu nitih ke Jane tama ke dalam hotel. Iya mantai ke cerita bula iya ba sida indu ke gawa ba kaunter hotel. Ngica ke sida ngasuh Jessy tama ke dalam. 

Sida indu hotel nya pan call ngagai bilik Jane madah ke bisi kaban Jane deka betemu. Jane laban ke enda nemu nya Jessy, iya pan ngasuh sida ngemendar ke Jessy tama.

Jessy udah bediri ba mua pintu bilik Jane.  Tekan iya ga loceng pintu bilik Jane. Empai lama udah nya, pintu pan tebuka. Jane tekenyit meda penatai Jessy. Ka ditambit ka iya baru pintu tang jari Jessy lancat agi ngetan ke pintu nya.

"Jane, ulih aku tama. Please! Aku nadai mai nuan belaya. Aku deka minta ampun enggau nuan." ko Jessy nyau besugang depan Jane. Meda Jessy bakanya, Jane pan alu ngasuh Jessy tama.