30 Hari(Bahasa Iban)

Tusun 8

~~~~~~~~~~~~~~~~~~~~~~~
"She is strong but not in the ways most people think. She loves more than she'll ever get back and she knows it. And yet, she loves anyway."-JM Storm
~~~~~~~~~~~~~~~~~~~~~~~
Hari ke-7

Jane dedugau duduk kediri ba kedai kopi ke semak endur butik iya. Kedai kopi ke selalu alai iya ngirup pagi sebedau ngepun ke pengawa iya setiap hari. Jane semina mesan telo setengah masak enggau ai kopi o angat. Nadai mood iya ka makai berat pagi nya.

Entua iya ianya apai enggau indai Jack bemalam ba rumah seduai iya Jack tang enda nemu berapa lama seduai iya dia. Jane ukai enggai nerima entua iya nemuai kia tang iya enda entu rindu ke mulut entua iya ke indu nya. Entua iya ke laki enda baka entua iya ke indu. Mulut enda bebadu nyindir tudah Jane. Bisi aja utai enda betul digaga Jane ba mata iya. Jane semadi amai ngetat ke ati iya tiap kali disindir. Semadi ngenang entua meh.

Jane ngenang ke sebedau iya nurun gawa pagi tadi, dani iya ari tinduk ninga entua iya ke indu kekutap ba dapur.

'Nadai utai ke bisi ba rumah tok. Enda makai ba rumah sida tok kini.' kenu ko indai Jack kekutap ngerebak ke peti ais.

Jane ngaku, iya sigi jarang mandok ba rumah laban ke gawa. Jack pan sama. Maya tawas, seduai iya sigi nadai ba rumah. Semina malam hari aja meh seduai iya Jack ngelali rumah. Nya meh kebuah Jane enda bebeli ke lauk maioh ba rumah.

'Aruh anak aku nyau rujut. Bini ukai nya nemu ngintu tudah iya. Uji tak buai sekali bini bakanya.' ko jaku indai Jack demalam dinga pending Jane. Sinu asai ati Jane ninga leka jaku di pansut ke entua iya. Engka amai sigi  salah Jane meh enda ngintu laki iya. Tiap kali Jane ninga jaku entua iya bakanya, tiap kali nya ai mata iya labuh. Ukai semina di keji laban enda ulih meri Jack purih tang Jane mega di sindir enda nemu ngintu laki iya Jack.

"Jauh nuan tegenung Jane?"

Jane alu tekenyit. Kendas iya belalai ai mata iya ke udah labuh ba kuyu. Joel udah ngelabuh ke burit iya ba penuduk depan Jane.

"Joel, kati nuan tau nemu aku ditu?" ko Jane nanya. Mata iya enggai merening mua Joel laban enggai dipeda Joel nyabak.

"Sekumbang aku pindah gawa ba ditu, endang endur aku ngirup selalu ditu Jane. Nya ku tepeda ke nuan duduk tegenung ditu tadi." ko Joel. Joel tok gawa nyadi polis. Iya baru di asuh pindah ba tempat sida Jane dia.

Jane semina ngangguk ke pala aja ninga saut ari Joel nya. Joel alu ngudar mi goreng enggau ai kopi angat. Joel merati ke mua Jane ba depan iya nya. Jane majak ngelari ke mua iya ari diperening Joel. Mua Jane baka ke baru udah nyabak dipeda Joel.

"Jane nuan okay ka? Nama mua nuan baka ke baru udah nyabak?" ko Joel nanya Jane. Jane semina duduk aja. Enda iya nemu bakani deka madahka Joel. Pedis dada iya nyimpan penusah iya. Jane ukai nya maioh kaban ulih endur iya sebana. Bisi pan kaban, kaban biasa aja.

"Enti nuan nyamai ati, nuan ulih madah ke aku nama penusah nuan." ko Joel bejaku baru. Sambil kekunyap ngunyah mi goreng iya. Jane ngangkat ke pala iya alu merening Joel. Joel kaban iya ari suba ke suah endur iya sebana ke penusah iya. Kaul seduai iya sigi rapat enggau pangan diri. Taja Jane semina nganggap Joel kaban aja suba tang Joel bisi nyimpan ati ke Jane maya nya.

"Joel, enda aku nemu bakani deka madahka nuan. Tok hal rumah tangga aku. Sebedau tok aku kala nusi ka nuan kan. Kemari entua aku bisi nemuai kitu tang aku enda nemu berapa lama seduai iya deka bemalam ba rumah aku. Ukai aku enda rindu ke seduai iya Joel tang aku enda tan disindir indai Jack belama. Ari suba iya enda rindu ka aku Joel. Aku dipadah iya punas enda ulih ngandung, aku dipadah iya enda nemu ngintu laki, enggau maioh agi." ko Jane sebana ba Joel. Ai mata iya enda berasai nyau naya.

Joel enda memunyi ninga sebana Jane. Iya enda nemu nama deka saut ba Jane. Laban iya empu empai kala bebini. Senentang hal rumah tangga, iya sigi enda nemu endar. Ulih ke iya tisu, sua iya ngagai Jane.