30 Hari(Bahasa Iban)

Tusun 16

~~~~~~~~~~~~~~~~~~~~~~~
"The only things I regret, and the only things I'll ever regret are things I didn't do. In the end, that's what we mourn. The paths we didn't take. The people we didn't touch."-Scott Spencer
~~~~~~~~~~~~~~~~~~~~~~~

Hari-15

Kedai butik Jane berasai sunyi tengah hari nya. Engka laban benung ujung bulan. Urang empai gaji. Benung begantung senduk. Jane duduk ba mija kaunter iya, benung ngecik akaun butik iya nya, ukai semina nya aja, iya mega ngecik stok2 baju ba butik. Stok baju mesti ka up to date ko ribai. Mesti ka bisi fesyen baru belama. Taja dituntung penusah ba dalam rumahtangga, tang Jane sigi urang ke profesional dalam pengawa iya. Jane enda sesekali nyampur ke hal rumahtangga iya enggau dagang iya. Nyentuk ke Jill seduai Jwen enda nemu penusah ke benung nuntung iya.

Jill enggau Jwen benung berandau enggau pangan diri. Laban ke nadai urang tama kedai. Sekali bisi siko indu tama ke dalam kedai Jane. Jill enggau Jwen pan alu berumban angkat napat ke indu nya. Tuchum2 meh seduai iya. Sigi pengawa seduai iya ga ngelayan urang ke tama ke kedai. Enda meli enda ngawa asal seduai iya tetap meri layanan ke manah.

"Selamat datai miss. Nuan ngiga nama?" ko Jill nanya. Indu nya enda nyaut. Jari iya megai2 gari ke bisi digantung dia. Mata iya melintuk merening ngagai Jill. Tudah Jill besabar aja dalam ati.

"Ni tukenio kita?" ko indu nya nanya. Jari iya nyingkau siti gari, udah nya dileka ke iya aja. Nyau labuh ke lantai meh gari nya. Jingkau iya siti agi, di leka ke iya baru. Jill enggau Jwen nyau ngumpul gari ke labuh gasak ke indu nya.

"Nama masalah indu nya neh?" ko Jwen nelai Jill. Jill semina ngangkat ke bahu iya aja.

"Eh, ari tadi aku nganti seduai nyaut. Tukenio kita ni?" ko indu nya baru. Mata iya nyeling ngagai endur kaunter. Endur Jane duduk. Nyau ga iya mansang semak kaunter endur Jane. Jane enda sedar ke penatai iya dia. Laban ke benung tetunduk2 maca utai.

"Ehem!" ko indu nya bedehem. Tunjuk jari iya natuk2 ke mija kaunter. Ninga bunyi urang ke bedehem nya, Jane ngangkat ke pala iya. Tekenyit iya meda indu ke benung bediri depan kaunter iya nya.

"Jessy?" ko Jane. Nama tuju indu nya berani amai datai ke kedai iya. Enda chukup berani tama rumah iya, tok nyau berani tama ke kedai iya kia.

"Emmm, okay ga kedai nuan tok cuma baju bisi luya mimit. Not my taste." ko Jessy sambil mata iya gegining merati ke setiap pelusuk kedai Jane. Gaga iya mua baka deka mutah. Jane pan alu angkat ari penuduk iya.

"Nama tuju nuan kitu? Semina deka ngeji aku ka?" ko Jane bejaku. Iran endar ati iya meda indu baka Jessy nya. Bangat tebal udu kulit mua iya. Enti digaga ke anyak baka kulit jani nya, kada enda maioh minyak pansut. Pedis ati iya ninga jaku Jessy nya. Pedis serta geram meda mua Jessy. Enda malu.

"Aku customer nuan au. Nuan mesti ngelayan aku. Nuan mesti nerima nama aja komen aku ba kedai nuan." ko Jessy nyaut. Mata iya nyau melintuk.

"Enti nuan bisi utai deka dipadah ke, padah ke dia. Aku nadai masa deka ngelayan nuan siko aja!" ko Jane. Enda berasai meh tiun nyawa iya ditinggi ke iya. Jill enggau Jwen nyau malik ngagai seduai iya.

"Okay, aku beterus terang aja la enggau nuan au. Hey, Jane! Manah nuan sarak aja enggau Jack. Sarak au. Nibuh ka ngetan2 ke agi. Muai masa!" ko Jessy ketawa. Nyawa iya sengaja dibesai ke iya. Sengaja ngasuh Jill enggau Jwen ninga.

Jane nyau betarit ke seput ninga utai dipansut ke Jessy nya. Ingin amai jari iya deka minsai ke Jessy nya. Bangat enda malu amai. Tang Jane enda nemu pengawa Jessy enggau Jack ke merau ba tasik sarinya .

"Sapa nuan ngasuh aku sarak? Nasib rumah tangga aku ukai ba jari nuan Jessy. Nuan ukai Petara! Anang nuan lebih2 ngaga pengawa Petara!" ko Jane.

"Jane, nuan anang melakun nyadi urang serga au. Nuan anang ngaga diri suci baka malaikat ba serga enti nuan pan baka sitan. Sitan pan enggai ngambu nuan ke madi. Ukai aku enda nemu nuan bisi skandal enggau laki polis nya. Sapa nama iya? Joe? eh Joel." ko Jessy alu ketawa engkakah baka antu indu. Jill enggau Jwen bela malik ngagai seduai iya.